ലൂസിഫറിനെ കടത്തിവെട്ടി; നാലുദിവസം കൊണ്ട് ആടുജീവിതം 50 കോടി പിന്നിട്ടു

കൊച്ചി: സർവകാല റെക്കോഡിലേക്ക് പൃഥ്വിരാജ് നായകനായ ആടുജീവിതം. സിനിമ നാലുദിവസം കൊണ്ട് 50 കോടി പിന്നിട്ടു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സിനിമ ആഗോളതലത്തില്‍ ആകെ 50 കോടി രൂപയില്‍ അധികം നേടിയത് സ്ഥീരികരിച്ച് ചിത്രത്തിന്റെ പോസ്റ്റര്‍ പൃഥ്വിരാജ് പുറത്തുവിട്ടു. ആടുജീവിതം റിലീസായി വെറും നാല് ദിവസത്തിലാണ് പൃഥ്വിരാജിന്റെ നേട്ടം.

വേഗത്തില്‍ മലയാളത്തില്‍ നിന്ന് 50 കോടി ക്ലബിലെത്തി എന്ന റെക്കോര്‍ഡ് ചിത്രം ആടുജീവിതത്തിന്റെ പേരിലായി. സംവിധായകനായി പൃഥ്വിരാജ് അരങ്ങേറിയ മോഹൻലാല്‍ ചിത്രം ലൂസിഫറിന്റെ പേരിലായിരുന്നു നേരത്തേ ഈ റെക്കോഡ്. ലൂസിഫറും വെറും നാല് ദിവസത്തിലായിരുന്നു 50 കോടി ക്ലബില്‍ എത്തിയത്. എന്നാല്‍ പൃഥ്വിരാജിന്റെ ആടുജീവിതം അഡ്വാൻസ് ടിക്കറ്റ് വില്‍പനയുടെ കണക്കുകള്‍ വ്യക്തമായപ്പോഴേ 50 കോടി ക്ലബില്‍ എത്തിയിരുന്നു.

റിലീസിനേ മികച്ച അഭിപ്രായമുണ്ടാക്കാൻ പൃഥ്വിരാജ് ചിത്രം ആടുജിവിതത്തിന് കഴിഞ്ഞിരുന്നു എന്നാണ് റിപ്പോര്‍ട്ട്. ആടുജീവിതം ആഗോളതലത്തില്‍ റിലീസിന് 16.7 കോടി രൂപയാണ് നേടിയിരിക്കുന്നതെന്ന് കളക്ഷൻ റിപ്പോര്‍ട്ടില്‍ നിന്ന് വ്യക്തമായിരുന്നു. പൃഥ്വിരാജിന്റെ എക്കാലത്തെയും മികച്ച ഓപ്പണിംഗ് കളക്ഷൻ ആടുജീവിതം നേടിയിരിക്കുകയാണ്. പൃഥ്വിരാജിന്റെ ആടുജീവിതം നേടിയ ഓപ്പണിംഗ് കളക്ഷനേക്കാള്‍ 2024ല്‍ പ്രദര്‍ശനത്തിന് എത്തിയ തെന്നിന്ത്യൻ ചിത്രങ്ങളില്‍ ഗുണ്ടുര്‍ കാരത്തിനും ഹനുമാനുമേ ലഭിച്ചുള്ളൂ.

കേരളത്തില്‍ നിന്ന് മാത്രം 5.83 കോടിയാണ് ആടുജീവിതം നേടിയതെന്നാണ് ബോക്സ് ഓഫീസ് റിപ്പോര്‍ട്ടുകള്‍ ചൂണ്ടിക്കാട്ടുന്നത്. 2024ലെ മലയാളത്തിന്റെ കേരള റിലീസ് കളക്ഷൻ കണക്കിലെടുത്താൻ നിലവില്‍ മോഹൻലാല്‍ ചിത്രം മലൈക്കോട്ടൈ വാലിബനാണ് ഒന്നാമത്. കേരള ബോക്സ് ഓഫീസില്‍ 5.85 കോടി നേടിയാണ് മലൈക്കോട്ടൈ വാലിബൻ ഒന്നാമതെത്തിയത്. കേരളത്തില്‍ നിന്ന് റിലീസിന് 3.35 കോടി നേടിയ മഞ്ഞുമ്മല്‍ ബോയ്‍സ് മൂന്നാം സ്ഥാനത്തേയ്‍ക്ക് പിന്തള്ളപ്പെട്ടു.