20
Sep 2025
Tue
ഇസ്രായേല് അധിനിവേശ സേന ഗസയില് തുടരുന്ന വംശഹത്യ അവസാനിപ്പിക്കുന്നതിന് പുതിയ സമാധാന നിര്ദേശങ്ങളുമായി അമേരിക്കന് പ്രസിഡന്റ് ഡൊണാള്ഡ് ട്രംപ്. നിര്ദേശങ്ങള് അംഗീകരിക്കപ്പെട്ടാല് 72 മണിക്കൂറിനുള്ളില് സമാധാനം സാധ്യമാക്കുമെന്നവകാശപ്പെട്ടാണ് ട്രംപ് 20 ഇന നിര്ദേശങ്ങള് പുറത്തുവിട്ടത്.
 |
|
ഈ പദ്ധതി ഇരുപക്ഷവും അംഗീകരിക്കുകയാണെങ്കില്, യുദ്ധം ഉടനടി അവസാനിക്കും. ഗസയില് തടവിലാക്കപ്പെട്ടിട്ടുള്ള ജീവിച്ചിരിക്കുന്നവരും മരിച്ചവരുമായ എല്ലാ ബന്ദികളെയും 72 മണിക്കൂറിനുള്ളില് തിരികെ എത്തിക്കും. ഇതിന് പകരമായി ഫലസ്തീന് തടവുകാരെ മോചിപ്പിക്കുകയും ചെയ്യും.
ഗസ മുനമ്പ് താല്ക്കാലികമായി ഒരു ഫലസ്തീന് ടെക്നോക്രാറ്റിക് സര്ക്കാര് ഭരിക്കും, അതില് ഹമാസിന് ഒരു പങ്കുമുണ്ടായിരിക്കില്ല. ഇസ്രായേല് ഗസയെ കൈവശപ്പെടുത്തുകയോ (annex) അതിക്രമിച്ചു കയറുകയോ (occupy) ചെയ്യില്ല.
ഇസ്രായേല് പ്രധാനമന്ത്രി ബെഞ്ചമിന് നെതന്യാഹു യുഎസ് പ്രസിഡന്റ് ഡൊണാള്ഡ് ട്രംപിന്റെ പദ്ധതി അംഗീകരിച്ചിട്ടുണ്ട്. എന്നാല് സമാധാന കരാര് രേഖാമൂലം ലഭിച്ചിട്ടില്ലെന്ന് ഹമാസ് ഉദ്യോഗസ്ഥനായ മഹ്മൂദ് മര്ദാവി അല് ജസീറയോട് പറഞ്ഞു.
ഗസയിലെ ഇസ്രായേലിന്റെ വംശഹത്യ അവസാനിപ്പിക്കാനുള്ള ട്രംപിന്റെ 20-ഇന പദ്ധതിയുടെ പൂര്ണ്ണരൂപം
1. ഗസ അയല്ക്കാര്ക്ക് ഭീഷണിയാകാത്ത ഒരു ‘തീവ്രവാദരഹിത’ മേഖലയായി മാറും.
2. ആവശ്യത്തിലധികം ദുരിതമനുഭവിച്ച ഗസയിലെ ജനങ്ങളുടെ പ്രയോജനത്തിനായി ഗസയെ പുനര്വികസിപ്പിക്കും.
3. ഇരുപക്ഷവും ഈ നിര്ദ്ദേശം അംഗീകരിക്കുകയാണെങ്കില്, യുദ്ധം ഉടനടി അവസാനിക്കും. ബന്ദികളെ വിട്ടയക്കുന്നതിന് തയ്യാറെടുക്കുന്നതിനായി ഇസ്രായേല് സൈന്യം ധാരണയായ അതിര്ത്തിയിലേക്ക് പിന്മാറും. ഈ സമയത്ത്, വ്യോമാക്രമണവും പീരങ്കി ആക്രമണവും ഉള്പ്പെടെയുള്ള എല്ലാ സൈനിക നടപടികളും നിര്ത്തിവയ്ക്കും. പൂര്ണ്ണമായ ഘട്ടംഘട്ടമായുള്ള പിന്വലിക്കലിനുള്ള വ്യവസ്ഥകള് പാലിക്കപ്പെടുന്നത് വരെ യുദ്ധ നടപടികള് മരവിപ്പിക്കും.
4. ഇസ്രായേല് ഈ കരാര് പരസ്യമായി അംഗീകരിച്ച് 72 മണിക്കൂറിനുള്ളില്, ജീവിച്ചിരിക്കുന്നവരും മരിച്ചവരുമായ എല്ലാ ബന്ദികളെയും തിരികെ നല്കും.
