ഇന്ന് ‘ഡൽഹി ചലോ’ മാർച്ച്; രാഹുൽ ഗാന്ധിയുടെ നേതൃത്വത്തിൽ ഇൻഡ്യ മുന്നണി തെരുവിൽ; നേതാക്കൾക്ക് നേരെ വ്യാപക പോലീസ് അതിക്രമം!

ന്യൂഡൽഹി: വോട്ടർപട്ടിക ക്രമക്കേടുകളിലും പ്രത്യേക തീവ്ര പുനഃപരിശോധനാ (SIR) പ്രക്രിയയിലെ വിവാദങ്ങളിലും മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്ന് ആവശ്യപ്പെട്ട് ഇൻഡ്യ (INDIA) മുന്നണിയുടെ നേതൃത്വത്തിൽ ഇന്ന് ഡൽഹിയിൽ വൻ പ്രക്ഷോഭ മാർച്ച് നടക്കും. കൊണാട്ട് പ്ലേസിൽ നിന്ന് സുപ്രീം കോടതിയിലേക്ക് രാഹുൽ ഗാന്ധിയുടെ നേതൃത്വത്തിലാണ് “ഡൽഹി ചലോ” മാർച്ച് സംഘടിപ്പിച്ചിരിക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കോൺഗ്രസ് അധ്യക്ഷൻ മല്ലികാർജുൻ ഖർഗെ, ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, പശ്ചിമ ബംഗാൾ മുഖ്യമന്ത്രി മമത ബാനർജി, അഖിലേഷ് യാദവ്, തേജസ്വി യാദവ്, സി.പി.ഐ.എം പൊളിറ്റ്‌ബ്യൂറോ അംഗം എം.എ. ബേബി തുടങ്ങിയ പ്രമുഖ നേതാക്കൾ മാർച്ചിൽ അണിനിരക്കും. അതേസമയം, സംയുക്ത നിവേദനം നൽകാനായി ചീഫ് ജസ്റ്റിസിന്റെ അനുമതി തേടിയെങ്കിലും വിഷയം കോടതിയുടെ പരിഗണനയിലായതിനാൽ ഹർജി നൽകാനാണ് ചീഫ് ജസ്റ്റിസ് നിർദ്ദേശിച്ചിട്ടുള്ളത്.

മെട്രോ സ്റ്റേഷനുകൾ വീണ്ടും അടച്ചു; നഗരത്തിൽ സമാനതകളില്ലാത്ത സുരക്ഷ

സുപ്രീം കോടതിയുടെ കശനമായ ഇടക്കാല ഉത്തരവുകൾ നിലനിൽക്കെ, ഡൽഹിയിൽ ഇന്നും സുരക്ഷാ പ്രശ്നങ്ങൾ ചൂണ്ടിക്കാട്ടി ഡി.എം.ആർ.സി (DMRC) ആറ് മെട്രോ സ്റ്റേഷനുകൾ കൂടി അടച്ചുപൂട്ടിയിരിക്കുകയാണ്. സുപ്രീം കോടതി പരിസരത്തും ജന്തർ മന്തറിലേക്കുള്ള വഴികളിലുമായി 35,000-ത്തോളം സുരക്ഷാ ഉദ്യോഗസ്ഥരെയും അർദ്ധസൈനിക വിഭാഗങ്ങളെയും നഗരത്തിൽ വിന്യസിച്ചിട്ടുണ്ട്. നഗരത്തിലെ 37 പ്രധാന കേന്ദ്രങ്ങളിൽ ബാരിക്കേഡുകൾ സ്ഥാപിച്ച് ഗതാഗതവും ജനക്കൂട്ടവും പോലീസ് കർശനമായി നിയന്ത്രിക്കുകയാണ്.

