02
Feb 2026
Mon
Files expose alleged links between Epstein, Anil Ambani and Modi അമേരിക്കന് സാമ്പത്തിക-ലൈംഗിക കുറ്റവാളിയായിരുന്ന ജെഫ്രി എപ്സ്റ്റീന്റെ പിടിച്ചെടുത്ത ഉപകരണങ്ങളില് നിന്നുള്ള സന്ദേശങ്ങള് ഇന്ത്യന് രാഷ്ട്രീയത്തിലും ബിസിനസ്സ് ലോകത്തും വലിയ ചര്ച്ചകള്ക്ക് വഴിവെക്കുന്നു. 2017 മുതല് 2019 വരെയുള്ള കാലയളവില് വ്യവസായി അനില് അംബാനി എപ്സ്റ്റീനുമായി നിരന്തരമായി ആശയവിനിമയം നടത്തിയിരുന്നുവെന്നാണ് പുതിയ റിപ്പോര്ട്ടുകള് സൂചിപ്പിക്കുന്നത്. പ്രധാനമന്ത്രി നരേന്ദ്ര മോദിയുടെ നയതന്ത്ര സന്ദര്ശനങ്ങളും അമേരിക്കന് രാഷ്ട്രീയ നേതൃത്വവുമായുള്ള കൂടിക്കാഴ്ചകളും സുഗമമാക്കാന് അംബാനി എപ്സ്റ്റീന്റെ സഹായം തേടിയതായാണ് സന്ദേശങ്ങള് വ്യക്തമാക്കുന്നത്.
 |
|
പ്രധാന വെളിപ്പെടുത്തലുകള്
2019-ലെ നിര്ണായക കൂടിക്കാഴ്ച: 2019 മെയ് 23-ന് (ഇന്ത്യയിലെ തിരഞ്ഞെടുപ്പ് ഫലം വന്ന ദിവസം) അനില് അംബാനി ന്യൂയോര്ക്കിലെ എപ്സ്റ്റീന്റെ വസതിയിലെത്തിയതായി രേഖകള് സൂചിപ്പിക്കുന്നു. പ്രധാനമന്ത്രി മോദിയുടെ ഒരു പ്രതിനിധി (‘His guy’) തന്നെ കാണാന് വരുന്നുണ്ടെന്ന് എപ്സ്റ്റീന് റിപബ്ലിക്കന് സ്ട്രാറ്റജിസ്റ്റ് സ്റ്റീവ് ബാനന് സന്ദേശമയച്ചിരുന്നു. ഈ പ്രതിനിധി അംബാനി തന്നെയാണോ അതോ മറ്റൊരാളാണോ എന്ന കാര്യത്തില് ഔദ്യോഗിക സ്ഥിരീകരണമില്ല.
‘മോദി ഓണ് ബോര്ഡ്’: കൂടിക്കാഴ്ചയ്ക്ക് ശേഷം പ്രധാനമന്ത്രി മോദി തങ്ങളുടെ കാഴ്ചപ്പാടുകളോട് യോജിക്കുന്നുവെന്നും (‘Modi on board’), ചൈനയെ പ്രതിരോധിക്കുന്ന കാര്യത്തില് മോദിയും സ്റ്റീവ് ബാനനും തമ്മില് കൂടിക്കാഴ്ച നടത്തണമെന്നും എപ്സ്റ്റീന് നിര്ദ്ദേശിച്ചിരുന്നു.
നയതന്ത്ര സഹായം: 2017-ല് പ്രധാനമന്ത്രിയുടെ അമേരിക്കന് സന്ദര്ശനത്തിന് മുന്നോടിയായി ട്രംപിന്റെ മരുമകന് ജാരെദ് കുഷ്നര്, സ്റ്റീവ് ബാനന് എന്നിവരെ കാണാന് അംബാനി സഹായം തേടി. ഇതിന് പകരമായി എന്ത് നല്കുമെന്ന് എപ്സ്റ്റീന് ചോദിച്ചപ്പോള് ‘ഇന്ത്യന് വിപണിയില് എന്തുവേണമെങ്കിലും’ എന്ന് അംബാനി മറുപടി നല്കിയതായും സന്ദേശങ്ങളില് കാണുന്നു.
ഇസ്രായേല് സന്ദര്ശനം: തന്റെ ഉപദേശം സ്വീകരിച്ച്, മോദി അമേരിക്കന് പ്രസിഡന്റ് ഡോണള്ഡ് ട്രംപിനുവേണ്ടി 2017ല് ഇസ്രയേല് സന്ദര്ശിച്ചുവെന്നും അത് ഗുണം ചെയ്തുവെന്നുമാണ് എപ്സ്റ്റീന്റേതായി പുറത്തുവന്ന മെയിലില് പറയുന്നത്. എന്നാല് സന്ദര്ശനത്തിന്റെ പിന്നിലെ കാര്യങ്ങളോ എന്ത് ഗുണം ലഭിച്ചുവെന്നത് സംബന്ധിച്ചോ മെയിലില് പരാമര്ശമില്ല.
എപ്സ്റ്റീനുമായി ബന്ധപ്പെട്ട് യുഎസ് നീതിന്യായ വകുപ്പ് പുറത്തുവിട്ട ഫയലുകളിലാണ് മോദിയുടെ പേര് പരാമര്ശിക്കുന്നത്. എപ്സ്റ്റീന് അദ്ദേഹത്തിന്റെ ഒരു ഇ മെയിലില് മോദിയുടെ പേര് പറയുന്നുണ്ട്.
