ഇറാന്റെ പുതിയ പരമോന്നത നേതാവായി മുജ്തബ ഖാംനഇ; വെല്ലുവിളിയുമായി ട്രംപ്, യുദ്ധം പത്താം ദിവസത്തിലേക്ക്

ഇറാന്റെ പുതിയ പരമോന്നത നേതാവായി കൊല്ലപ്പെട്ട ആയത്തുല്ല അലി ഖാംനഇയുടെ മകന്‍ മുജ്തബ ഖാംനഇ (56) നിയമിതനായി. ഫെബ്രുവരി 28-ന് അമേരിക്കയും ഇസ്രായേലും സംയുക്തമായി നടത്തിയ വ്യോമാക്രമണത്തിലാണ് അലി ഖാംനഇ കൊല്ലപ്പെട്ടത്. ഇസ്ലാമിക് റിപ്പബ്ലിക്കിന്റെ 47 വര്‍ഷത്തെ ചരിത്രത്തിലെ ഏറ്റവും വലിയ പ്രതിസന്ധിയിലൂടെ രാജ്യം കടന്നുപോകുന്ന ഘട്ടത്തിലാണ് ഈ സുപ്രധാന മാറ്റം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഞായറാഴ്ച നടന്ന യോഗത്തില്‍ ഇറാന്റെ ഉന്നതാധികാര സമിതിയായ ‘അസംബ്ലി ഓഫ് എക്‌സ്‌പെര്‍ട്ട്‌സ്’ ആണ് മുജ്തബയെ പിന്‍ഗാമിയായി തിരഞ്ഞെടുത്തത്. സൈന്യവും റെവല്യൂഷണറി ഗാര്‍ഡ്‌സും (IRGC) പുതിയ നേതാവിന് പൂര്‍ണ്ണ പിന്തുണ പ്രഖ്യാപിച്ചിട്ടുണ്ട്.

ആരാണ് മുജ്തബ ഖാംനഇ?

പതിറ്റാണ്ടുകളായി തന്റെ പിതാവിന്റെ നിഴലായി പ്രവര്‍ത്തിച്ചിരുന്ന മുജ്തബ, ഇറാന്റെ ആഭ്യന്തര കാര്യങ്ങളിലും ഐആര്‍ജിസിയിലും വലിയ സ്വാധീനമുള്ള വ്യക്തിയാണ്.

പിതാവിനെപ്പോലെ തന്നെ അമേരിക്കയോടും ഇസ്രായേലിനോടും വിട്ടുവീഴ്ചയില്ലാത്ത സമീപനം സ്വീകരിക്കുന്ന നേതാവാണ് ഇദ്ദേഹം. അതിനാല്‍ തന്നെ വരും ദിവസങ്ങളില്‍ യുദ്ധം കൂടുതല്‍ തീവ്രമാകാനാണ് സാധ്യത.

അലി ഖാംനഇയുടെ എല്ലാ രഹസ്യ നീക്കങ്ങളുടെയും സൂത്രധാരനായിരുന്നു മുജ്തബ എന്ന് രാഷ്ട്രീയ നിരീക്ഷകര്‍ വിലയിരുത്തുന്നു.

അമേരിക്കയുടെയും ഇസ്രായേലിന്റെയും മുന്നറിയിപ്പ്

മുജ്തബയുടെ നിയമനത്തോട് രൂക്ഷമായ ഭാഷയിലാണ് യുഎസ് പ്രസിഡന്റ് ഡൊണാള്‍ഡ് ട്രംപ് പ്രതികരിച്ചത്. ‘അമേരിക്കയുടെ അംഗീകാരമില്ലാതെ ഇറാന്റെ തലപ്പത്തിരിക്കുന്ന ആരും അധികകാലം നിലനില്‍ക്കില്ല’ എന്ന് ട്രംപ് എബിസി ന്യൂസിനോട് പറഞ്ഞു. മുജ്തബയുടെ നിയമനം തനിക്ക് ഒരിക്കലും അംഗീകരിക്കാനാവില്ലെന്നും അദ്ദേഹം വ്യക്തമാക്കി. അതേസമയം, ഇറാന്റെ അടുത്ത നേതാവിനെയും ലക്ഷ്യമിടുമെന്ന് ഇസ്രായേല്‍ സൈന്യം നേരത്തെ തന്നെ മുന്നറിയിപ്പ് നല്‍കിയിരുന്നു.