5. എല്ലാ ബന്ദികളെയും മോചിപ്പിച്ചാലുടന്, ഇസ്രായേല് 250 ജീവപര്യന്തം തടവുകാരെയും, 2023 ഒക്ടോബര് 7-ന് ശേഷം തടവിലാക്കപ്പെട്ട 1,700 ഗാസക്കാരെയും, കൂടാതെ ആ സാഹചര്യത്തില് തടവിലാക്കപ്പെട്ട എല്ലാ സ്ത്രീകളെയും കുട്ടികളെയും മോചിപ്പിക്കും. മരിച്ച ഒരു ഇസ്രായേലി ബന്ദിയുടെ മൃതദേഹം വിട്ടയച്ചാല്, പകരം 15 മരിച്ച ഗാസക്കാരുടെ മൃതദേഹങ്ങള് ഇസ്രായേല് വിട്ടയക്കും.
6. ഈ കരാര് അംഗീകരിച്ചാല്, സമാധാനപരമായ സഹവര്ത്തിത്വത്തിനും ആയുധങ്ങള് ഉപേക്ിക്കാനും തയ്യാറാകുന്ന ഹമാസ് അംഗങ്ങള്ക്ക് പൊതുമാപ്പ് നല്കുകയും അവരുടെ ആയുധങ്ങള് ഉപയോഗരഹിതമാക്കാന് അവസരം നല്കുകയും ചെയ്യും. ഗസ വിട്ടുപോകാന് ആഗ്രഹിക്കുന്ന ഹമാസ് അംഗങ്ങള്ക്ക് സ്വീകരിക്കുന്ന രാജ്യങ്ങളിലേക്ക് സുരക്ഷിതമായ യാത്രാസൗകര്യമൊരുക്കും.
7. ഈ കരാര് അംഗീകരിച്ചാലുടന്, പൂര്ണ്ണമായ സഹായം ഗസ മുനമ്പിലേക്ക് അയയ്ക്കും. കുറഞ്ഞത്, അടിസ്ഥാന സൗകര്യങ്ങളുടെ (വെള്ളം, വൈദ്യുതി, അഴുക്കുചാല്) പുനസ്ഥാപനം, ആശുപത്രികളുടെയും ബേക്കറികളുടെയും പുനസ്ഥാപനം, അവശിഷ്ടങ്ങള് നീക്കാനും റോഡുകള് തുറക്കാനും ആവശ്യമായ ഉപകരണങ്ങളുടെ പ്രവേശനം എന്നിവ ഉള്പ്പെടെ ലഭ്യമാക്കും.
8. ഗസ മുനമ്പില് സഹായ വിതരണവും പ്രവേശനവും ഇരു പാര്ട്ടികളുടെയും ഇടപെടലില്ലാതെ യുഎന് ഏജന്സികള്, റെഡ് ക്രസന്റ്, കൂടാതെ ഒരു കക്ഷിയുമായും ബന്ധമില്ലാത്ത മറ്റ് അന്താരാഷ്ട്ര സ്ഥാപനങ്ങള് എന്നിവ വഴി നടക്കും. റഫ അതിര്ത്തിയുടെ ഇരുവശത്തേക്കുമുള്ള തുറക്കല് 2025 ജനുവരി 19-ലെ കരാര് പ്രകാരമുള്ള സംവിധാനത്തിന് വിധേയമായിരിക്കും.
