01
Oct 2026
Thu
രാജ്കോട്ട് (ഗുജറാത്ത്): സോഷ്യല്‍ മീഡിയ ആപ്ലിക്കേഷനുകളായ ഇന്‍സ്റ്റഗ്രാമും ടെലിഗ്രാമും വഴി വ്യാജ കറന്‍സി നിര്‍മാണത്തില്‍ പരിശീലനം നേടി വീടുകളില്‍ കള്ളനോട്ടുകള്‍ അച്ചടിച്ചിറക്കിയ പച്ചക്കറി വ്യാപാരി രാജ്‌കോട്ടില്‍ അറസ്റ്റിലായി. മന്ദാഡുങ്കര്‍ പ്രദേശ് വാസിയായ കിഷന് ഭൂപേന്ദ്രഭായ് സോളങ്കി (30) യെയാണ് രാജ്കോട്ട് സിറ്റി ക്രൈംബ്രാഞ്ചും സ്‌പെഷ്യല്‍ ഓപ്പറേഷന്‍സ് ഗ്രൂപ്പും (SOG) ചേര്‍ന്ന് പിടികൂടിയത്.
 |
|
പ്രധാന വിവരങ്ങൾ (Key Highlights)
- പ്രതി അറസ്റ്റിൽ: ഇൻസ്റ്റഗ്രാം റീലും ടെലിഗ്രാം ക്ലാസും വഴി വ്യാജ നോട്ട് നിർമിച്ച 30-കാരൻ കിഷൻ സോളങ്കി രാജ്കോട്ട് പൊലീസിന്റെ പിടിയിലായി.
- കണ്ടെടുത്ത വസ്തുക്കൾ: 216 വ്യാജ ₹100 നോട്ടുകൾ, മൂന്ന് ₹500 നോട്ടുകൾ, കമ്പ്യൂട്ടർ, പ്രിന്ററുകൾ, ഹീറ്റർ തുടങ്ങിയവ ഉൾപ്പെടെ ₹65,500 വിലമതിക്കുന്ന ഉപകരണങ്ങൾ പിടിച്ചെടുത്തു.
- വിപുലമായ അന്വേഷണം: പ്രതിയുടെ മൊബൈൽ ഫോൺ എഫ്.എസ്.എല്ലിലേക്ക് (FSL) അയച്ചു; ഓൺലൈൻ ട്രെയിനറെ കണ്ടെത്താൻ സൈബർ സെൽ അന്വേഷണം ഊർജിതമാക്കി.
പ്രതിയുടെ പക്കല്‍ നിന്ന് വ്യാജ നോട്ടുകളും നോട്ട് അച്ചടിക്കാന്‍ ഉപയോഗിച്ചിരുന്ന അത്യാധുനിക ഉപകരണങ്ങളും ഉള്‍പ്പെടെ 65,500 രൂപയുടെ മുതലുകള്‍ പൊലീസ് പിടിച്ചെടുത്തു.
ALSO READ: മുതിർന്ന നേതാവ് ശങ്കർസിംഗ് വഗേല വീണ്ടും കോൺഗ്രസിലേക്ക്; ഗുജറാത്തിൽ നീക്കങ്ങൾ സജീവം
കടക്കെണിയില്‍ നിന്ന് കുറ്റകൃത്യത്തിലേക്ക്
പച്ചക്കറി കച്ചവടത്തില്‍ നിന്നും ഡ്രൈവിംഗില്‍ നിന്നും ലഭിച്ചിരുന്ന വരുമാനം വളരെ കുറവായതിനാല്‍ കടുത്ത സാമ്പത്തിക പ്രതിസന്ധിയിലും കടക്കെണിയിലുമായതാണ് കുറ്റകൃത്യത്തിലേക്ക് നയിച്ചതെന്ന് രാജ്കോട്ട് ഡി.സി.പി (ക്രൈം) ജഗ്ദീഷ് ബംഗാര്‍വയുടെ നേതൃത്വത്തിലുള്ള പ്രാഥമിക ചോദ്യം ചെയ്യലില്‍ കിഷന് വെളിപ്പെടുത്തി.
ഇന്‍സ്റ്റഗ്രാമില്‍ സ്‌ക്രോള്‍ ചെയ്യുന്നതിനിടെ 100, 500 രൂപയുടെ വ്യാജ കറന്‍സികള്‍ നിര്‍മിക്കുന്നത് കാണിക്കുന്ന ഒരു റീല്‍ കണ്ടതാണ് കിഷന് സോളങ്കിയെ ഇതിലേക്ക് ആകര്‍ഷിച്ചത്. തുടര്‍ന്ന് റീലിന് പിന്നിലെ അക്കൗണ്ട് ഉടമയുമായി ബന്ധപ്പെടുകയും, ടെലിഗ്രാം വഴി കൂടുതല്‍ ആശയവിനിമയം നടത്തി അച്ചടിയുടെ വിശദമായ പരിശീലനം നേടുകയുമായിരുന്നു.
കൈകൊണ്ട് ഒപ്പിടാന്‍ മാത്രം അറിയാവുന്ന, വലിയ വിദ്യാഭ്യാസമില്ലാത്ത ആളാണ് കിഷന്. എളുപ്പത്തില്‍ പണമുണ്ടാക്കാമെന്ന ഓണ്‍ലൈന്‍ വ്യാജ സന്ദേശങ്ങളില്‍ വീണാണ് ഇയാള്‍ ഈ കുറ്റകൃത്യത്തില്‍ പങ്കാളിയായത്.
