ബെന്‍സ് കാര്‍ വാങ്ങില്ല; ഉമ്മയെയും ഉപ്പയെയും ഉംറ ചെയ്യാന്‍ പറഞ്ഞയക്കണം; ആഗ്രഹം വെളിപ്പെടുത്തി ലോക ബോക്‌സിങ് സ്വര്‍ണവേട്ടക്കാരി നിഖാത് സരിന്‍

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ന്യൂഡല്‍ഹി: ലോക ബോക്‌സിങ് ചാമ്പ്യന്‍ഷിപ്പില്‍ ജേതാവായതിന് പിന്നാലെ കിട്ടിയ സമ്മാനത്തുക ചിലവഴിക്കുന്നതിനെ കുറിച്ച് വെളിപ്പെടുത്തി നിഖാത് സരിന്‍. ലഭിച്ച സമ്മാനത്തുക മാതാപിതാക്കളെ ഉംറയ്ക്ക് അയക്കാനാണ് വിനിയോഗിക്കുകയെന്ന് അവര്‍ വ്യക്തമാക്കി. ഒരു ബെന്‍സ് കാര്‍ വാങ്ങണമെന്നതായിരുന്നു ആഗ്രഹം. എന്നാല്‍ ഉമ്മാക്കും ഉപ്പാക്കും വേണ്ടി താത്കാലികമായി ആ മോഹം മാറ്റിവെക്കുകയാണെന്ന് നിഖാത് സരിന്‍ അറിയിച്ചു.

‘ഒരു ബെന്‍സ് കാര്‍ വാങ്ങണമെന്നതായിരുന്നു ആഗ്രഹം. എന്നാല്‍ ഇപ്പോള്‍ ഥാര്‍ സമ്മാനമായി ലഭിച്ചിട്ടുണ്ട്. അതിനാല്‍ ബെന്‍സ് മോഹം തത്കാലത്തേക്ക് മാറ്റിവെക്കുകയാണ്. എനിക്ക് മാതാപിതാക്കളെ ഉംറയ്ക്ക് അയക്കണം’ നിഖാത് സരിന്‍ പറഞ്ഞു. ഒരു ലക്ഷം യുഎസ് ഡോളറും മഹീന്ദ്രയുടെ ഥാറുമാണ് നിഖാത് സരിന് സമ്മാനമായി ലഭിച്ചത്.

ലോക വനിതാ ബോക്‌സിങ് ചാമ്പ്യന്‍ഷിപ്പില്‍ സ്വര്‍ണനേട്ടത്തോടെ ഒരിക്കലൂടെ ചരിത്രം കുറിച്ചതിന് പിന്നാലെയാണ് നിഖാത് തന്റെ ആഗ്രഹങ്ങള്‍ വെളിപ്പെടുത്തിയത്. വനിതകളുടെ 50 കിലോ വിഭാഗത്തിലാണ് താരം സ്വര്‍ണം നേടിയത്. 2022 ബോക്‌സിങ് ചാമ്പ്യന്‍ഷിപ്പിന് പിന്നാലെ 2023 ലും സ്വര്‍ണം നേടാനായതിന്റെ സന്തോഷത്തിലാണ് നിഖാത് സരിന്‍.

ഫൈനലില്‍ വിയറ്റ്‌നാം താരമായ നുയന്‍ തി ടാമിനെ പരാജയപ്പെടുത്തിയാണ് നിഖാത് സരിന്‍ സ്വര്‍ണം നേടിയത്. ഇതോടെ ലോക ബോക്‌സിങ് ചാമ്പ്യന്‍ഷിപ്പുകളില്‍ തുടര്‍ച്ചയായി സ്വര്‍ണം നേടുന്ന രണ്ടാമത്തെ ഇന്ത്യന്‍ വനിതാ താരമായി നിഖാത് സരിന്‍ മാറി. മേരി കോമാണ് ഈ നേട്ടം കരസ്ഥമാക്കിയ ആദ്യ താരം. 2022 കോമണ്‍വെല്‍ത്ത് ഗെയിംസിലും നിഖാത് സ്വര്‍ണം നേടിയിരുന്നു.