9. പൊതു സേവനങ്ങളുടെയും മുനിസിപ്പാലിറ്റികളുടെയും ദൈനംദിന നടത്തിപ്പ് നിര്വഹിക്കാന് ഉത്തരവാദിത്തമുള്ള രാഷ്ട്രീയ രഹിത ടെക്നോക്രാറ്റിക് ഫലസ്തീന് സമിതിയുടെ താല്ക്കാലിക ഭരണത്തിന് കീഴിലായിരിക്കും ഗസ. യോഗ്യതയുള്ള ഫലസ്തീനികളും അന്താരാഷ്ട്ര വിദഗ്ധരും അടങ്ങുന്നതായിരിക്കും ഈ സമിതി. ഇതിന്മേല് പുതിയ അന്താരാഷ്ട്ര താല്ക്കാലിക മേല്നോട്ട സമിതിയായ ‘ബോര്ഡ് ഓഫ് പീസ്’ മേല്നോട്ടം വഹിക്കുകയും ചെയ്യും. ഈ സമിതിക്ക് പ്രസിഡന്റ് ഡൊണാള്ഡ് ട്രംപ് നേതൃത്വം നല്കും. മുന് യുകെ പ്രധാനമന്ത്രി ടോണി ബ്ലെയര് ഉള്പ്പെടെയുള്ളവര് സമിതിയില് അംഗങ്ങളായിരിക്കും. ബാക്കിയുള്ളവരെ പിന്നീട് പ്രഖ്യാപിക്കു. ഫലസ്തീന് അതോറിറ്റി അതിന്റെ പരിഷ്കരണ പരിപാടി പൂര്ത്തിയാക്കി ഗസയുടെ നിയന്ത്രണം സുരക്ഷിതമായി ഏറ്റെടുക്കുന്നതുവരെ ഗസയുടെ പുനര്വികസനത്തിനുള്ള ചട്ടക്കൂട് സ്ഥാപിക്കുന്നതും ധനസഹായം കൈകാര്യം ചെയ്യുന്നതും ഈ സമിതിയായിരിക്കും.
10. മിഡില് ഈസ്റ്റിലെ അത്ഭുത നഗരങ്ങള് വളര്ത്തിയെടുക്കാന് സഹായിച്ച വിദഗ്ധരുടെ ഒരു പാനല് ചേര്ന്ന് ഗസയെ പുനര്നിര്മ്മിക്കാനും ഊര്ജ്ജസ്വലമാക്കാനുമുള്ള ഒരു ട്രംപ് സാമ്പത്തിക വികസന പദ്ധതി സൃഷ്ടിക്കും. അന്താരാഷ്ട്ര കൂട്ടായ്മകള് തയ്യാറാക്കിയിട്ടുള്ള ശ്രദ്ധേയമായ നിക്ഷേപ നിര്ദ്ദേശങ്ങളും മികച്ച വികസന ആശയങ്ങളും ഭാവിയിലെ ഗാസയ്ക്ക് തൊഴിലവസരങ്ങളും പ്രതീക്ഷയും നല്കുന്ന വിധത്തില് ഉപയോഗപ്പെടുത്തും.
11. പ്രത്യേക സാമ്പത്തിക മേഖല സ്ഥാപിക്കപ്പെടും, ഇതിന്റെ താരിഫ്, പ്രവേശന നിരക്കുകള് പങ്കെടുക്കുന്ന രാജ്യങ്ങളുമായി ചര്ച്ച ചെയ്ത് തീരുമാനിക്കും.
12. ആരെയും ഗാസ വിട്ടുപോകാന് നിര്ബന്ധിക്കില്ല. പോകാന് ആഗ്രഹിക്കുന്നവര്ക്ക് അതിന് സ്വാതന്ത്ര്യമുണ്ടാകും, കൂടാതെ തിരിച്ചുവരാനും സ്വാതന്ത്ര്യമുണ്ടാകും. ആളുകള് അവിടെ തുടരാന് ഞങ്ങള് പ്രോത്സാഹിപ്പിക്കുകയും അവര്ക്ക് മെച്ചപ്പെട്ട ഗസ കെട്ടിപ്പടുക്കുന്നതിനുള്ള അവസരം വാഗ്ദാനം ചെയ്യുകയും ചെയ്യും.
13. ഗാസയുടെ ഭരണത്തില് ഹമാസിനും മറ്റ് ഗ്രൂപ്പുകള്ക്കും നേരിട്ടോ അല്ലാതെയോ യാതൊരു പങ്കുമുണ്ടായിരിക്കില്ല. തുരങ്കങ്ങളും ആയുധ നിര്മ്മാണ കേന്ദ്രങ്ങളും ഉള്പ്പെടെയുള്ള എല്ലാ സൈനിക, തീവ്രവാദ, ആക്രമണ അടിസ്ഥാന സൗകര്യങ്ങളും നശിപ്പിക്കും. സ്വതന്ത്ര നിരീക്ഷകരുടെ മേല്നോട്ടത്തില് ഗസയുടെ സൈനിക നിരായുധീകരണം നടക്കും.
14. ഹമാസും മറ്റ് ഗ്രൂപ്പുകളും അവരുടെ ബാധ്യതകള് പാലിക്കുന്നുണ്ടെന്നും പുതിയ ഗസ അയല്ക്കാര്ക്ക് ഭീഷണിയാകില്ലെന്നും പ്രാദേശിക പങ്കാളികള് ഉറപ്പ് നല്കും.
