സിനിമാ ലോകത്തെയും ക്രിക്കറ്റ് ലോകത്തെയും ഞെട്ടിച്ച് പ്രണയ വിവാഹം; അനിരുദ്ധും കാവ്യ മാരനും നവംബറില്‍ വിവാഹിതരാകുമെന്ന് തെലങ്കാന മുഖ്യമന്ത്രി!

ചെന്നൈ/ഹൈദരാബാദ്: സൗത്ത് ഇന്ത്യന്‍ സിനിമാ ലോകത്തെ പ്രമുഖ സംഗീതസംവിധായകന്‍ അനിരുദ്ധ് രവിചന്ദറും ഐ.പി.എല്‍ ടീമായ സണ്‍റൈസേഴ്‌സ് ഹൈദരാബാദിന്റെ (SRH) സഹ ഉടമയും സണ്‍ ടിവി നെറ്റ് വര്‍ക്ക് എക്‌സിക്യൂട്ടീവ് ഡയറക്ടറുമായ കാവ്യ മാരനും വിവാഹിതരാകുന്നു. അഭ്യൂഹങ്ങള്‍ക്ക് വിരാമമിട്ട് വിവാഹ വാര്‍ത്ത തെലങ്കാന മുഖ്യമന്ത്രി എ. രേവന്ത് റെഡ്ഡിയാണ് ഔദ്യോഗികമായി സ്ഥിരീകരിച്ചിരിക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

നവംബര്‍ മാസം ഗ്രീസില്‍ വെച്ചായിരിക്കും വിവാഹചടങ്ങുകള്‍ നടക്കുക. തുടര്‍ന്ന് നവംബര്‍ 21-ന് ചെന്നൈയില്‍ വെച്ച് സിനിമാ-രാഷ്ട്രീയ-വ്യവസായ രംഗത്തെ പ്രമുഖര്‍ക്കായി വിപുലമായ വിവാഹസല്‍ക്കാരം (Reception) സംഘടിപ്പിക്കും.

മുഖ്യമന്ത്രിയുടെ ഔദ്യോഗിക സ്ഥിരീകരണം

സണ്‍ ഗ്രൂപ്പ് ചെയര്‍മാന്‍ കലാനിധി മാരനും ഭാര്യ കാവേരി മാരനും ഹൈദരാബാദിലെ ജുബിലി ഹില്‍സിലുള്ള ഔദ്യോഗിക വസതിയിലെത്തി മുഖ്യമന്ത്രി എ. രേവന്ത് റെഡ്ഡിയെ സന്ദര്‍ശിച്ചിരുന്നു. മകളുടെ വിവാഹസല്‍ക്കാരത്തിലേക്ക് മുഖ്യമന്ത്രിയെ നേരില്‍ ക്ഷണിച്ച വിവരം മുഖ്യമന്ത്രിയുടെ ഔദ്യോഗിക എക്‌സ് (X) ഹാന്‍ഡിലൂടെയാണ് പുറത്തുവിട്ടത്.

‘സണ്‍ ഗ്രൂപ്പ് ചെയര്‍മാന്‍ ശ്രീ കലാനിധി മാരനും ഭാര്യ ശ്രീമതി കാവേരി മാരനും ഹൈദരാബാദിലെ ജുബിലി ഹില്‍സിലെ വസതിയില്‍ വെച്ച് മുഖ്യമന്ത്രി ശ്രീ എ. രേവന്ത് റെഡ്ഡിയെ സന്ദര്‍ശിക്കുകയും തങ്ങളുടെ മകള്‍ കാവ്യ മാരന്റെ വിവാഹസല്‍ക്കാരത്തിലേക്ക് അദ്ദേഹത്തെ ക്ഷണിക്കുകയും ചെയ്തു. നവംബര്‍ 21-ന് ചെന്നൈയിലാണ് കാവ്യ മാരന്റെയും അനിരുദ്ധ് രവിചന്ദറിന്റെയും വിവാഹസല്‍ക്കാരം നിശ്ചയിച്ചിരിക്കുന്നത്’ – കുറിപ്പില്‍ വ്യക്തമാക്കുന്നു.

നീണ്ട നാളത്തെ അഭ്യൂഹങ്ങള്‍ക്കൊടുവില്‍

കഴിഞ്ഞ വര്‍ഷം (2025) മുതല്‍ അനിരുദ്ധും കാവ്യ മാരനും പ്രണയത്തിലാണെന്നും വിവാഹത്തെക്കുറിച്ച് ആലോചിക്കുന്നുണ്ടെന്നുമുള്ള തരത്തില്‍ റെഡ്ഡിറ്റ് അടക്കമുള്ള സമൂഹമാധ്യമങ്ങളില്‍ വാര്‍ത്തകള്‍ പ്രചരിച്ചിരുന്നു. എന്നാല്‍ അക്കാലത്ത് ഈ വാര്‍ത്തകളെ ചിരിച്ചുതള്ളിയ അനിരുദ്ധ്, ‘വിവാഹമോ? ഹാ ഹാ… ഗയ്‌സ്, ദയവായി ഇത്തരം വ്യാജ വാര്‍ത്തകള്‍ പ്രചരിപ്പിക്കുന്നത് നിര്‍ത്തൂ’ എന്ന് പ്രതികരിച്ചിരുന്നു.

എന്നാല്‍ അടുത്തിടെ അനിരുദ്ധ് രവിചന്ദറിന്റെ അമ്മാവനും മുതിര്‍ന്ന നടനുമായ വൈ.ജി. മഹേന്ദ്രന്‍ ഒരു മാധ്യമത്തിന് നല്‍കിയ അഭിമുഖത്തില്‍ വിവാഹ വാര്‍ത്ത ശരിയാണെന്ന തരത്തില്‍ സൂചന നല്‍കിയിരുന്നു. ‘ആ കുട്ടി വളരെ നല്ലൊരു വ്യക്തിയാണ്. അവരുടെ വിവാഹം തീര്‍ച്ചയായും നടക്കാന്‍ പോവുകയാണ്’ എന്നായിരുന്നു അദ്ദേഹം പ്രതികരിച്ചത്.

രജനീകാന്ത് ചിത്രങ്ങളായ ജയിലര്‍, വേട്ടയ്യന്‍, വിജയ്യുടെ ലിയോ, കരിയറിലെ മറ്റു വന്‍കിട പ്രോജക്റ്റുകളിലൂടെയും തെന്നിന്ത്യന്‍ സംഗീത ലോകത്തെ കിരീടംവെക്കാത്ത രാജാവായി വാഴുന്ന അനിരുദ്ധും, ഐ.പി.എല്‍ ക്രിക്കറ്റിലെ സണ്‍റൈസേഴ്‌സ് ഹൈദരാബാദിന്റെ ഗ്ലാമറസ് സാന്നിധ്യവുമായ കാവ്യ മാരനും ഒന്നിക്കുന്ന വാര്‍ത്ത ഇതിനോടകം തന്നെ ആരാധകര്‍ക്കിടയില്‍ വന്‍ ആവേശമായി മാറിയിട്ടുണ്ട്.

Tags: Anirudh Ravichander Marriage, Kavya Maran Wedding, Anirudh Kavya Maran November 2026, Telangana CM Revanth Reddy, Sunrisers Hyderabad Owner Kavya Maran, Entertainment News Malayalam, South Indian Cinema Malayalam

News Tag Live യുട്യൂബ് ചാനല്‍ Subscribe ചെയ്യുക