ആർഎസ്എസ് പ്രാന്തപ്രചാരകരുടെ വാർഷികയോ​ഗം റാഞ്ചിയിൽ; മോഹൻ ഭാഗവത് പങ്കെടുക്കും

ആർഎസ്എസ് പ്രാന്ത പ്രചാരകരുടെ വാർഷികയോ​ഗം ജൂലൈ പന്ത്രണ്ടിന് ജാർഖണ്ഡിലെ റാഞ്ചിയിൽ. ആർഎസ്എസ് മേധാവി മോഹൻ ഭാ​ഗവത് മുഖ്യാതിഥിയായിരിക്കും. മൂന്ന് ദിവസങ്ങളിലായി നടക്കുന്ന സമ്മേളനത്തിൽ മെയ്-ജൂൺ മാസങ്ങളിലായി നടത്തിയ ആർഎസ്എസ് പരിശീലന ക്യാംപുകളുടെ വിലയിരുത്തൽ റിപോർട്ടുകൾ പ്രാന്ത് പ്രചാരകർ അവതരിപ്പിക്കുമെന്ന് ആർഎസ്എസ് ദേശീയ വക്താവ് സുനിൽ അമ്പേകർ പ്രസ്താവനയിൽ അറിയിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ആർഎസ്എസിന്റെ വരുംവർഷത്തെ പദ്ധതികൾ അടക്കമുള്ള വിഷയങ്ങൾ സമ്മേളനത്തിൽ ചർച്ചയാവും. സർസംഘ്ചാലക് മോഹൻ ഭാ​ഗവതിന്റെ 2024-25 വർഷത്തെ യാത്രാപദ്ധതികളും ആർഎസ്എസിന്റെ നൂറാംവാർഷിക പദ്ധതികളും സമ്മേളനം ചർച്ച ചെയ്യുമെന്ന് പ്രസ്താവനയിൽ പറയുന്നു.

ജനറൽ സെക്രട്ടറി ദത്താത്രേയ ഹോസാബേൽ, ജോയിന്റ് സെക്രട്ടറിമാരായ കൃഷ്ണ ​ഗോപാൽ, സി ആർ മുകുന്ദ, ആർഎസ്എസിന്റെ ബിജെപിയിലെ കോഓഡിനേറ്റർ അരുൺ കുമാർ, എക്സിക്യൂട്ടിവ് അം​ഗങ്ങളായ രാം ദത്ത്, അലോക് കുമാർ, അതുൽ ലിമായി തുടങ്ങിയവരും സമ്മേളനത്തിൽ പങ്കെടുക്കുമെന്ന് സുനിൽ അമ്പേകർ കൂട്ടിച്ചേർത്തു. 46 പ്രവിശ്യകൾ ആണ് ആർഎസ്എസിനുള്ളതെന്നും രാജ്യത്തുടനീളമുള്ള എല്ലാ പ്രാന്ത പ്രചാരകരും യോ​ഗത്തിൽ പങ്കെടുക്കുമെന്നും അദ്ദേഹം പറഞ്ഞു.