”നീതി ഇപ്പോഴും അകലെ”: മംഗളൂരു ആള്‍ക്കൂട്ടക്കൊലപാതകത്തിന് ഒരു വര്‍ഷം; അധികൃതരുടെ വീഴ്ചയ്‌ക്കെതിരെ അഷ്‌റഫിന്റെ കുടുംബം

Mangaluru lynching മംഗളൂരു: മംഗളൂരുവില്‍ തീവ്ര ഹിന്ദുത്വ ഗ്രൂപ്പുകള്‍ ചേര്‍ന്ന് മലയാളി യുവാവായ മുഹമ്മദ് അഷ്‌റഫിനെ തല്ലിക്കൊന്നിട്ട് ഇന്ന് ഒരു വര്‍ഷം തികയുന്നു. കേസ് അട്ടിമറിക്കാന്‍ ശ്രമം നടക്കുന്നുവെന്നും അന്വേഷണത്തില്‍ ബോധപൂര്‍വ്വമായ കാലതാമസം വരുത്തുന്നുവെന്നും ആരോപിച്ച് അഷ്‌റഫിന്റെ കുടുംബം രംഗത്തെത്തി. ആള്‍ക്കൂട്ടക്കൊലപാതകങ്ങള്‍ക്കെതിരായ സുപ്രീം കോടതി മാര്‍ഗനിര്‍ദ്ദേശങ്ങള്‍ കര്‍ശനമായി നടപ്പിലാക്കണമെന്നും കുടുംബം ആവശ്യപ്പെട്ടു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

2025 ഏപ്രില്‍ 27-നാണ് പഴയ സാധനങ്ങള്‍ ശേഖരിക്കുന്ന ജോലി ചെയ്തിരുന്ന കാസര്‍കോട് സ്വദേശി മുഹമ്മദ് അഷ്‌റഫ് (36) മംഗളൂരുവില്‍ കൊല്ലപ്പെട്ടത്. നേരിയ മാനസിക അസ്വാസ്ഥ്യമുള്ള അഷ്‌റഫ്, ക്രിക്കറ്റ് കളിച്ചുകൊണ്ടിരുന്ന സംഘം കരുതിയിരുന്ന വെള്ളം എടുത്തു കുടിച്ചതാണ് അക്രമികളെ പ്രകോപിപ്പിച്ചത്. ബിജെപി കോര്‍പ്പറേറ്ററുടെ ഭര്‍ത്താവ് രവീന്ദ്ര നായക്, സച്ചിന്‍ ടി. എന്നിവരുടെ നേതൃത്വത്തിലുള്ള സംഘം ക്രിക്കറ്റ് ബാറ്റ് ഉള്‍പ്പെടെയുള്ള ആയുധങ്ങള്‍ ഉപയോഗിച്ച് അഷ്‌റഫിനെ ക്രൂരമായി മര്‍ദ്ദിക്കുകയായിരുന്നു. മര്‍ദ്ദനമേറ്റ് വീണ അഷ്‌റഫിനെ മരിച്ചെന്ന് കരുതി ഉപേക്ഷിച്ച് സംഘം കടന്നുകളഞ്ഞു. ആന്തരിക രക്തസ്രാവവും മാരകമായ പരിക്കുകളുമാണ് മരണകാരണമെന്ന് പോസ്റ്റ്മോര്‍ട്ടം റിപ്പോര്‍ട്ട് സ്ഥിരീകരിച്ചിരുന്നു.

പ്രചരിച്ച വ്യാജാരോപണങ്ങള്‍

അഷ്‌റഫ് ‘പാകിസ്ഥാന്‍ സിന്ദാബാദ്’ എന്ന് വിളിച്ചതാണ് അക്രമത്തിന് കാരണമെന്ന രീതിയില്‍ സംഭവത്തിന് പിന്നാലെ വ്യാപകമായ പ്രചാരണം നടന്നിരുന്നു. കര്‍ണാടക ആഭ്യന്തര മന്ത്രി ജി. പരമേശ്വരയും ആദ്യഘട്ടത്തില്‍ ഇതേ ആരോപണം ഉന്നയിച്ചത് വലിയ വിമര്‍ശനങ്ങള്‍ക്ക് വഴിവെച്ചു. എന്നാല്‍ ഈ ആരോപണം പച്ചക്കള്ളമാണെന്നും വര്‍ഗീയ സംഘര്‍ഷം ന്യായീകരിക്കാന്‍ കെട്ടിച്ചമച്ചതാണെന്നും വസ്തുതാന്വേഷണ സംഘങ്ങളും കുടുംബവും വ്യക്തമാക്കി.

