കുരങ്ങുകൾ ഓടിച്ചു; ടെറസിൽ നിന്ന് വീണ് അഞ്ചുവയസ്സുകാരൻ മരിച്ചു

കുരങ്ങുകൾ പിന്തുടർന്നതിനെ തുടർന്ന് ഓടിയ അഞ്ചുവയസ്സുകാരൻ വീടിന്റെ മേൽക്കൂരയിൽ നിന്നു വീണുമരിച്ചു. യുപിയിലെ ജ​ഗത്ത് ​ഗ്രാമത്തിലാണ് സംഭവം. നിഖിൽ എന്ന ബാലനാണ് മരിച്ചത്. വീടിന്റെ മുകളിൽ നിന്നു വീണതിനെ തുടർന്ന് പരിക്കേറ്റ കുട്ടിയെ ഉടൻ ആശുപത്രിയിലെത്തിച്ചെങ്കിലും മരിക്കുകയായിരുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

വീടിന്റെ മുകളിൽ കളിച്ചുകൊണ്ടുനിൽക്കെ കുട്ടിയെ കുരങ്ങൻമാർ ഓടിക്കുകയായിരുന്നുവെന്ന് നിഖിലിന്റെ പിതാവ് പറഞ്ഞു. വീടിന്റെ മുകളിൽ നിന്ന് താഴേക്ക് വീണതിനെ തുടർന്ന് കുട്ടി അബോധാവസ്ഥയിലായി. ആന്തരികാവയവങ്ങൾക്കേറ്റ പരിക്കാണ് മരണകാരണമായത്. 

ഏതാനും മാസങ്ങൾക്കിടെ മൂന്നുപേരാണ് കുരങ്ങുകളുടെ ആക്രമണത്തിൽ യുപിയിൽ കൊല്ലപ്പെട്ടത്. ആ​ഗസ്ത് 31ന് കുരങ്ങുകൾ ആക്രമിച്ചതിനെ തുടർന്ന് 52കാരൻ മരിച്ചിരുന്നു. ജൂലൈയിൽ കുരങ്ങുകളുടെ ആക്രമണത്തിൽ നിന്ന് രക്ഷപ്പെടുന്നതിനിടെ 35കാരി വീടിന്റെ മേൽക്കൂരയിൽ നിന്ന് താഴേക്ക് വീണും മരിച്ചു.