കമോൺ കേരള അഞ്ചാം എഡിഷൻ മെയ്​ 19 മുതൽ

ഷാർജ: മിഡിലീസ്റ്റിലെ ഏറ്റവും വലിയ ഇന്ത്യൻ വാണിജ്യ, വിനോദ, സാംസ്കാരിക മേളയായ ‘ഗൾഫ്​ മാധ്യമം കമോൺ കേരള’യുടെ അഞ്ചാം എഡിഷൻ മെയ്​ 19, 20, 21 തീയതികളിൽ ഷാർജ എക്സ്​പോ സെൻററിൽ നടക്കും. ​യു.എ.ഇ സുപ്രിം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ രക്ഷാകർതൃത്വത്തിൽ ഒരുക്കുന്ന മേളയുടെ മുന്നോടിയായി മേയ്​ 18ന്​ ഷാർജ ചേംബർ ഓഫ്​ കൊമേഴ്​സിൽ ഇൻവസ്റ്റ്​മെൻറ്​ സമ്മിറ്റും നടക്കും. ഷാർജ ചേംബർ ഓഫ്​ കൊമേഴ്​സിൻറെയും ഷാർജ കൊമേഴ്​സ്​ ആൻഡ്​ ടൂറിസം ഡെവലപ്​മെൻറ്​ അതോറിറ്റിയുടെയും പങ്കാളിത്തത്തോടെ സംഘടിപ്പിക്കുന്ന മേളയുടെ ഒരുക്കം പൂർത്തിയായതായി ‘ഗൾഫ്​ മാധ്യമം’ ചീഫ്​ എഡിറ്റർ ഹംസ അബ്ബാസ്​ വാർത്തസമ്മേളനത്തിൽ അറിയിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മിഡിലീസ്​റ്റുമായി ഇന്ത്യയുടെ വാണിജ്യ ബന്ധം ശക്​തിപ്പെടുത്താൻ ലക്ഷ്യമിട്ട് നടത്തുന്ന കമോൺ കേരളയുടെ ഉദ്​ഘാടനം മേയ്​ 19ന്​ വൈകുന്നേരം നാലിന്​ ഷാർജ ഡിപാർട്ട്​മെൻറ്​ ഓഫ്​ ഗവൺമെൻറ്​ റിലേഷൻസ്​ എക്സിക്യൂട്ടീവ്​ ചെയർമാൻ ശൈഖ്​ ഫാഹിം ബിൻ സുൽത്തൻ ബിൻ ഖാലിദ്​ അൽ ഖാസിമി നിർവഹിക്കും. ലുലു ഗ്രൂപ്പ്​ ചെയർമാൻ എം.എ. യൂസുഫലി, ആസ്റ്റർ ഡി.എം. ഹെൽത്ത്​കെയർ സ്ഥാപക ചെയർമാൻ ഡോ. ആസാദ്​ മൂപ്പൻ എന്നിവർ മുഖ്യാതിഥിയാകും. ഷാർജ ചേംബർ ഓഫ്​ കൊ​മേഴ്​സ്​, കൊമേഴ്​സ്​ ആൻഡ്​ ടൂറിസം ഡവലപ്​മെൻറ്​ അതോറിറ്റി, ഇന്ത്യൻ കോൺസുലേറ്റ്​ പ്രതിനിധികൾ പ​ങ്കെടുക്കും.

മുൻ വർഷങ്ങളെ അപേക്ഷിച്ച്​ മേളയുടെ പകൽ സമയങ്ങളിലും സന്ദർശകരെ ആഷർഷിക്കുന്ന വിവിധയിനം പരിപാടികൾ നടക്കും​. രാവിലെ 10 മുതൽ രാത്രി 10 വരെ നീണ്ടുനിൽക്കുന്ന ആഘോഷ പരിപാടികളിൽ മലയാളികളുടെ പ്രിയപ്പെട്ട കുഞ്ചാക്കോ ബോബൻ, ഭാവന തുടങ്ങിയവരുടെ നേതൃത്വത്തിൽ വമ്പൻ താരനിര അണിനിരക്കും. ആരോഗ്യം, വിനോദ സഞ്ചാരം, വിദ്യാഭ്യാസം, ഷോപ്പിങ്, ഇൻറീരിയർ ഡിസൈൻ​ തുടങ്ങിയ മേഖലയിൽ സ്റ്റാളുകളുമായി ഇന്ത്യയിലെയും യു.എ.ഇയിലെയും സംരംഭകർ അണിനിരക്കും. നിരവധി ഉപഭോക്തൃ ഉൽപന്നങ്ങളുടെ ലോഞ്ചിങിനും കമോൺ കേരള വേദിയാവും. വീടുവാങ്ങാനും വിൽക്കാനും റിയൽ എസ്​റ്റേറ്റിൽ നിക്ഷേപിക്കാനും ആഗ്രഹിക്കുന്നവർക്കായി പ്രോപ്പർട്ടി ഷോ നടക്കും.

പകൽ മാത്രമല്ല, അതി മനോഹര സാംസ്​കാരിക പരിപാടികളാൽ സമ്പന്നമായിരിക്കും മൂന്ന് സായാഹ്നങ്ങളും. വിവിധ മേഖലകളിൽ വ്യക്​തിമുദ്ര പതിപ്പിച്ച വനിതകൾക്കുള്ള ആദരമായി ഇന്തോ-അറബ്​ വിമൻ എക്സലൻസ്​ അവാർഡ്​ നൽകും. കെ. മുരളീധരൻ എം.പി, ജോൺ ബ്രിട്ടാസ്​ എം.പി എന്നിവർ പ​ങ്കെടുക്കും.

ഇന്ത്യ-യു.എ.ഇ സമഗ്ര സാമ്പത്തിക സഹകരണ കരാർ ഒപ്പുവെച്ച്​ ഒരു വർഷം തികയുന്ന പശ്​ചാത്തലത്തിൽ നടക്കുന്ന നിക്ഷേപക സംഗമം ഇരു രാജ്യങ്ങളിലെയും നിക്ഷേപ സാധ്യതകൾ ചർച്ച ചെയ്യും. പുതുതായി നിക്ഷേപിക്കാൻ ആഗ്രഹിക്കുന്നവർക്കും ബിസിനസ്​ വളർച്ച ലക്ഷ്യമിടുന്നവർക്കും ഉപകാരപ്പെടുന്നതായിരിക്കും നിക്ഷേപക സംഗമം.