ഇനി ട്രെയ്‌നില്‍ തനിയെ യാത്ര ചെയ്യാം; പേടിയില്ലാതെ

Kerala Police has launched ‘Rail Maithri’ through the Pol-App ട്രെയിന്‍ യാത്രക്കാരുടെ സുരക്ഷ ഉറപ്പാക്കാന്‍ കേരള പോലീസ് റെയില്‍വേ പോലീസുമായി സഹകരിച്ച് സംയുക്ത പദ്ധതി തയ്യാറാക്കി. യാത്രക്കാര്‍ക്ക് 24 മണിക്കൂറും സുരക്ഷ ഉറപ്പാക്കുന്ന’റെയില്‍ മൈത്രി’ (Rail Maithri) പദ്ധതി മുഖ്യമന്ത്രി പിണറായി വിജയന്‍ ഉദ്ഘാടനം ചെയ്തു. കേരള റെയില്‍വേ പൊലിസിന്റെ പ്രത്യേക സേവനങ്ങളെ കേരള പൊലിസിന്റെ ഔദ്യോഗിക മൊബൈല്‍ ആപ്ലിക്കേഷനായ ‘പോല്‍ ആപ്പുമായി’ (Pol-App) ബന്ധിപ്പിച്ചാണ് ഈ സംവിധാനം പ്രവര്‍ത്തിക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

‘റെയില്‍ മൈത്രി’ നല്‍കുന്ന 5 പ്രധാന സേവനങ്ങള്‍

ഒറ്റയ്ക്കുള്ള യാത്രക്കാര്‍ക്ക് സുരക്ഷ: തനിച്ച് യാത്ര ചെയ്യുന്ന സ്ത്രീകള്‍ക്കും വയോധികര്‍ക്കും സഹായം അഭ്യര്‍ത്ഥിച്ചാല്‍ റെയില്‍വേ പൊലിസ് കണ്‍ട്രോള്‍ റൂമില്‍ നിന്നുള്ള ഉദ്യോഗസ്ഥര്‍ നേരിട്ടെത്തും.

പ്ലാറ്റ്ഫോം സേവനം: പ്ലാറ്റ്ഫോമുകളില്‍ ഉണ്ടാകുന്ന സുരക്ഷാ പ്രശ്നങ്ങളില്‍ പെട്ടെന്ന് ഇടപെടാന്‍ സാധിക്കും.

രഹസ്യവിവര കൈമാറ്റം: ട്രെയിനിലോ പരിസരത്തോ നടക്കുന്ന നിയമവിരുദ്ധ പ്രവര്‍ത്തനങ്ങളെക്കുറിച്ച് പൊലിസിന് രഹസ്യമായി വിവരം നല്‍കാം.

നഷ്ടപ്പെട്ട സാധനങ്ങള്‍: യാത്രയ്ക്കിടെ സാധനങ്ങള്‍ നഷ്ടപ്പെട്ടാല്‍ ആപ്പ് വഴി പരാതി നല്‍കാനും അവ കണ്ടെത്താനും സഹായം ലഭിക്കും.

ക്രമസമാധാന പാലനം: ട്രെയിനിലെ ഏതെങ്കിലും തരത്തിലുള്ള അതിക്രമങ്ങളോ ബുദ്ധിമുട്ടുകളോ ഉടന്‍ പൊലിസിനെ അറിയിക്കാം.

പോല്‍ ആപ്പിലെ ‘റെയില്‍ മൈത്രി’ സേവനം എങ്ങനെ ഉപയോഗിക്കാം?

ട്രെയിന്‍ യാത്രക്കാര്‍ക്ക് അടിയന്തര സഹായത്തിനും സുരക്ഷയ്ക്കുമായി കേരള പൊലിസ് ഒരുക്കിയിരിക്കുന്ന ഈ സേവനം താഴെ പറയുന്ന ഘട്ടങ്ങളിലൂടെ ഉപയോഗിക്കാം:

ആപ്പ് ഇന്‍സ്റ്റാള്‍ ചെയ്യുക: നിങ്ങളുടെ ഫോണിലെ പ്ലേ സ്റ്റോറില്‍ (Play Store) നിന്നോ ആപ്പ് സ്റ്റോറില്‍ (App Store) നിന്നോ Pol-App (Kerala Police) എന്ന് സെര്‍ച്ച് ചെയ്ത് ഇന്‍സ്റ്റാള്‍ ചെയ്യുക.

രജിസ്റ്റര്‍ ചെയ്യുക: ആപ്പ് തുറന്ന് നിങ്ങളുടെ പേരും മൊബൈല്‍ നമ്പറും നല്‍കി രജിസ്റ്റര്‍ ചെയ്യുക.

റെയില്‍ മൈത്രി തിരഞ്ഞെടുക്കുക: ആപ്പിന്റെ ഹോം പേജില്‍ സേവനങ്ങളുടെ ലിസ്റ്റ് കാണാം. അതില്‍ ‘Rail Maithri’ എന്ന ഐക്കണില്‍ ക്ലിക്ക് ചെയ്യുക.

സേവനം തിരഞ്ഞെടുക്കുക: ഇതില്‍ താഴെ പറയുന്നവയ്ക്കായി പ്രത്യേക ഓപ്ഷനുകള്‍ ലഭ്യമാണ്:

ഒറ്റയ്ക്കുള്ള യാത്ര (Travel Alone): സ്ത്രീകള്‍ക്കും വയോധികര്‍ക്കും ഈ ഓപ്ഷന്‍ വഴി സുരക്ഷ ആവശ്യപ്പെടാം.

വിവരങ്ങള്‍ നല്‍കാന്‍ (Report Incident): ട്രെയിനിലെ കുറ്റകൃത്യങ്ങളോ ക്രമസമാധാന പ്രശ്നങ്ങളോ അറിയിക്കാം.

സാധനങ്ങള്‍ നഷ്ടപ്പെട്ടാല്‍ (Lost Report): ലഗേജുകളോ മറ്റ് രേഖകളോ നഷ്ടപ്പെട്ടാല്‍ ആപ്പ് വഴി പരാതിപ്പെടാം.

വിവരങ്ങള്‍ നല്‍കുക: നിങ്ങളുടെ ട്രെയിന്‍ നമ്പര്‍, സീറ്റ് നമ്പര്‍, നിലവിലെ സ്റ്റേഷന്‍ തുടങ്ങിയ വിവരങ്ങള്‍ നല്‍കിയാല്‍ ഉടന്‍ തന്നെ പൊലിസ് കണ്‍ട്രോള്‍ റൂമില്‍ നിന്ന് സഹായമെത്തും.

പ്രത്യേകം ശ്രദ്ധിക്കുക

യാത്ര തുടങ്ങുന്നതിന് മുന്‍പേ തന്നെ ആപ്പ് ഇന്‍സ്റ്റാള്‍ ചെയ്ത് ലോഗിന്‍ ചെയ്തു വക്കുന്നത് അടിയന്തര ഘട്ടങ്ങളില്‍ സമയം ലാഭിക്കാന്‍ സഹായിക്കും.

ഇന്റര്‍നെറ്റ് സൗകര്യം ഇല്ലാത്തവര്‍ക്ക് കേരള പൊലിസിന്റെ എമര്‍ജന്‍സി നമ്പറായ 112ലും ബന്ധപ്പെടാവുന്നതാണ്.