റെയില്‍വേ ടിക്കറ്റ് ബുക്കിംഗ് ഇനി സൂപ്പര്‍ ഫാസ്റ്റാകും; ഇഷ്ടമുള്ള സീറ്റ് തിരഞ്ഞെടുക്കാം; നവീകരിച്ച ഐ.ആര്‍.സി.ടി.സി വെബ്‌സൈറ്റ് അടുത്ത മാസം

ഐ.ആർ.സി.ടി.സി (IRCTC) വെബ്‌സൈറ്റ് പൂർണ്ണമായും നവീകരിച്ച് അടുത്ത മാസം പകുതിയോടെ പുതിയ പതിപ്പ് പുറത്തിറക്കുമെന്ന് റെയിൽവേ മന്ത്രി അശ്വിനി വൈഷ്ണവ് പ്രഖ്യാപിച്ചു. ജയ്പൂരിലെ മാളവ്യ നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (MNIT) വിദ്യാർത്ഥികളുമായി നടത്തിയ സംവാദത്തിനിടയിലാണ് മന്ത്രി ഈ സുപ്രധാന വിവരം പങ്കുവെച്ചത്.  ജൂലൈ 15-ഓടെ പുതിയ വെബ്‌സൈറ്റ് പൊതുജനങ്ങൾക്ക് ലഭ്യമാകുമെന്നും അദ്ദേഹം വ്യക്തമാക്കി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

നിലവിലുള്ളതിനേക്കാൾ വേഗതയേറിയതും ആധുനികവുമായ ഫീച്ചറുകളോടെയാണ് പുതിയ വെബ്‌സൈറ്റ് വരുന്നത്. ഇത് യാത്രക്കാർക്ക് ടിക്കറ്റ് ബുക്കിംഗ് കൂടുതൽ എളുപ്പമാക്കുമെന്ന് മുതിർന്ന റെയിൽവേ ഉദ്യോഗസ്ഥൻ വ്യക്തമാക്കി.

40 വർഷം പഴക്കമുള്ള റിസർവേഷൻ സംവിധാനം മാറുന്നു

കഴിഞ്ഞ മേയ് മാസത്തിൽ, തങ്ങളുടെ 40 വർഷം പഴക്കമുള്ള പാസഞ്ചർ റിസർവേഷൻ സിസ്റ്റം (PRS) മാറ്റി പകരം അത്യാധുനിക പ്ലാറ്റ്‌ഫോം ഓഗസ്റ്റ് മുതൽ നടപ്പിലാക്കുമെന്ന് റെയിൽവേ മന്ത്രാലയം അറിയിച്ചിരുന്നു. 2002-ലാണ് ഇന്ത്യൻ റെയിൽവേ ഓൺലൈൻ ടിക്കറ്റ് ബുക്കിംഗ് ആരംഭിക്കുന്നത്. നിലവിൽ രാജ്യത്തെ മൊത്തം ട്രെയിൻ ടിക്കറ്റുകളുടെ 88 ശതമാനവും ഓൺലൈൻ വഴിയാണ് ബുക്ക് ചെയ്യുന്നത്.

പുതിയ പി.ആർ.എസ് (PRS) സംവിധാനം നിലവിൽ വരുന്നതോടെ ടിക്കറ്റ് ബുക്കിംഗ് ശേഷി വൻതോതിൽ വർദ്ധിക്കും. മിനിറ്റിൽ 1.5 ലക്ഷത്തിലധികം ടിക്കറ്റുകൾ വരെ ബുക്ക് ചെയ്യാൻ പുതിയ സംവിധാനത്തിലൂടെ സാധിക്കും. നിലവിത് ഇത് മിനിറ്റിൽ 32,000 ടിക്കറ്റുകൾ മാത്രമാണ്. അതായത് ബുക്കിംഗ് ശേഷിയിൽ 5 ഇരട്ടി വർദ്ധനവ് ഉണ്ടാകും.

