കൊച്ചി: ജന്തര് മന്ദറില് പ്രതിഷേധം തുടരുന്ന ഗുസ്തിതാരങ്ങള്ക്കെതിരായ പൊലീസ് നടപടിയില് പ്രതിഷേധവുമായി നടി അപര്ണ ബാലമുരളി. താരങ്ങളെ റോഡില് വലിച്ചിഴക്കുന്ന ചിത്രങ്ങള് പങ്കുവച്ചുകൊണ്ട് ‘നമ്മുടെ ചാംപ്യന്മാരോട് ഇത്തരത്തില് പെരുമാറുന്നത് കാണുന്നത് ഹൃദയഭേദകമാണെന്നായിരുന്നു’ അപര്ണ ഇന്സ്റ്റഗ്രാം സ്റ്റോറിയില് കുറിച്ചത്.
ഒട്ടേറെപേരാണ് ഗുസ്തിതാരങ്ങള്ക്കെതിരായ നടപടിയില് പ്രതിഷേധവുമായി രംഗത്തെത്തുന്നത്.അന്താരാഷ്ട്ര വേദികളില് അഭിമാനപൂര്വം ദേശീയ പതാക വീശിയ ഇന്ത്യയുടെ പുത്രിമാരെ ഇപ്പോള് അതേ പതാകയുമായി തെരുവില് വലിച്ചിഴക്കപ്പെടുകയാണെന്ന് മലയാളി ഫുട്ബോള് താരം സി.കെ വിനീത് ട്വീറ്റ് ചെയ്തിരുന്നു.
കഴിഞ്ഞ ദിവസം പ്രതിഷേധിച്ച സാക്ഷി മാലിക് ഉള്പ്പെടെയുള്ള താരങ്ങളെ പൊലീസ് ബലം പ്രയോഗിച്ചും വലിച്ചിഴച്ചും സംഭവസ്ഥലത്തു നിന്നും നീക്കം ചെയ്തിരുന്നു. ജന്തര്മന്തറിലെ സമരവേദിയും പൊലീസ് പൊളിച്ചു നീക്കിയിരുന്നു. അറസ്റ്റ് ചെയ്ത വനിതാ താരങ്ങളെ വൈകീട്ടോടെ വിട്ടയച്ചെങ്കിലും ബജ്റംഗ് പൂനിയയെ പൊലീസ് രാത്രി ഏറെ വൈകിയാണ് മോചിപ്പിച്ചത്.
ഒരു മാസമായി പ്രതിഷേധം നടന്ന ജന്തര്മന്തറില് നിന്ന് ഡല്ഹി പോലീസ് ഗുസ്തിതാരങ്ങളെ കഴിഞ്ഞ ദിവസം ഒഴിപ്പിച്ചിരുന്നു. ഇനി ഗുസ്തി താരങ്ങളെ അവിടേക്ക് മടങ്ങാന് അനുവദിക്കില്ലെന്നാണ് പോലീസ് പറയുന്നത്. ഡല്ഹിയില് നിന്ന് 700 പേരെ കസ്റ്റഡിയിലെടുത്തതായി പൊലീസ് അറിയിച്ചു. അതേസമയം, മൂന്ന് ഗുസ്തി താരങ്ങള് ഉള്പ്പെടെ 109 പേരെ ജന്തര്മന്തറില് നിന്ന് കസ്റ്റഡിയിലെടുത്തു. എന്നിരുന്നാലും, വൈകുന്നേരം തന്നെ വിനേഷ് ഫോഗട്ട്, സാക്ഷി മാലിക് എന്നിവരുള്പ്പെടെ എല്ലാ പ്രതിഷേധക്കാരായ സ്ത്രീകളെയും വിട്ടയച്ചു. എന്നാല് നേഷ്-സാക്ഷി മാലിക്, ബജ്രംഗ് പൂനിയ എന്നിവര്ക്കെതിരെയും പോലീസുകാരെ മര്ദിച്ചതിനും കലാപമുണ്ടാക്കിയതിനും ഡ്യൂട്ടിയിലുണ്ടായിരുന്ന ഒരു പൊതുപ്രവര്ത്തകന്റെ ജോലി തടസ്സപ്പെടുത്തിയതിനും പോലീസ് കേസെടുത്തു.