വായന വ്യക്തിത്വവികസനത്തിനും അഭിനയത്തിനും പ്രചോദനമെന്ന് നടി സിന്തിയ സാമുവൽ

വായന തന്റെ ജീവിതത്തെയും അഭിനയജീവിതത്തെയും ഏറെ സ്വാധീനിച്ചിട്ടുണ്ടെന്ന് ലബനീസ് നടിയും മോഡലും എഴുത്തുകാരിയുമായ സിന്തിയ സാമുവൽ. 45-ാമത് ഷാർജ അന്താരാഷ്ട്ര പുസ്തകമേളയിൽ ‘വെൻ ക്യാരക്ടേഴ്സ് കം ടു ലൈഫ്’ എന്ന വിഷയത്തിൽ നടന്ന സംവാദത്തിൽ സംസാരിക്കുകയായിരുന്നു അവർ. പുസ്തകങ്ങളിലൂടെ ലഭിക്കുന്ന വ്യത്യസ്ത കാഴ്ചപ്പാടുകളും അനുഭവങ്ങളും ഒരു അഭിനേതാവിന് കഥാപാത്രങ്ങളെ കൂടുതൽ ആഴത്തിൽ മനസ്സിലാക്കാൻ സഹായിക്കുമെന്നും അവർ പറഞ്ഞു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

13-ാം വയസ്സിൽ വായിച്ച ‘ദി സീക്രട്ട്’ എന്ന പുസ്തകം ജീവിതത്തെയും വ്യക്തിപരമായ സാധ്യതകളെയും കുറിച്ച് പുതിയ രീതിയിൽ ചിന്തിക്കാൻ പ്രേരിപ്പിച്ചതായി സിന്തിയ പറഞ്ഞു. ഫിക്ഷൻ, വ്യക്തിത്വവികസനം തുടങ്ങിയ വിഷയങ്ങളിലുള്ള പുസ്തകങ്ങൾ വർഷങ്ങളായി തന്റെ കാഴ്ചപ്പാടുകളെ സ്വാധീനിക്കുന്നുണ്ട്. വ്യത്യസ്ത കഥാപാത്രങ്ങളുടെയും വികാരങ്ങളുടെയും അനുഭവങ്ങളുടെയും ലോകത്തേക്ക് വായനക്കാരെ നയിക്കുന്ന പുസ്തകങ്ങൾ മനുഷ്യസ്വഭാവം മനസ്സിലാക്കാനും അഭിനയത്തിൽ മികച്ച പ്രകടനം കാഴ്ചവയ്ക്കാനും സഹായിക്കുമെന്നും അവർ വ്യക്തമാക്കി. കഴിഞ്ഞ മാസം മാത്രം 14 പുസ്തകങ്ങൾ വായിച്ചതായും താരം വെളിപ്പെടുത്തി.

യുവാക്കൾ വിനോദത്തിനപ്പുറം അറിവിനും വ്യക്തിത്വവികസനത്തിനുമായി വായന ശീലമാക്കണമെന്ന് സിന്തിയ ആഹ്വാനം ചെയ്തു. ജീവിതത്തിലും കരിയറിലും ലക്ഷ്യങ്ങൾ നേടാൻ ക്ഷമയും കഠിനാധ്വാനവും അർപ്പണബോധവും അനിവാര്യമാണെന്നും അവർ ഓർമിപ്പിച്ചു. കഴിവുകൾ വളർത്തിയെടുക്കാൻ സ്വയം സമയം നൽകണമെന്നും പെട്ടെന്നുള്ള വിജയത്തിനായി തിടുക്കം കാണിക്കരുതെന്നും താരം പറഞ്ഞു.

News Tag Live യുട്യൂബ് ചാനല്‍ Subscribe ചെയ്യുക