അസമില്‍ വ്യോമസേനാ വിമാനം തകര്‍ന്നു വീണു; വന്‍ തീപിടിത്തം

അസമിലെ ജോര്‍ഹട്ടിലുള്ള എയര്‍ഫോഴ്‌സ് സ്റ്റേഷനില്‍ ഇന്ത്യന്‍ വ്യോമസേനയുടെ എ.എന്‍-32 (AN-32) മിലിട്ടറി ട്രാന്‍സ്‌പോര്‍ട്ട് വിമാനം തകര്‍ന്നു വീണു. ശനിയാഴ്ച രാവിലെയാണ് രാജ്യത്തെ ഞെട്ടിച്ച ഈ അപകടം സംഭവിച്ചത്. എയര്‍ഫോഴ്‌സ് സ്റ്റേഷന്‍ പരിസരത്ത് ലാന്‍ഡ് ചെയ്യുന്നതിനിടെയാണ് വിമാനം തകര്‍ന്നു വീണതെന്നും ഇതേത്തുടര്‍ന്ന് വന്‍ തീപിടിത്തമുണ്ടായതായും പ്രാഥമിക റിപ്പോര്‍ട്ടുകള്‍ സൂചിപ്പിക്കുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

അപകടത്തിന് പിന്നാലെ കനത്ത പുകപടലങ്ങള്‍ ഉയരുന്നതിന്റെ ദൃശ്യങ്ങള്‍ പുറത്തുവന്നിട്ടുണ്ട്. തീ നിയന്ത്രണവിധേയമാക്കാനും സ്ഥിതിഗതികള്‍ വിലയിരുത്താനും അടിയന്തിര രക്ഷാപ്രവര്‍ത്തക സംഘത്തെ (Emergency response teams) ഉടന്‍ തന്നെ സംഭവസ്ഥലത്തേക്ക് നിയോഗിച്ചു. അപകടത്തിന്റെ കാരണം ഇതുവരെ വ്യക്തമായിട്ടില്ല. വിമാനത്തിലുണ്ടായിരുന്നവര്‍ക്ക് എന്തെങ്കിലും പരിക്കുകളോ ജീവഹാനിയോ സംഭവിച്ചിട്ടുണ്ടോ എന്ന കാര്യത്തിലും നിലവില്‍ ഔദ്യോഗിക സ്ഥിരീകരണമായിട്ടില്ല. സംഭവം വ്യോമസേന സ്ഥിരീകരിച്ചിട്ടുണ്ടെന്നും കൂടുതല്‍ വിവരങ്ങള്‍ ലഭ്യമാകുന്നതേയുള്ളൂ എന്നും അധികൃതര്‍ അറിയിച്ചു.

ALSO READ: കാര്‍ പിന്തുടര്‍ന്ന് ആക്രമിച്ച് സ്വര്‍ണവും പണവും കവര്‍ന്നു; ബിജെപി പ്രാദേശിക നേതാവ് അറസ്റ്റില്‍

വ്യോമസേനയുടെ ‘വിശ്വസ്തന്‍’ എ.എന്‍-32

ഇന്ത്യന്‍ വ്യോമസേനയുടെ ഏറ്റവും വിശ്വസ്തനായ, ഇരട്ട എഞ്ചിനുള്ള ടര്‍ബോപ്രോപ്പ് സൈനിക ഗതാഗത വിമാനമാണ് അന്റോണോവ് എ.എന്‍-32 (Antonov AN32). ഇന്ത്യന്‍ ആവശ്യങ്ങള്‍ക്കായി റഷ്യ പ്രത്യേകം രൂപകല്‍പ്പന ചെയ്ത് നിര്‍മ്മിച്ച ഈ വിമാനങ്ങളില്‍ നൂറോളമെണ്ണം നിലവില്‍ ഇന്ത്യന്‍ വ്യോമസേന സര്‍വീസിനായി ഉപയോഗിക്കുന്നുണ്ട്.

ഉയര്‍ന്ന മലയോര മേഖലകളിലും കടുത്ത ഉഷ്ണമേഖലാ കാലാവസ്ഥയിലും ഒരുപോലെ മികച്ച രീതിയില്‍ പ്രവര്‍ത്തിക്കാന്‍ ശേഷിയുള്ളവയാണ് ഇവ. 7.5 ടണ്‍ ചരക്കുകളോ, 50 യാത്രക്കാരെയോ അല്ലെങ്കില്‍ 42 പാരാട്രൂപ്പര്‍മാരെയോ ഒരേസമയം വഹിക്കാന്‍ കഴിയുന്ന എ.എന്‍-32 വിമാനങ്ങള്‍, വടക്കുകിഴക്കന്‍ സംസ്ഥാനങ്ങളിലെ ദുര്‍ഘടമായ ഉള്‍പ്രദേശങ്ങളില്‍ അവശ്യസാധനങ്ങള്‍ എത്തിക്കുന്നതിനാണ് പ്രധാനമായും ഉപയോഗിക്കുന്നത്.

അസമില്‍ തുടരുന്ന വിമാനാപകടങ്ങള്‍

മാസങ്ങള്‍ക്ക് മുന്‍പ് അസമിലെ കാര്‍ബി ആംഗ്ലോങ് ജില്ലയില്‍ വ്യോമസേനയുടെ സുഖോയ് (Sukhoi Su-30MKI) യുദ്ധവിമാനം തകര്‍ന്ന് രണ്ട് പൈലറ്റുമാര്‍ കൊല്ലപ്പെട്ടിരുന്നു. മാര്‍ച്ച് 5-ന് ഇതേ ജോര്‍ഹട്ട് എയര്‍ഫോഴ്‌സ് സ്റ്റേഷനില്‍ നിന്ന് പതിവ് പരിശീലന പറക്കലിനായി ഉയര്‍ന്ന യുദ്ധവിമാനത്തിന് ഗ്രൗണ്ട് കണ്‍ട്രോളുമായുള്ള ബന്ധം നഷ്ടപ്പെടുകയും പിന്നീട് ജോര്‍ഹട്ടില്‍ നിന്ന് 60 കിലോമീറ്റര്‍ അകലെയുള്ള മലയോര മേഖലയില്‍ തകര്‍ന്നു വീഴുകയുമായിരുന്നു. ഇതിന് പിന്നാലെയാണ് ഇപ്പോള്‍ ജോര്‍ഹട്ട് എയര്‍ഫോഴ്‌സ് സ്റ്റേഷനിലെ റണ്‍വേയ്ക്ക് സമീപം തന്നെ വീണ്ടുമൊരു അപകടം ഉണ്ടായിരിക്കുന്നത്. സംഭവത്തില്‍ വ്യോമസേന ഉന്നതതല അന്വേഷണം പ്രഖ്യാപിച്ചിട്ടുണ്ട്.