17
Nov 2026
Tue
17 Nov 2026 Tue
Kasaragod Masthikundu Expat Riyas Collapsed Died

കാസര്‍കോട്: അവധി കഴിഞ്ഞ് ഗള്‍ഫിലേക്ക് മടങ്ങാന്‍ മണിക്കൂറുകള്‍ മാത്രം ബാക്കിനില്‍ക്കെ പ്രവാസി യുവാവ് കുഴഞ്ഞുവീണു മരിച്ചു. മുളിയാര്‍ പഞ്ചായത്തിലെ മാസ്തിക്കുണ്ട് ചൂരിമൂല സ്വദേശി റിയാസ് (38) ആണ് മരിച്ചത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ചൊവ്വാഴ്ച വൈകീട്ട് പ്രവാസലോകത്തേക്ക് തിരിക്കാനുള്ള അവസാനവട്ട ഒരുക്കങ്ങള്‍ക്കിടെയാണ് നാടിനെ ഒന്നടങ്കം കണ്ണീരിലാഴ്ത്തിയ അപ്രതീക്ഷിത വിയോഗം. തിങ്കളാഴ്ച വൈകീട്ട് അഞ്ചുമണിയോടെയായിരുന്നു ദാരുണമായ സംഭവം. വീടിന്റെ മുറ്റത്ത് കാര്‍ കഴുകിക്കൊണ്ടിരിക്കെ റിയാസ് പെട്ടെന്ന് ദേഹാസ്വാസ്ഥ്യം അനുഭവപ്പെട്ട് കുഴഞ്ഞുവീഴുകയായിരുന്നു.

ശബ്ദം കേട്ട് ഓടിയെത്തിയ കുടുംബാംഗങ്ങളും അയല്‍വാസികളും ചേര്‍ന്ന് ഉടന്‍ തന്നെ റിയാസിനെ ചെങ്കളയിലെ (ചെര്‍ക്കള) സ്വകാര്യ ആശുപത്രിയില്‍ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.

കേരളോത്സവ കളിക്കളത്തില്‍ നിന്ന് മടക്കയാത്ര

നാട്ടിലെ പൊതുപ്രവര്‍ത്തനങ്ങളിലും കായിക രംഗത്തും സജീവമായിരുന്ന റിയാസ് എല്ലാവര്‍ക്കും ഏറെ പ്രിയപ്പെട്ടവനായിരുന്നു. മരിക്കുന്നതിന് തൊട്ടുമുന്‍പത്തെ ദിവസം നടന്ന പ്രാദേശിക കേരളോത്സവം ക്രിക്കറ്റ് മത്സരത്തിലും റിയാസ് സജീവമായി പങ്കെടുത്തിരുന്നു.

പൂര്‍ണ്ണ ആരോഗ്യവാനായി കളിക്കളത്തില്‍ നിറഞ്ഞുനിന്ന യുവാവിന്റെ പെട്ടെന്നുള്ള വേര്‍പാട് സുഹൃത്തുക്കള്‍ക്കും നാട്ടുകാര്‍ക്കും ഇനിയും വിശ്വസിക്കാനായിട്ടില്ല.

ചൊവ്വാഴ്ച രാവിലെ ഒന്‍പത് മണിയോടെ ബന്ധുക്കളും സുഹൃത്തുക്കളും നാട്ടുകാരുമടക്കം വന്‍ ജനാവലിയുടെ സാന്നിധ്യത്തില്‍ പൊവ്വല്‍ ജുമാമസ്ജിദ് ഖബര്‍സ്ഥാനില്‍ മൃതദേഹം കബറടക്കി.

പരേതരായ മുഹമ്മദ് കുഞ്ഞിയുടെയും ഖദീജയുടെയും മകനാണ് റിയാസ്. ഭാര്യ: അന്‍ഷറ.മക്കള്‍: സിദ്ദാന്‍, ഫദ്വ.സഹോദരങ്ങള്‍: സൗദ, ഹസീന, ജാസ്മിന്‍, സാജിദ, നസീറ, ഹാരിസ്.

അടുത്തകാലത്തായി പ്രവാസികളിലും യുവാക്കളിലും യാതൊരു രോഗലക്ഷണങ്ങളുമില്ലാതെ പെട്ടെന്നുണ്ടാകുന്ന ഹൃദയാഘാത മരണങ്ങള്‍ വര്‍ദ്ധിച്ചുവരുന്നത് വലിയ ആശങ്കയാണ് ഉയര്‍ത്തുന്നത്.

Tags: Kasaragod News, Expat Death Kerala, Masthikundu Choorimoola, Povval News, Sudden Cardiac Arrest Youth, Kasaragod Local News, Kerala News Malayalam, Malayalam News

News Tag Live യുട്യൂബ് ചാനല്‍ Subscribe ചെയ്യുക