പ്രതിപക്ഷ നേതാക്കൾക്കും വിദ്യാർത്ഥി നേതാക്കൾക്കും നേരെ ക്രൂരമായ പോലീസ് അതിക്രമം

ഡൽഹിയിൽ സമാധാനപരമായി പ്രതിഷേധിച്ച രാഷ്ട്രീയ നേതാക്കൾക്കും വിദ്യാർത്ഥി യുവജന സംഘടനകളുടെ പ്രവർത്തകർക്കും നേരെ ഡൽഹി പോലീസും അർദ്ധസൈനിക വിഭാഗങ്ങളും നടത്തുന്ന ക്രൂരമായ അടിച്ചമർത്തലാണ് ഇപ്പോൾ വലിയ വിവാദമായിരിക്കുന്നത്. കഴിഞ്ഞ ദിവസങ്ങളിലെ പ്രതിഷേധത്തിനിടയിൽ നിരവധി നേതാക്കൾക്കാണ് മർദ്ദനമേറ്റത്.

• ജോൺ ബ്രിട്ടാസ് എം.പിക്ക് മർദ്ദനം: ഞായറാഴ്ച കൊണാട്ട് പ്ലേസിൽ വെച്ച് മാധ്യമങ്ങളോട് സംസാരിച്ചുകൊണ്ടിരുന്ന രാജ്യസഭാ എം.പി ജോൺ ബ്രിട്ടാസിനെ പോലീസ് ബലപ്രയോഗത്തിലൂടെ വലിച്ചിഴച്ച് വാഹനത്തിൽ കയറ്റുകയും, വാഹനത്തിനുള്ളിൽ വെച്ച് ക്രൂരമായി മർദ്ദിച്ച ശേഷം അവശ നിലയിൽ റോഡിൽ ഉപേക്ഷിക്കുകയുമായിരുന്നു. തുടർന്ന് അദ്ദേഹത്തിന് ദേഹാസ്വാസ്ഥ്യം അനുഭവപ്പെട്ടു.

• യുവജന-വിദ്യാർത്ഥി നേതാക്കൾക്ക് നേരെയും അതിക്രമം: ഡി.വൈ.എഫ്.ഐ നേതാവ് ജെയ്ക് സി. തോമസിനെ പോലീസ് വലിച്ചിഴച്ച് കൊണ്ടുപോവുകയും വസ്ത്രങ്ങൾ വലിച്ചുകീറുകയും ചെയ്തു. പോലീസിന്റെ ക്രൂരമായ മർദ്ദനത്തിന് ജെയ്ക് സി. തോമസും ഇരയായി. കൂടാതെ എസ്.എഫ്.ഐ അഖിലേന്ത്യാ പ്രസിഡന്റ് ആദര്‍ശ്‌ എം. സജിയുടെ തലയടിച്ച് പൊട്ടിക്കുന്ന തരത്തിലുള്ള അതിക്രമവും പോലീസിന്റെ ഭാഗത്തുനിന്നുണ്ടായി.

സി.ജെ.പി നേതാക്കൾക്ക് കോടതി ജാമ്യം

പ്രക്ഷോഭത്തിന് നേതൃത്വം നൽകിയ കോക്രോച്ച് ജനതാ പാർട്ടി (CJP) സ്ഥാപകരായ അഭിജിത് ദീപ്കെ, അശുതോഷ് റാങ്ക, സൗരവ് ദാസ് എന്നിവരെ മുൻപ് കരുതൽ തടങ്കലിലാക്കിയിരുന്നെങ്കിലും, ഡൽഹി എക്സിക്യൂട്ടീവ് മജിസ്ട്രേറ്റ് കോടതി ഇവരെ പിന്നീട് വെറുതെവിടുകയായിരുന്നു. നേതാക്കളെ മോചിപ്പിക്കാൻ കോടതി ഉത്തരവിട്ടതിന് പിന്നാലെ പ്രക്ഷോഭം കൂടുതൽ ശക്തമാക്കാനാണ് പ്രതിപക്ഷത്തിന്റെയും യുവജന സംഘടനകളുടെയും തീരുമാനം.

Tags: Delhi Chalo March, Rahul Gandhi Delhi Protest, CJP Protest CEC Gyanesh Kumar, John Brittas MP Attacked, SFI Arsh M Saji, Kerala News Malayalam, National News Malayalam

News Tag Live യുട്യൂബ് ചാനല്‍ Subscribe ചെയ്യുക