19
Oct 2026
Mon
മുംബൈ / കോട്ട: ബോളിവുഡ് താരം ടൈഗര്‍ ഷ്റോഫിന് നേരെ നടന്ന വധശ്രമത്തില്‍ നിര്‍ണ്ണായക വഴിത്തിരിവ്. താരത്തിന്റെ കാറിന് നേരെ വെടിയുതിര്‍ത്ത മൂന്ന് പ്രതികളെയും രാജസ്ഥാനിലെ കോട്ട റെയില്‍വേ സ്റ്റേഷനില്‍ സ്‌പെഷ്യല്‍ പൊലീസ് സംഘം പിടികൂടി. മുംബൈ പൊലീസില്‍ നിന്ന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ രാജസ്ഥാന്‍ ആന്റി ഗ്യാങ്സ്റ്റര്‍ ടാസ്‌ക് ഫോഴ്‌സും (AGTF) കോട്ട സിറ്റി പോലീസും സംയുക്തമായി നടത്തിയ നീക്കത്തിലാണ് പ്രതികള്‍ വലയിലായത്.
 |
|
പൂനെ-ജയ്പൂര്‍ എക്‌സ്പ്രസ് ട്രെയിനില്‍ രക്ഷപ്പെടാന്‍ ശ്രമിക്കുന്നതിനിടയാണ് ഇവര്‍ പിടിയിലായത്. പ്രതികളില്‍ രണ്ടുപേര്‍ ഹരിയാന സ്വദേശികളും ഒരാള്‍ ബീഹാര്‍ സ്വദേശിയുമാണ്. കുപ്രസിദ്ധ ഗുണ്ടാ നേതാവ് ലോറന്‍സ് ബിഷ്‌ണോയ് സംഘവുമായി ഇവര്‍ക്ക് നേരിട്ട് ബന്ധമുണ്ടെന്ന് പൊലീസ് സ്ഥിരീകരിച്ചു.
പിടിയിലായ പ്രതികള്‍ ആരെല്ലാം?
റേഷന്‍ (18): ഹരിയാനയിലെ സോണിപത് സ്വദേശി (ആക്രമണത്തില്‍ നേരിട്ട് പങ്കെടുത്തയാള്‍).
ഫൂല്‍ സിംഗ് (പ്രായപൂര്‍ത്തിയാകാത്ത 17-കാരന്‍): ഹരിയാന സോണിപത് സ്വദേശി.
ഹ്രിതിക് കുമാര്‍ എന്ന റോഷന്‍ (22): ബീഹാര്‍ ബെഗുസരായി സ്വദേശി. നിലവില്‍ മുംബൈ അന്ധേരി വെസ്റ്റില്‍ താമസിച്ച് റാപ്പിഡോ റൈഡറായി ജോലി ചെയ്തുവരികയായിരുന്നു. ഇയാളാണ് പ്രതികള്‍ക്ക് രക്ഷപ്പെടാന്‍ സഹായങ്ങള്‍ നല്‍കിയത്.
ആക്രമണത്തിനു പിന്നിലെ ലക്ഷ്യം; ബിഷ്‌ണോയ് ഗ്യാങ്ങിന്റെ ഭീഷണി
ഞായറാഴ്ച വൈകിട്ട് മുംബൈ ജുഹുവിലെ ഫുട്‌ബോള്‍ ഗ്രൗണ്ടില്‍ കളികഴിഞ്ഞ് കാറില്‍ മടങ്ങുകയായിരുന്ന ടൈഗര്‍ ഷ്റോഫിനെ ലക്ഷ്യമിട്ടാണ് ബൈക്കിലെത്തിയ സംഘം വെടിയുതിര്‍ത്തത്. ആക്രമണത്തില്‍ താരത്തിന്റെ ഡ്രൈവര്‍ ഫിര്‍ദോസ് ഇബ്രാഹിം ബലോചിന് പരിക്കേറ്റിരുന്നു. ടൈഗര്‍ ഷ്റോഫിനും ചെറിയ പരിക്കുകള്‍ ഏറ്റിട്ടുണ്ടെന്നാണ് പുറത്തുവരുന്ന വിവരം.