ഓണ്‍ലൈന്‍ ട്രെയിനര്‍ക്ക് കള്ളനോട്ട് നല്‍കി ഒറിജിനല്‍ പണം വാങ്ങി
താന്‍ അച്ചടിച്ച 10,000 രൂപയുടെ വ്യാജ നോട്ടുകള്‍ ഓണ്‍ലൈന്‍ വഴി പരിശീലനം നല്‍കിയ വ്യക്തിക്ക് അയച്ചുകൊടുത്തപ്പോള്‍, പകരം അയാള്‍ 3,000 രൂപയുടെ യഥാര്‍ത്ഥ കറന്‍സി നല്‍കിയതായും കിഷന് പൊലീസിനോട് സമ്മതിച്ചു. എന്നാല്‍ പരിശീലനം നല്‍കിയ ആളുടെ പൂര്‍ണമായ വിവരങ്ങളോ നേരിട്ട് കാണാനുള്ള വഴികളോ അയാള്‍ കിഷന് നല്‍കിയിരുന്നില്ല. നിലവില്‍ ഈ ദുരൂഹ ട്രെയിനറെ കണ്ടെത്താനായി പൊലീസും സൈബര്‍ സെല്ലും തെരച്ചില്‍ ഊര്‍ജിതമാക്കിയിട്ടുണ്ട്.
കള്ളനോട്ടുകള്‍ കുറേശ്ശെയായി വിപണിയിലിറക്കി
വ്യാജ നോട്ടുകള്‍ മൊത്തമായി വില്‍ക്കുന്നതിന് പകരം വിപണിയില്‍ സാധാരണ സാധനങ്ങള്‍ വാങ്ങാനാണ് പ്രതി ഇവ ഉപയോഗിച്ചിരുന്നത്. ആളുകള്‍ക്ക് പെട്ടെന്ന് സംശയം തോന്നാതിരിക്കാനാണ് പ്രധാനമായും 100 രൂപയുടെ നോട്ടുകള്‍ അച്ചടിച്ചത്.
കഴിഞ്ഞ 4-5 മാസത്തിനിടെ നാല്‍പതോളം വ്യാജ 100 രൂപ നോട്ടുകള്‍ ഇത്തരത്തില്‍ വിപണിയിലിറക്കി. അടുത്തിടെ നടന്ന ജന്‍മാഷ്ടമി മേളയിലാണ് കിഷന് ഈ വ്യാജ നോട്ടുകള്‍ കൂടുതലായി ചെലവഴിച്ചതെന്ന് പൊലീസ് അന്വേഷണത്തില്‍ തെളിഞ്ഞു.
റെയ്ഡില്‍ വന്‍ ശേഖരം പിടിച്ചെടുത്തു
രഹസ്യ വിവരത്തിന്റെ അടിസ്ഥാനത്തില്‍ കിഷന്റെ വീട്ടില്‍ പൊലീസ് നടത്തിയ മിന്നല്‍ റെയ്ഡില്‍ 216 വ്യാജ 100 രൂപ നോട്ടുകളും മൂന്ന് വ്യാജ 500 രൂപ നോട്ടുകളും കണ്ടെടുത്തു. കൂടാതെ അച്ചടിക്ക് ഉപയോഗിച്ച സി.പി.യു, മോണിറ്റര്‍, രണ്ട് പ്രിന്ററുകള്‍, ലാമിനേറ്റര്‍ ഹീറ്റര്‍ മെഷീന്‍, ബട്ടര്‍ പേപ്പര്‍, 100 രൂപയുടെ പ്രിന്റ് ചെയ്ത പേപ്പറുകള്‍ എന്നിവയും പിടിച്ചെടുത്തിട്ടുണ്ട്.
ഫോണ്‍ എഫ്.എസ്.എല്ലിലേക്ക്; സൈബര്‍ സെല്‍ അന്വേഷണം
കോടതിയില്‍ ഹാജരാക്കിയ പ്രതിയെ മൂന്ന് ദിവസത്തെ പൊലീസ് റിമാന്‍ഡില്‍ വിട്ടു. പ്രതിയുടെ മൊബൈല്‍ ഫോണ്‍ വിശദമായ പരിശോധനയ്ക്കായി ഫോറന്‍സിക് സയന്‍സ് ലബോറട്ടറിയിലേക്ക് (FSL) അയച്ചിരിക്കുകയാണ്.
സോഷ്യല്‍ മീഡിയ പ്ലാറ്റ്ഫോമുകളായ ഇന്‍സ്റ്റഗ്രാമും ടെലിഗ്രാമും കുറ്റകൃത്യങ്ങള്‍ക്കായി ഉപയോഗിച്ച പശ്ചാത്തലത്തില്‍, രാജ്കോട്ട് സിറ്റി പൊലീസിന്റെ സൈബര്‍ സെല്‍ പ്രതിയുടെ ചാറ്റ് ഹിസ്റ്ററിയും സോഷ്യല്‍ മീഡിയ അക്കൗണ്ടുകളും വിശദമായി പരിശോധിച്ചുവരികയാണ്. കൂടുതല്‍ കള്ളനോട്ടുകള്‍ അച്ചടിച്ചിട്ടുണ്ടോ, കൂടുതല്‍ ആളുകള്‍ ഈ ശൃംഖലയില്‍ ഉള്‍പ്പെട്ടിട്ടുണ്ടോ എന്ന് റിമാന്‍ഡ് കാലാവധിയില്‍ ചോദ്യം ചെയ്യുമെന്ന് പൊലീസ് അറിയിച്ചു.
News Tag Live യുട്യൂബ് ചാനല്‍ Subscribe ചെയ്യുക
Latest News
More Stories