അതുപോലെ തന്നെ ടിക്കറ്റ് അന്വേഷണങ്ങളുടെ (Enquiries) ശേഷി മിനിറ്റിൽ 4 ലക്ഷത്തിൽ നിന്നും 40 ലക്ഷത്തിലധികമായി ഉയരും. ഇതിൽ 10 ഇരട്ടി വർദ്ധനവാണ് രേഖപ്പെടുത്തുന്നത്.

പുതിയ പി.ആർ.എസ് (PRS) സംവിധാനം: പ്രധാന മാറ്റങ്ങൾ ഒറ്റനോട്ടത്തിൽ

പുതിയ വെബ്‌സൈറ്റിന്റെ പ്രധാന സവിശേഷതകൾ:

• ബഹുഭാഷാ ഇൻഫർമേഷൻ (Multilingual Interface): പ്രാദേശിക ഭാഷകൾ ഉൾപ്പെടെയുള്ള ഒന്നിലധികം ഭാഷകളിൽ എളുപ്പത്തിൽ ടിക്കറ്റ് ബുക്ക് ചെയ്യാനും വിവരങ്ങൾ തിരയാനും സാധിക്കും.

• സീറ്റ് തിരഞ്ഞെടുപ്പ് (Seat Choice): ടിക്കറ്റ് ബുക്ക് ചെയ്യുന്ന സമയത്ത് തന്നെ യാത്രക്കാർക്ക് തങ്ങളുടെ താല്പര്യപ്രകാരമുള്ള സീറ്റുകൾ മുൻഗണനാക്രമത്തിൽ രേഖപ്പെടുത്താം.

• ഫെയർ കലണ്ടർ (Fare Calendar): വിവിധ ദിവസങ്ങളിലെ ടിക്കറ്റ് നിരക്കുകൾ ഒന്നിച്ച് കണ്ട് യാത്ര കൃത്യമായി പ്ലാൻ ചെയ്യാൻ സഹായിക്കുന്ന ‘ഫെയർ കലണ്ടർ’ വെബ്‌സൈറ്റിൽ ലഭ്യമാകും.

• പ്രത്യേക വിഭാഗങ്ങൾക്കുള്ള ആനുകൂല്യങ്ങൾ: ഭിന്നശേഷിക്കാർ (Divyangjan), വിദ്യാർത്ഥികൾ, രോഗികൾ തുടങ്ങിയവർക്കുള്ള എല്ലാ ബുക്കിംഗ് ആനുകൂല്യങ്ങളും ഇനി ഒരൊറ്റ പ്ലാറ്റ്‌ഫോമിൽ സംയോജിപ്പിക്കും.

വരുന്നു ‘റെയിൽ വൺ’ (RailOne) സൂപ്പർ ആപ്പ്

കഴിഞ്ഞ വർഷം ഇന്ത്യൻ റെയിൽവേ ‘റെയിൽ വൺ’ എന്ന പേരിൽ ഒരു മൊബൈൽ ആപ്ലിക്കേഷൻ പുറത്തിറക്കിയിരുന്നു. റെയിൽവേയുടെ ‘സൂപ്പർ ആപ്പ്’ എന്ന് വിളിക്കപ്പെടുന്ന ഇതിൽ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയാണ് ഉപയോഗിച്ചിരിക്കുന്നത്. ഇതിലൂടെ വെയ്റ്റ്‌ലിസ്റ്റ് (Waitlist) ടിക്കറ്റുകൾ കൺഫേം ആകാനുള്ള സാധ്യത എത്രത്തോളമുണ്ടെന്ന് കൃത്യമായി പ്രവചിക്കാൻ സാധിക്കും. യാത്രക്കാർക്ക് റെയിൽവേയുടെ വിവിധ സേവനങ്ങൾ ഒരൊറ്റ ആപ്പിലൂടെ ലഭ്യമാക്കാൻ ഇത് സഹായിക്കുന്നുണ്ട്.

New IRCTC website to be launched by July 15