തമിഴ്നാട്ടിൽ രാഹുൽ ​ഗാന്ധിക്കെതിരെ പ്രതിഷേധിച്ച ഹിന്ദുമക്കൾ കക്ഷി പ്രസിഡന്റ് അറസ്റ്റിൽ

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ചെന്നൈ: തമിഴ്നാട്ടിൽ ഭാരത് ജോഡോ യാത്രയ്ക്ക് എത്തിയ കോൺ​ഗ്രസ് നേതാവ് രാഹുൽ ​ഗാന്ധിക്കെതിരെ പ്രതിഷേധിച്ച ഹിന്ദു മക്കൾ കക്ഷി നേതാവ് അറസ്റ്റിൽ. സംസ്ഥാന പ്രസിഡന്റ് അർജുൻ സമ്പത്താണ് അറസ്റ്റിലായത്. ദിണ്ഡിഗലിലെ റെയിൽവേ സ്റ്റേഷനിൽ വച്ചാണ് അർജുൻ സമ്പത്തിനെ അറസ്റ്റ് ചെയ്ത് നീക്കിയത്. ഇയാളെ കരുതൽ തടങ്കലിലാക്കിയിരിക്കുകയാണ്.

നേരത്തെ ​ഗോ ബാക്ക് രാഹുൽ എന്ന ക്യാമ്പയിൻ നടത്തുമെന്ന് അർജുൻ സമ്പത്ത് പ്രഖ്യാപിച്ചിരുന്നു. നരേന്ദ്രമോദി തമിഴ്നാട് സന്ദർശിക്കുമ്പോൾ ​ഗോ ബാക്ക് മോദി എന്ന മുദ്രാവാക്യമുയർത്തുന്നത് ട്രെൻഡാകാറുണ്ട്. അതിന് മറുപടിയായാണ് ​ഗോ ബാക്ക് രാഹുൽ ക്യാമ്പയിനെന്നും ഇയാൾ പറഞ്ഞിരുന്നു.

രാഹുൽ ഗാന്ധിക്കെതിരെ കരിങ്കൊടി കാണിക്കാൻ കോയമ്പത്തൂരിൽ നിന്ന് നാഗർകോവിൽ എക്‌സ്പ്രസ് ട്രെയിനിൽ കന്യാകുമാരിയിലേക്ക് പോകാനായിരുന്നു അർജുൻ സമ്പത്തിന്റെ പദ്ധതി. ഇതിനിടെ ദിണ്ഡിഗല്‍ ന​ഗർ നോർത്ത് പൊലീസ് ഡിഎസ്പി ​ഗോകുല കൃഷ്ണനാണ് അർജുനെ അറസ്റ്റ് ചെയ്തത്.

‘ഒരുമിക്കുന്ന ചുവടുകള്‍; ഒന്നാകുന്ന രാജ്യം’ എന്ന മുദ്രാവക്യം ഉയര്‍ത്തിയാണ് രാഹുല്‍ ഗാന്ധി എംപിയുടെ നേതൃത്വത്തിൽ ‘ഭാരത് ജോഡോ’ യാത്ര ആരംഭിക്കുന്നത്. കന്യാകുമാരിയിൽ ഭാരത് ജോഡോ യാത്രയുടെ ഒരുക്കങ്ങൾ പുരോ​ഗമിക്കുകയാണ്. കന്യാകുമാരിയിലെ ​ഗാന്ധി കൽ മണ്ഡപത്തിൽ നിന്ന് തമിഴ്നാട് മുഖ്യമന്ത്രി എം കെ സ്റ്റാലിൻ രാഹുൽ ​ഗാന്ധിക്ക് ദേശീയ പതാക കൈമാറും.