‘എപ്സ്റ്റീന്റെ ഗാംഗല്ല ഞങ്ങളുടെ നേതാവിനെ തീരുമാനിക്കുന്നത്’

ഇറാന്റെ ആഭ്യന്തര കാര്യങ്ങളില്‍ ഇടപെടാനുള്ള ട്രംപിന്റെ ശ്രമത്തെ പാര്‍ലമെന്റ് സ്പീക്കര്‍ മുഹമ്മദ് ബാഗര്‍ ഖാലിബാഫ് പരിഹസിച്ചു. ഇറാന്റെ ഭാവി തീരുമാനിക്കുന്നത് ഇറാന്‍ ജനതയാണെന്നും ലൈംഗിക കുറ്റവാളിയായിരുന്ന ജെഫ്രി എപ്സ്റ്റീനുമായി ബന്ധമുള്ള അമേരിക്കന്‍ സംഘമല്ലെന്നും അദ്ദേഹം തിരിച്ചടിച്ചു. ശത്രുക്കള്‍ ഭയപ്പെടുന്ന ഒരാളെ തന്നെ വേണം നേതാവായി തിരഞ്ഞെടുക്കാന്‍ എന്ന അലി ഖാംനഇയുടെ ഉപദേശമാണ് തങ്ങള്‍ പിന്തുടര്‍ന്നതെന്ന് സമിതി അംഗങ്ങള്‍ വ്യക്തമാക്കി.

പുകയുന്ന ടെഹ്റാന്‍

പുകയുന്ന ടെഹ്റാന്‍ ടെഹ്റാന് ചുറ്റുമുള്ള അഞ്ച് എണ്ണ ശുദ്ധീകരണ ശാലകള്‍ക്ക് നേരെ ഇസ്രായേല്‍ നടത്തിയ ആക്രമണത്തെത്തുടര്‍ന്ന് നഗരത്തിന് മുകളില്‍ കറുത്ത പുക പടര്‍ന്നിരിക്കുകയാണ്.

എന്നാല്‍, അടുത്ത ആറ് മാസത്തേക്ക് തുടര്‍ച്ചയായി ആക്രമണം നടത്താനുള്ള ഡ്രോണുകളും മിസൈലുകളും തങ്ങളുടെ കൈവശമുണ്ടെന്ന് ഐആര്‍ജിസി അറിയിച്ചു. വരും ദിവസങ്ങളില്‍ കൂടുതല്‍ അത്യാധുനിക ദീര്‍ഘദൂര മിസൈലുകള്‍ ഉപയോഗിക്കുമെന്നും അവര്‍ മുന്നറിയിപ്പ് നല്‍കി.

അതേസമയം, ഇറാനിലേക്ക് അമേരിക്കന്‍ സൈന്യത്തെ അയക്കുന്ന കാര്യം തള്ളിക്കളയാനാവില്ലെന്ന് ട്രംപ് ആവര്‍ത്തിച്ചു. യുദ്ധം ഏതാണ്ട് വിജയിച്ചു കഴിഞ്ഞു എന്നാണ് ട്രംപിന്റെ അവകാശവാദമെങ്കിലും ഇറാന്റെ ഭാഗത്തുനിന്നുള്ള മിസൈല്‍ ആക്രമണങ്ങള്‍ക്ക് കുറവൊന്നുമില്ല.

യുദ്ധം രണ്ടാമത്തെ ആഴ്ചയിലേക്ക് കടക്കുമ്പോള്‍, മുജ്തബ ഖാംനഇയുടെ നേതൃത്വത്തില്‍ ഇറാന്‍ കൂടുതല്‍ ശക്തമായ പ്രത്യാക്രമണത്തിന് ഒരുങ്ങുകയാണെന്ന് വ്യക്തം. ചര്‍ച്ചകളേക്കാള്‍ ഉപരിയായി ഒരു നേരിട്ടുള്ള ഏറ്റുമുട്ടലിലേക്കാണ് മേഖല നീങ്ങുന്നത്.