നടന്‍ സല്‍മാന്‍ ഖാനുമായുള്ള ബന്ധവും അദ്ദേഹത്തോടൊപ്പം സിനിമകളില്‍ സഹകരിക്കുന്നതുമാണ് ആക്രമണത്തിന് കാരണമെന്ന് ലോറന്‍സ് ബിഷ്‌ണോയ് ഗ്യാങ് അവകാശപ്പെട്ടു. ഗ്യാങ്ങുമായി ബന്ധമുള്ള അനില്‍ പണ്ഡിറ്റ് സോഷ്യല്‍ മീഡിയയിലൂടെ പങ്കുവെച്ച ഓഡിയോ ക്ലിപ്പിലാണ് സല്‍മാന്‍ ഖാനൊപ്പമുള്ള ആരെയും വെറുതെ വിടില്ലെന്ന നടുക്കുന്ന മുന്നറിയിപ്പുള്ളത്.
ആസൂത്രിതമായ നീക്കം; രക്ഷപ്പെടല്‍ ശ്രമം പാളി
പോലീസിന്റെ പ്രാഥമിക അന്വേഷണത്തില്‍ പ്രതികള്‍ ആഴ്ചകളോളം ടൈഗര്‍ ഷ്റോഫിന്റെ നീക്കങ്ങള്‍ നിരീക്ഷിച്ചിരുന്നതായി (Recce) വ്യക്തമായി. ഞായറാഴ്ചകളില്‍ താരം ജുഹുവിലെ ഫുട്‌ബോള്‍ ക്ലബ്ബില്‍ എത്താറുണ്ടെന്ന വിവരം മനസ്സിലാക്കിയാണ് ആക്രമണം ആസൂത്രണം ചെയ്തത്.
വെടിവെപ്പിന് ശേഷം എസ്.വി റോഡ് വഴി അന്ധേരി സ്റ്റേഷനിലെത്തിയ പ്രതികള്‍, തങ്ങള്‍ സഞ്ചരിച്ച വാഹനം ഉപേക്ഷിച്ച് ബോറിവലി ഭാഗത്തേക്ക് ട്രെയിന്‍ മാര്‍ഗ്ഗം കടക്കുകയായിരുന്നു. തുടര്‍ന്ന് മഹാരാഷ്ട്ര അതിര്‍ത്തി കടന്ന് ഗുജറാത്തിലേക്ക് രക്ഷപ്പെടാന്‍ ശ്രമിച്ചെങ്കിലും, പോലീസിന്റെ ശക്തമായ നിരീക്ഷണത്തെ തുടര്‍ന്ന് ട്രെയിനില്‍ രാജസ്ഥാനിലേക്ക് യാത്ര ചെയ്യവെയാണ് കോട്ടയില്‍ വെച്ച് പിടിയിലായത്.
സംഭവത്തെ തുടര്‍ന്ന് മഹാരാഷ്ട്ര ഉപമുഖ്യമന്ത്രി ഏക്‌നാഥ് ഷിന്‍ഡെ ടൈഗര്‍ ഷ്റോഫിന്റെ വസതിയിലെത്തി കുടുംബത്തെ സന്ദര്‍ശിക്കുകയും ശക്തമായ സുരക്ഷ ഉറപ്പുനല്‍കുകയും ചെയ്തിട്ടുണ്ട്. 1990 കളിലെ ഗ്യാങ് വാറുകള്‍ അടിച്ചമര്‍ത്തിയതുപോലെ ക്രിമിനല്‍ സംഘങ്ങളുടെ വേരറുക്കുമെന്നും കുറ്റവാളികള്‍ക്ക് കനത്ത തിരിച്ചടി നല്‍കുമെന്നും അദ്ദേഹം മുന്നറിയിപ്പ് നല്‍കി. കേസില്‍ കൂടുതല്‍ പ്രതികള്‍ക്കായി അന്വേഷണം വ്യാപിപ്പിച്ചിരിക്കുകയാണ് മുംബൈ ക്രൈംബ്രാഞ്ച്.
Tags: Tiger Shroff Shooting Arrest, Lawrence Bishnoi Gang Mumbai, Tiger Shroff Attack Kota Rajasthan, Eknath Shinde Tiger Shroff Security, Bollywood Crime News Malayalam, News Malayalam
News Tag Live യുട്യൂബ് ചാനല്‍ Subscribe ചെയ്യുക
Latest News
More Stories
All Rights Reserved © 2026