കുടുംബത്തിന്റെ പരാതികള്‍

അഷ്‌റഫിന്റെ ചരമവാര്‍ഷികത്തോടനുബന്ധിച്ച് കുടുംബം പുറത്തിറക്കിയ പ്രസ്താവനയില്‍ കേരള സര്‍ക്കാരിന്റെ ഭാഗത്തുനിന്ന് കാര്യമായ ഇടപെടലുകള്‍ ഉണ്ടായില്ലെന്നും കര്‍ണാടക സര്‍ക്കാരില്‍ സമ്മര്‍ദ്ദം ചെലുത്തുന്നതില്‍ വീഴ്ച സംഭവിച്ചെന്നും കുടുംബം ആരോപിച്ചു.

കേസ് അട്ടിമറിക്കാന്‍ ശ്രമം: തുടക്കം മുതല്‍ കേസ് ഒതുക്കിത്തീര്‍ക്കാന്‍ ശ്രമങ്ങള്‍ നടന്നു. മനുഷ്യാവകാശ സംഘടനകളുടെ ഇടപെടല്‍ മൂലമാണ് കേസ് മുന്നോട്ടുപോയത്.
പ്രതികളുടെ ജാമ്യം: ആകെ 21 പ്രതികളെ അറസ്റ്റ് ചെയ്‌തെങ്കിലും പ്രധാനികളൊഴികെ മിക്കവര്‍ക്കും ജാമ്യം ലഭിച്ചു. ഇത് തടയുന്നതില്‍ കര്‍ണാടക സര്‍ക്കാരിന് വീഴ്ച പറ്റി.
അന്വേഷണത്തിലെ താമസം: ഒരു വര്‍ഷമായിട്ടും അന്വേഷണം പൂര്‍ത്തിയാക്കി അനുബന്ധ കുറ്റപത്രം സമര്‍പ്പിക്കാത്തത് നീതി നിഷേധമാണെന്ന് കുടുംബം കുറ്റപ്പെടുത്തി.

നിയമപോരാട്ടം തുടരുന്നു

പ്രതികളുടെ ജാമ്യം റദ്ദാക്കണമെന്നും കേസ് അതിവേഗ കോടതിയില്‍ (Fast-track court) പരിഗണിക്കണമെന്നും ആവശ്യപ്പെട്ട് സുപ്രീം കോടതിയെ സമീപിക്കാനൊരുങ്ങുകയാണ് കുടുംബം. ആള്‍ക്കൂട്ടക്കൊലപാതകങ്ങള്‍ക്കെതിരെ തെഹ്സീന്‍ പൂനവാല കേസില്‍ സുപ്രീം കോടതി നല്‍കിയ മാര്‍ഗനിര്‍ദ്ദേശങ്ങള്‍ പാലിക്കപ്പെടുന്നുണ്ടെന്ന് ഉറപ്പാക്കണമെന്നും അവര്‍ ആവശ്യപ്പെട്ടു. ‘ഈ പോരാട്ടം അഷ്‌റഫിന് വേണ്ടി മാത്രമല്ല, ഇന്ത്യയിലുടനീളം പടരുന്ന ആള്‍ക്കൂട്ടക്കൊലപാതകങ്ങള്‍ക്കെതിരായ നീതി തേടല്‍ കൂടിയാണ്,’ കുടുംബം പ്രസ്താവനയില്‍ പറഞ്ഞു.

News Tag Live യുട്യൂബ് ചാനല്‍ Subscribe ചെയ്യുക