ബിജെപി വക്താവിനെ ബോംബെ ഹൈക്കോടതി ജഡ്ജിയാക്കി; ജുഡീഷ്യറിയുടെ വിശ്വാസ്യത ചോദ്യംചെയ്ത് പ്രതിപക്ഷം

മുംബൈ: ബിജെപി വക്താവായി ചാനലുകളില്‍ പ്രത്യക്ഷപ്പെടുകയും സോഷ്യല്‍മീഡിയയില്‍ പാര്‍ട്ടിക്ക് വേണ്ടി പണിയെടുക്കുകയും ചെയ്ത അഭിഭാഷകയായ ആരതി സാഠേയെ ബോംബെ ഹൈക്കോടതി ജഡ്ജിയായി നിയമിച്ചത് വിവാദത്തില്‍.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ബോംബെ ഹൈക്കോടതിയിലെ ജഡ്ജിമാരായി അജിത് ഭഗ്വന്ത് റാവു കഡേഹങ്കര്‍, ശ്രീമതി ആരതി അരുണ്‍ സാഠേ, സുശീല്‍ മനോഹര്‍ ഘോഡേശ്വര്‍ എന്നിവരെ നിയമിക്കാനുള്ള നിര്‍ദ്ദേശത്തിന് 2025 ജൂലൈ 28 ന് നടന്ന സുപ്രീം കോടതി യോഗം ആണ് അംഗീകാരം നല്‍കിയത്.

ആരതി സാഠേയുടെ നിയമനം മഹാരാഷ്ട്രയില്‍ രാഷ്ട്രീയ കോളിളക്കം സൃഷ്ടിച്ചു. പ്രതിപക്ഷ നേതാക്കള്‍ എതിര്‍പ്പ് പ്രകടിപ്പിക്കുകയും ഇന്ത്യന്‍ ജുഡീഷ്യറി സംവിധാനത്തില്‍ നീതിയും നിഷ്പക്ഷതയും നിലനിര്‍ത്താന്‍ അവരെ നീക്കം ചെയ്യണമെന്ന് ആവശ്യപ്പെടുകയും ചെയ്തു.

മഹാരാഷ്ട്ര ബിജെപി വക്താവായി ആരതി സാഠേയെ നിയമിച്ചതിന്റെ സ്‌ക്രീന്‍ഷോട്ട് എംഎല്‍എയും എന്‍സിപി (എസ്പി) ജനറല്‍ സെക്രട്ടറിയുമായ രോഹിത് പവാര്‍ സോഷ്യല്‍മീഡിയയില്‍ പോസ്റ്റ് ചെയ്തതോടെയാണ്, വിവാദം ചൂടുപിടിച്ചത്.
ഭരണകക്ഷിക്ക് വേണ്ടി വാദിക്കുന്ന ഒരാളെ പൊതു വേദിയില്‍ നിന്ന് ജഡ്ജിയായി നിയമിക്കുന്നത് ജനാധിപത്യത്തിന് ഏറ്റവും വലിയ തിരിച്ചടിയാണെന്ന് രോഹിത് പവാര്‍ പറഞ്ഞു. ഇത്തരം നിയമനങ്ങള്‍ ഇന്ത്യന്‍ നീതിന്യായ വ്യവസ്ഥയുടെ നിഷ്പക്ഷതയില്‍ ദൂരവ്യാപകമായ പ്രത്യാഘാതങ്ങള്‍ ഉണ്ടാക്കുമെന്നും അദ്ദേഹം പറഞ്ഞു. ഇത് ജുഡീഷ്യറിയെ ഒരു രാഷ്ട്രീയ മേഖലയാക്കുന്നതിന് തുല്യമല്ലേ? – അദ്ദേഹം ചോദിച്ചു.

ആര്‍ക്കും അനിയന്ത്രിതമായ അധികാരം ഇല്ലെന്ന് ഉറപ്പുവരുത്തുന്നതിനും അധികാര കേന്ദ്രീകരണം തടയുന്നതിനും നിയന്ത്രണങ്ങളും സന്തുലിതാവസ്ഥയും നിലനിര്‍ത്തുന്നതിനും ഭരണഘടനയില്‍ അധികാര വിഭജന തത്വം ഉള്‍പ്പെടുത്തിയിട്ടുണ്ടെന്നും പവാര്‍ പറഞ്ഞു. ‘ഒരു രാഷ്ട്രീയ വക്താവിനെ ജഡ്ജിയായി നിയമിക്കുന്നത് അധികാര വിഭജന തത്വത്തെ ദുര്‍ബലപ്പെടുത്തുകയും ഭരണഘടനയെ അട്ടിമറിക്കാനുള്ള ശ്രമമായി മാറുകയും ചെയ്യുന്നില്ലേ?
ഹൈക്കോടതിയില്‍ ജഡ്ജിയായി നിയമിക്കപ്പെടുന്ന ഒരാള്‍ക്ക് രാഷ്ട്രീയ പശ്ചാത്തലവും ഭരണകക്ഷിയില്‍ ഒരു പദവിയും ഉള്ളപ്പോള്‍, നീതി നടപ്പാക്കുന്ന പ്രക്രിയ രാഷ്ട്രീയ പക്ഷപാതത്താല്‍ കളങ്കപ്പെടില്ലെന്ന് ആര്‍ക്കാണ് ഉറപ്പ് നല്‍കാന്‍ കഴിയുക? രാഷ്ട്രീയ നേതാവിന്റെ നിയമനം നീതി നടപ്പാക്കലിന്റെ മുഴുവന്‍ പ്രക്രിയയെക്കുറിച്ചും ചോദ്യങ്ങള്‍ ഉയര്‍ത്തുന്നില്ലേ? അദ്ദേഹം ചോദിച്ചു.
ബോംബെ ഹൈക്കോടതി ജഡ്ജിയായി ആരതി സാഠേയെ നിയമിച്ച നടപടി പുനഃപരിശോധിക്കണമെന്ന് അദ്ദേഹം സര്‍ക്കാരിനോട് ആവശ്യപ്പെട്ടു. ബഹുമാനപ്പെട്ട ചീഫ് ജസ്റ്റിസും ഇക്കാര്യത്തില്‍ മാര്‍ഗനിര്‍ദേശം നല്‍കണമെന്നും അദ്ദേഹം പറഞ്ഞു.

അതേസമയം, ആരതി സാഠേ മഹാരാഷ്ട്ര ബിജെപി വക്താവായിരുന്നു എന്നത് ശരിയാണെന്ന് മഹാരാഷ്ട്ര ബിജെപി മീഡിയ സെല്ലിന്റെ ചുമതലയുള്ള നവനാഥ് ബാംഗ് സ്ഥിരീകരിക്കുകയും ചെയ്തു. എന്നാല്‍ ബോംബെ ഹൈക്കോടതിയുടെ ജഡ്ജിയായി നിയമിക്കപ്പെടുന്നതിന് മുമ്പ് തന്നെ അവര്‍ പാര്‍ട്ടി വക്താവ് സ്ഥാനം രാജിവച്ചതായാണ് അദ്ദേഹം പറയുന്നത്.

The appointment of Advocate Arati Sathe as a judge of the Bombay High Court has sparked controversy after it emerged that she had been serving as the official spokesperson for the Maharashtra BJP. The Supreme Court of India, in its meeting held on July 28, 2025, approved the proposal for the appointment of Ajit Bhagwantrao Kadehankar, Ms. Arati Arun Sathe, and Sushil Manohar Ghodeswar as judges of Bombay HC.