15. ഗാസയില് ഉടന് വിന്യസിക്കുന്നതിനായി താല്ക്കാലിക അന്താരാഷ്ട്ര സ്ഥിരതാ സേനയെ (I-SF) വികസിപ്പിക്കുന്നതിന് അറബ്, അന്താരാഷ്ട്ര പങ്കാളികളുമായി ചേര്ന്ന് അമേരിക്ക പ്രവര്ത്തിക്കും. ഈജിപ്തിന്റെയും ജോര്ദാന്റെയും സഹായത്തോടെ ഫലസ്തീന് പോലീസ് സേനയ്ക്ക് പരിശീലനവും പിന്തുണയും ISF നല്കും. ഈ സേനയായിരിക്കും ദീര്ഘകാലത്തേക്ക് ആഭ്യന്തര സുരക്ഷ നിര്വഹിക്കുക. പുതിയതായി പരിശീലനം ലഭിച്ച ഫലസ്തീന് പോലീസ് സേനയോടൊപ്പം അതിര്ത്തി പ്രദേശങ്ങള് സുരക്ഷിതമാക്കാന് ISF ഇസ്രായേലുമായും ഈജിപ്തുമായും ചേര്ന്ന് പ്രവര്ത്തിക്കും.
16. ഇസ്രായേല് ഗാസയെ കൈവശപ്പെടുത്തുകയോ കൂട്ടിച്ചേര്ക്കുകയോ ചെയ്യില്ല. ISF നിയന്ത്രണവും സ്ഥിരതയും കൈവരിക്കുന്നതിന് അനുസരിച്ച് ഇസ്രായേല് സൈന്യം മാനദണ്ഡങ്ങള്ക്ക് അനുസരിച്ച് പിന്വാങ്ങും. ഇസ്രായേല് കൈവശപ്പെടുത്തിയിട്ടുള്ള ഗസയിലെ പ്രദേശങ്ങള് ക്രമേണ ഐഎസ്എഫിന് കൈമാറും.
17. ഹമാസ് ഈ നിര്ദ്ദേശം വൈകിക്കുകയോ നിരസിക്കുകയോ ചെയ്യുന്ന സാഹചര്യത്തില്, മുകളില് പറഞ്ഞ സഹായ വിതരണ പ്രവര്ത്തനങ്ങള് ഉള്പ്പെടെ, ഇസ്രായേലി സൈന്യം ഐഎസ്ഫിന് കൈമാറുന്ന ‘ഭീകര മുക്ത’ പ്രദേശങ്ങളില് മാത്രമായി തുടരും.
189. സമാധാനത്തില് നിന്ന് ലഭിക്കുന്ന നേട്ടങ്ങള്ക്ക് ഊന്നല് നല്കിക്കൊണ്ട് ഫലസ്തീനികളുടെയും ഇസ്രായേലികളുടെയും ചിന്താഗതികളും അഭിപ്രായങ്ങളും മാറ്റാന് ശ്രമിക്കുന്നതിനായി സഹിഷ്ണുതയുടെയും സമാധാനപരമായ സഹവര്ത്തിത്വത്തിന്റെയും മൂല്യങ്ങളെ അടിസ്ഥാനമാക്കി ഒരു മതപരമായ സ്നേഹ സംവാദം നടപ്പാക്കും.
19. ഗസയുടെ പുനര്വികസനം മുന്നോട്ട് പോകുകയും ഫലസ്തീന് അതോറിറ്റി പരിഷ്കരണ പരിപാടി വിശ്വസ്തതയോടെ നടപ്പിലാക്കുകയും ചെന്നതിന് അനുസരിച്ച് ഫലസ്തീന് സ്വയം നിര്ണ്ണയത്തിനും രാഷ്ട്രപദവിക്കുമുള്ള പാതയൊരുങ്ങും.
20. സമാധാനപരവും സമൃദ്ധവുമായ സഹവര്ത്തിത്വത്തിനുള്ള ഒരു രാഷ്ട്രീയ ചക്രവാളത്തെക്കുറിച്ച് ധാരണയിലെത്തുന്നതിനായി ഇസ്രായേലും ഫലസ്തീനുകളും തമ്മിലുള്ള സംഭാഷണത്തിന് അമേരിക്ക മുന്കൈയെടുക്കുമെന്നും ധാരണാ നിര്ദേശങ്ങളില് പറയുന്നു.
Latest News
More Stories
All Rights Reserved © 2022