ഷാർജ പുസ്തകമേളയിൽ അപൂർവ പുസ്തകങ്ങളുടെ നിധിശേഖരവുമായി ബ്രിട്ടീഷ് പുസ്തകവ്യാപാരി

സാധാരണ പുസ്തകശാലകളിൽ ലഭിക്കാത്ത പതിറ്റാണ്ടുകൾ പഴക്കമുള്ളതും പ്രസിദ്ധീകരണം നിലച്ചതുമായ പുസ്തകങ്ങളുടെ അപൂർവ ശേഖരവുമായി ശ്രദ്ധനേടി 45-ാമത് ഷാർജ അന്താരാഷ്ട്ര പുസ്തകമേള. ‘ഓൾഡ് ആൻഡ് റെയർ’ എന്ന പേരിലുള്ള പ്രത്യേക വിഭാഗത്തിൽ ഗൾഫ് മേഖലയുടെയും അറബ് ലോകത്തിന്റെയും ചരിത്രം, ഇസ്‌ലാമിക പൈതൃകം, യാത്ര, സംസ്കാരം എന്നിവയെക്കുറിച്ചുള്ള അപൂർവ ഗ്രന്ഥങ്ങളാണ് ഒരുക്കിയിരിക്കുന്നത്. ബ്രിട്ടീഷ് പുസ്തകവ്യാപാരിയായ ഐഡ്രിസ് മിയേഴ്സിന്റെ സ്റ്റാളിൽ 1928-ൽ പ്രസിദ്ധീകരിച്ച എൽഡൺ റട്ടറുടെ *ദി ഹോളി സിറ്റീസ് ഓഫ് അറേബ്യ* എന്ന രണ്ട് വാല്യങ്ങളുള്ള പുസ്തകവും ശ്രദ്ധേയമാണ്. മക്കയിലേക്കും മദീനയിലേക്കുമുള്ള എഴുത്തുകാരന്റെ യാത്രകൾ വിവരിക്കുന്ന ഈ പുസ്തകത്തിന് 3,000 ദിർഹമാണ് വില.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പുതിയതും പഴയതും അപൂർവവുമായ 4,000-ത്തിലേറെ പുസ്തകങ്ങളാണ് മിയേഴ്സിന്റെ ശേഖരത്തിലുള്ളത്. യുഎഇ രൂപീകരണത്തിന് മുമ്പുള്ള കാലഘട്ടത്തിലെ ഗൾഫ് മേഖലയെയും പഴയ ട്രൂഷ്യൽ സ്റ്റേറ്റുകളെയും കുറിച്ചുള്ള പുസ്തകങ്ങൾക്കാണ് കൂടുതൽ ആവശ്യക്കാരെന്ന് അദ്ദേഹം പറഞ്ഞു. അമേരിക്കയിലെ ചെറുകിട പുസ്തകവ്യാപാരികളിൽ നിന്നും ഓൺലൈനിൽ വിവരങ്ങൾ ലഭ്യമല്ലാത്ത പഴയ പുസ്തകശാലകളിൽ നിന്നും ബ്രിട്ടനിലെ ചാരിറ്റി ഷോപ്പുകളിൽ നിന്നുമാണ് അപൂർവ ഗ്രന്ഥങ്ങൾ കണ്ടെത്തുന്നത്. കുടുംബങ്ങളിൽ തലമുറകളായി സൂക്ഷിച്ചിരുന്ന പുസ്തകങ്ങൾ പലപ്പോഴും അവയുടെ ചരിത്രപ്രാധാന്യം തിരിച്ചറിയാതെ സംഭാവന ചെയ്യപ്പെടാറുണ്ടെന്നും അദ്ദേഹം പറഞ്ഞു.

1974-ൽ പ്രസാധനരംഗത്ത് പ്രവർത്തനം ആരംഭിച്ച മിയേഴ്സിന് പ്രസിദ്ധീകരണം, എഡിറ്റിങ്, ഡിസൈൻ, വിതരണ മേഖലകളിലായി അഞ്ച് പതിറ്റാണ്ടിലേറെ അനുഭവസമ്പത്തുണ്ട്. കഴിഞ്ഞ 20 വർഷത്തിലേറെയായി ഷാർജ അന്താരാഷ്ട്ര പുസ്തകമേളയിൽ പങ്കെടുക്കുന്ന അദ്ദേഹം, ഇപ്പോൾ പ്രധാനമായും പുസ്തകമേളകളിലൂടെയാണ് വായനക്കാരിലേക്കും ശേഖരകരിലേക്കും എത്തുന്നത്. ഷാർജ ബുക്ക് അതോറിറ്റി സംഘടിപ്പിക്കുന്ന പുസ്തകമേള നവംബർ 15 വരെ എക്സ്പോ സെന്റർ ഷാർജയിൽ തുടരും. 126 രാജ്യങ്ങളിൽ നിന്നായി 3,212 പ്രസാധകരും പ്രദർശകരും പങ്കെടുക്കുന്ന മേളയിൽ 25 രാജ്യങ്ങളിൽ നിന്നുള്ള 106 അതിഥികളും 1,500 സാംസ്കാരിക, സർഗാത്മക, കലാപരിപാടികളും ഉൾപ്പെടുന്നു.

News Tag Live യുട്യൂബ് ചാനല്‍ Subscribe ചെയ്യുക