വേള്‍ഡ് കപ്പില്‍ നിന്ന് ബ്രസീല്‍ പുറത്ത്; ഹാലന്‍ഡിന്റെ മികവില്‍ ചരിത്രനേട്ടവുമായി നോര്‍വെ

ന്യൂജേഴ്സി: ഫിഫ ലോകകപ്പില്‍ വന്‍ അട്ടിമറി. പ്രീ ക്വാര്‍ട്ടര്‍ പോരാട്ടത്തില്‍ ബ്രസീലിനെ തകര്‍ത്ത് നോര്‍വെ ക്വാര്‍ട്ടര്‍ ഫൈനലില്‍ പ്രവേശിച്ചു. ഒന്നിനെതിരെ രണ്ട് ഗോളുകള്‍ക്കായിരുന്നു നോര്‍വെയുടെ ചരിത്ര വിജയം. സൂപ്പര്‍ താരം എര്‍ലിംഗ് ഹാലന്‍ഡ് നേടിയ ഇരട്ട ഗോളുകളാണ് നോര്‍വെയ്ക്ക് തുണയായത്. ലോകകപ്പിന്റെ ചരിത്രത്തില്‍ ആദ്യമായാണ് നോര്‍വെ ക്വാര്‍ട്ടര്‍ ഫൈനലില്‍ എത്തുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ആവേശകരമായ മത്സരത്തിന്റെ ആദ്യ പകുതിയില്‍ ഇരുടീമുകള്‍ക്കും ഗോളൊന്നും നേടാനായിരുന്നില്ല. എന്നാല്‍ 80-ാം മിനിറ്റില്‍ തകര്‍പ്പന്‍ ഹെഡ്ഡറിലൂടെ ഹാലന്‍ഡ് നോര്‍വെയെ മുന്നിലെത്തിച്ചു. തുടര്‍ന്ന് 90-ാം മിനിറ്റില്‍ ബോക്‌സിന് വെളിയില്‍ നിന്നുള്ള മനോഹരമായൊരു ഷോട്ടിലൂടെ ഹാലന്‍ഡ് നോര്‍വെയുടെ വിജയമുറപ്പിച്ച രണ്ടാം ഗോളും സ്വന്തമാക്കി. ഇഞ്ചുറി ടൈമില്‍ പെനാല്‍റ്റിയിലൂടെ നെയ്മര്‍ ബ്രസീലിനായി ഒരു ഗോള്‍ തിരിച്ചടിച്ചെങ്കിലും പരാജയം ഒഴിവാക്കാനായില്ല.

മത്സരത്തിന്റെ 14-ാം മിനിറ്റില്‍ ലഭിച്ച പെനാല്‍റ്റി ബ്രസീല്‍ മിഡ്ഫീല്‍ഡര്‍ ബ്രൂണോ ഗിമാരസ് പുറത്തേക്കടിച്ചതും, വിനീഷ്യസ് ജൂനിയറിന്റെ മികച്ചൊരു പാസ് പകരക്കാരനായി ഇറങ്ങിയ എന്‍ഡ്രിക്കിന് ഗോളാക്കി മാറ്റാന്‍ കഴിയാത്തതും ബ്രസീലിന് തിരിച്ചടിയായി. കളിയുടെ മൂന്നാം മിനിറ്റില്‍ നോര്‍വെ ഒരു ഗോള്‍ നേടിയിരുന്നെങ്കിലും ഓഫ്സൈഡ് വിസിലില്‍ അത് റദ്ദാക്കപ്പെട്ടിരുന്നു.

1990-ന് ശേഷം ആദ്യമായാണ് ബ്രസീല്‍ ലോകകപ്പിന്റെ പ്രീ ക്വാര്‍ട്ടര്‍ ഘട്ടത്തില്‍ പുറത്താകുന്നത്. ഇതോടെ അന്താരാഷ്ട്ര ഫുട്‌ബോളില്‍ നോര്‍വെയെ ഇതുവരെ തോല്‍പ്പിക്കാന്‍ കഴിഞ്ഞിട്ടില്ലെന്ന നാണക്കേടിന്റെ റെക്കോര്‍ഡ് ബ്രസീലിന് തുടരേണ്ടി വന്നു.

Brazil Knocked Out Of World Cup, Haaland Leads Norway To History