എന്തൊരു വിജയം ആണിത്? തെലുങ്കിലും പണംവാരി മഞ്ഞുമ്മൽ ബോയ്സ്

സമീപ കാലത്ത് മലയാള സിനിമയുടെ തലവര മാറ്റിയ മാസമാണ് കടന്നുപോയത്. ചെറുതും വലുതും നാല് ചിത്രങ്ങൾ കണ്ടന്റ് കൊണ്ടും കളക്ഷൻ റെക്കോർഡുകൾ കൊണ്ടും മലയാളത്തിന്റെ അഭിമാനം രാജ്യമൊട്ടാകെ വ്യാപിപ്പിച്ച സമയം കൂടിയാണ് ഇത്. അതിൽ മുൻനിരയിൽ ഉണ്ടായിരുന്ന ചിത്രമാണ് മഞ്ഞുമ്മൽ ബോയ്‌സ്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

റിലീസ് ദിവസം മുതൽ ബോക്സ് ഓഫീസിൽ കളക്ഷൻ തകർത്ത മുന്നേറുകയാണ് ചിത്രം. മലയാളത്തിൽ ഹിറ്റടിച്ചതിന് പിന്നാലെ തമിഴിലും കളക്ഷനുകളിൽ മുന്നിലാണ് മഞ്ഞുമ്മൽ ബോയ്സ്. റിലീസ് ചെയ്ത് 40ാം ദിനത്തിലും ഗംഭീര നേട്ടമാണ് ചിത്രത്തിന്. ഇപ്പോഴിതാ തെലുങ്കിലും ചിത്രം മികച്ച അഭിപ്രായം നേടുകയാണ്. റിലീസ് ചെയ്ത് ആദ്യദിവസം തന്നെ 1.65 കോടിയാണ് തെലുങ്ക് പതിപ്പിന്റെ കളക്ഷന്‍.

തെലുങ്കില്‍ ചിത്രം കളക്ഷന്‍ റെക്കോഡുകള്‍ ഇടുമെന്നാണ് പ്രതീക്ഷ. പ്രേമലുവിനു പിന്നാലെയാണ് തെലുങ്കിലെ ഈ നേട്ടം. തെലുങ്കിലെ മുന്‍നിര പ്രൊഡക്ഷന്‍ കമ്പനികളിലൊന്നായ മൈത്രി മൂവി മേക്കേഴ്‌സാണ് തെലുങ്ക് പതിപ്പ് തിയേറ്ററുകളിലെത്തിച്ചത്.

അതേസമയം ചിത്രം തമിഴ്‌നാട്ടില്‍ നിന്ന് മാത്രം 64 കോടി ഇതിനോടകം നേടി. മലയാളസിനിമ തമിഴ്‌നാട്ടില്‍ നിന്ന് നേടുന്ന ഏറ്റവുമുയര്‍ന്ന കളക്ഷനാണിത്. മലയാളത്തിൽ നിന്ന് 220 കോടിയിലധികം ഇതിനോടകം കളക്ട് ചെയ്തു ചിത്രം. ചിദംബരം സംവിധാനം ചെയ്ത മഞ്ഞുമ്മല്‍ ബോയ്‌സ് യഥാര്‍ത്ഥ സംഭവത്തെ ആസ്പദമാക്കിയുള്ളതാണ്.

ശ്രീനാഥ് ഭാസി, സൗബിന്‍ ഷാഹിര്‍, ബാലു വര്‍ഗീസ്, ജീന്‍ പോള്‍ ലാല്‍, ഗണപതി എന്നിവരാണ് ചിത്രത്തിലെ പ്രധാന താരങ്ങള്‍.