ആരോപണം തള്ളി വിദേശകാര്യ മന്ത്രാലയം
2017 ജൂലൈയില് പ്രധാനമന്ത്രി മോദി ഇസ്രായേല് സന്ദര്ശിച്ചപ്പോള് അദ്ദേഹം എപ്സ്റ്റീന്റെ ഉപദേശങ്ങള് സ്വീകരിച്ചിരുന്നുവെന്ന ആരോപണം വിദേശകാര്യ മന്ത്രാലയം ശക്തമായി നിഷേധിച്ചു. ഇത് ഒരു ക്രിമിനലിന്റെ ജല്പ്പനങ്ങള് മാത്രമാണെന്നാണ് മന്ത്രാലയത്തിന്റെ നിലപാട്.
രാഷ്ട്രീയ പ്രത്യാഘാതങ്ങള്
ഈ വെളിപ്പെടുത്തലുകള് പുറത്തുവന്നതോടെ കേന്ദ്ര സര്ക്കാരിനെതിരെ പ്രതിപക്ഷം രൂക്ഷമായ വിമര്ശനവുമായി രംഗത്തെത്തി. അനില് അംബാനിയെപ്പോലൊരു വ്യവസായിയും ലൈംഗിക കുറ്റവാളിയായ എപ്സ്റ്റീനും ചേര്ന്ന് ഇന്ത്യയുടെ നയതന്ത്ര കാര്യങ്ങളില് ഇടപെട്ടത് ഗൗരവകരമാണെന്ന് കോണ്ഗ്രസ് ആരോപിച്ചു. പ്രധാനമന്ത്രി നരേന്ദ്ര മോദി ഇക്കാര്യത്തില് മറുപടി നല്കണമെന്ന് കോണ്ഗ്രസ് നേതാവ് കെ.സി. വേണുഗോപാല് ആവശ്യപ്പെട്ടു.
ജെഫ്രി എപ്സ്റ്റീനുമായി ബന്ധപ്പെട്ട് പുറത്തുവന്ന പുതിയ ഫയലുകളില് പ്രധാനമന്ത്രി നരേന്ദ്രമോദിയുടെ പേര് ഉള്പ്പെട്ട സംഭവം പാര്ലമെന്റില് അവതരിപ്പിക്കാന് പ്രതിപക്ഷം. വിഷയം പാര്ലമെന്റില് സജീവ ചര്ച്ചയാക്കാനാണ് കോണ്ഗ്രസിന്റെ നീക്കം. എപ്സ്റ്റീനുമായുള്ള പ്രധാനമന്ത്രിയുടെ ബന്ധം വിശദീകരിക്കണമെന്ന് പ്രതിപക്ഷം ആവശ്യപ്പെടും. കുപ്രസിദ്ധ കുറ്റവാളിയായ എപ്സ്റ്റീനുമായി മോദിക്കുള്ള ബന്ധമെന്താണെന്നും മെയിലില് പരാമര്ശിക്കുന്നതുപോലെ എന്ത് ഉപദേശമാണ് അദ്ദേഹത്തില് നിന്ന് പ്രധാനമന്ത്രി സ്വീകരിച്ചതെന്നും പ്രതിപക്ഷം പാര്ലമെന്റില് ഉന്നയിക്കും.
അതേസമയം, ഈ ആരോപണങ്ങള് വസ്തുതാവിരുദ്ധമാണെന്നും സന്ദേശങ്ങള്ക്ക് സര്ക്കാരുമായി യാതൊരു ബന്ധവുമില്ലെന്നും ബിജെപി വക്താക്കള് വ്യക്തമാക്കി.
പ്രതിസന്ധിയിലായി അനില് അംബാനി
റഫാല് കരാറിലെ ഓഫ്സെറ്റ് പങ്കാളിയായിരുന്ന കാലത്താണ് ഈ ആശയവിനിമയങ്ങള് ഭൂരിഭാഗവും നടന്നത് എന്നത് ശ്രദ്ധേയമാണ്. നിലവില് സാമ്പത്തിക തട്ടിപ്പ് കേസുകളിലും സെബിയുടെ (SEBI) വിലക്കിലും അകപ്പെട്ടിരിക്കുന്ന അനില് അംബാനിക്ക് പുതിയ വെളിപ്പെടുത്തലുകള് കൂടുതല് തിരിച്ചടിയായിരിക്കുകയാണ്.
അംബാനിയുടെ ഓഫീസോ അദ്ദേഹത്തിന്റെ കമ്പനിയോ ഇതുവരെ ഈ റിപ്പോര്ട്ടുകളോട് പ്രതികരിച്ചിട്ടില്ല. രേഖകളുടെ ആധികാരികത സ്വതന്ത്രമായി പരിശോധിക്കാന് സാധ്യമല്ലെന്നും റിപ്പോര്ട്ടുകള് വ്യക്തമാക്കുന്നു.
യുഎസ് അംബാസഡര് സ്ഥാനത്തേക്ക് ആരെ പരിഗണിക്കണം എന്നതിനെക്കുറിച്ചും അംബാനിയും എപ്സ്റ്റൈനും തമ്മില് ചര്ച്ചകള് നടന്നതായി രേഖകള് വ്യക്തമാക്കുന്നു. ജനറല് ഡേവിഡ് പെട്രേയസിനെയാണ് അംബാനി നിര്ദ്ദേശിച്ചത്.
Latest News
More Stories
