പശ്ചിമ ബംഗാള്‍ മുഖ്യമന്ത്രിയുടെ പിഎയെ കൊലപ്പെടുത്തിയത് ബിജെപി പ്രവര്‍ത്തകര്‍; രണ്ട് പേരെ സി.ബി.ഐ അറസ്റ്റ് ചെയ്തു

ന്യൂഡല്‍ഹി: പശ്ചിമ ബംഗാള്‍ മുഖ്യമന്ത്രി സുവേന്ദു അധികാരിയുടെ പേഴ്സണല്‍ അസിസ്റ്റന്റായ ചന്ദ്രനാഥ് റാത്തിന്റെ കൊലപാതകവുമായി ബന്ധപ്പെട്ട കേസില്‍ രണ്ട് ബിജെപി പ്രവര്‍ത്തകരെ സെന്‍ട്രല്‍ ബ്യൂറോ ഓഫ് ഇന്‍വെസ്റ്റിഗേഷന്‍ (CBI) അറസ്റ്റ് ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

അറസ്റ്റിലായ സാഗര്‍ സോങ്കാര്‍, സാഹേബ് സോങ്കാര്‍ എന്നിവര്‍ സഹോദരങ്ങളാണെന്നും ഇരുവരും നേരത്തെ ചന്ദ്രനാഥ് റാത്തിന്റെ സംഘത്തില്‍ പ്രവര്‍ത്തിച്ചിരുന്നവരാണെന്നും സി.ബി.ഐ ഉദ്യോഗസ്ഥര്‍ അറിയിച്ചു.

കൊലപാതകത്തിന് ആവശ്യമായ ഗുണ്ടകളെ ഏര്‍പ്പാടാക്കുക, യാത്രാ-സൗകര്യങ്ങളും മറ്റ് പിന്തുണയും ഒരുക്കുക, ആക്രമണത്തിന് മുമ്പ് സ്ഥലപരിശോധന നടത്തുക എന്നിവ ഉള്‍പ്പെടെയുള്ള ഗൂഢാലോചനയില്‍ ഇരുവര്‍ക്കും പങ്കുണ്ടെന്നാണ് സി.ബി.ഐയുടെ കണ്ടെത്തല്‍.

ഈ കേസില്‍ ഇതിന് മുമ്പ് ഒമ്പത് പേരെ സി.ബി.ഐ അറസ്റ്റ് ചെയ്തിരുന്നു. ഇവരില്‍ ചിലരെ ഉത്തര്‍പ്രദേശിലും ബിഹാറിലും നിന്നാണ് പിടികൂടിയത്.

പ്രാഥമിക അന്വേഷണത്തില്‍, അറസ്റ്റിലായ ഇരുവരും ബിജെപി പ്രവര്‍ത്തകരായിരുന്നുവെന്നും അതേസമയം ഒരു എതിര്‍ രാഷ്ട്രീയ പാര്‍ട്ടിയുമായും ബന്ധം പുലര്‍ത്തിയിരുന്നുവെന്ന വിവരങ്ങള്‍ ലഭിച്ചതായും സി.ബി.ഐ അറിയിച്ചു. ഇതുസംബന്ധിച്ച കൂടുതല്‍ അന്വേഷണം തുടരുകയാണ്.

2026 മേയ് 6-ന് രാത്രി, നോര്‍ത്ത് 24 പര്‍ഗാനാസ് ജില്ലയിലെ മധ്യംഗ്രാമില്‍, എസ്യുവി കാറില്‍ വീട്ടിലേക്ക് മടങ്ങുന്നതിനിടെയാണ് ചന്ദ്രനാഥ് റാത്തിനെ അജ്ഞാതര്‍ വെടിവെച്ച് കൊലപ്പെടുത്തിയത്.

സംഭവം വലിയ രാഷ്ട്രീയ വിവാദങ്ങള്‍ക്ക് വഴിവെച്ചിരുന്നു. കേസിന്റെ വിവിധ വശങ്ങള്‍ കേന്ദ്രീകരിച്ച് സി.ബി.ഐ അന്വേഷണം തുടരുകയാണ്.

CBI arrests 2 BJP workers for murder of Suvendu Adhikari’s PA

News Tag Live യുട്യൂബ് ചാനല്‍ Subscribe ചെയ്യുക