ആരാണ് ഇന്ത്യയിൽ ചേലാകർമത്തിന് നിർബന്ധിക്കുന്നത്?

മസ്ഹര്‍ എഴുതുന്നു

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മുസ്ലിം ഐഡൻറിറ്റിയെ പൊതു വ്യവഹാര മണ്ഡലത്തിൽ ചോദ്യം ചെയ്യുന്ന എക്സ് മുസ് ലിം/എസ്സൻസ് സംഘ് പരിവാറിന് വേണ്ടി വിടുപണി ചെയ്യുന്നവരാണെന്നതിൽ ആർക്കും സംശയമില്ല . മുസ്ലിം സ്വത്വത്തെ പാടെ നിഷ്കാസനം ചെയ്ത് ഹിന്ദുത്വ രാഷ്ട്രത്തിലേക്ക് സംഘ്പരിവാറിന് എത്തണമെങ്കിൽ സ്വത്വാഭിമാനമുള്ള മുസ്ലിം ന്യൂനപക്ഷമാണ് പ്രധാന തടസ്സം. മെരുക്കിയെടുക്കാൻ കാരാഗ്രഹവും കരിനിയമവും ബുൾഡോസറും യഥേഷ്ടം ഉപയോഗിച്ചിട്ടും അത്ര പെട്ടെന്ന് കീഴൊതുങ്ങുന്ന പ്രകൃതമല്ല മുസ്ലിം ന്യൂനപക്ഷത്തിൻ്റേത്. അവരുടെ പൂർവ ചരിത്രമാകട്ടെ അതീവ പോരാട്ടത്തിൻ്റേതുമാണ്. അക്കാര്യം മോഹൻഭാഗവത് ഈയിടെ അടിവരയിട്ടതുമാണ്. തന്നെയുമല്ല മഹാഭൂരിപക്ഷം വരുന്ന ഹിന്ദു സമാജം ഉൾകൊള്ളുന്ന മതനിരപേക്ഷ സമൂഹം മുസ്ലിംകളെ അകാരുണയായി വേട്ടയാടുന്നതിൽ ഖിന്നരുമാണ്.

ഈ പാശ്ചാത്തലത്തിലാണ് കുലംകുത്തികളേയും ഏഴാംപത്തികളേയും ഉപയോഗിച്ച് മുസ്ലിം ന്യൂനപക്ഷത്തിൻ്റെ ഓരോ വ്യക്തിനിയമങ്ങളേയും പ്രശ്നവത്കരിക്കുക എന്ന അജണ്ടയിലേക്ക് പോകുന്നതിന് തുടക്കം കുറിച്ചത്. മുത്വലാഖ് വിഷയം അങ്ങനെ മുസ്ലിം സ്ത്രീകളുടെ ഏറ്റവും വലിയ പ്രശ്നമായി എഴുന്നള്ളിച്ച് നിയമം മൂലം റദ്ദ് ചെയ്തത് അതിൻ്റെ മകുടോദാഹരണമാണ്. ഹിജാബ് വിഷയത്തിലും ഇതേ തന്ത്രമാണ് സംഘ് പരിവാർ പയറ്റിയത്.കർണാടകയിൽ സർക്കാർ സ്കൂളുകളിൽ ഹിജാബ് വിലക്കേർപ്പെടുത്തി ഹിജാബ് അജണ്ട വിജയത്തിൻ്റെ വക്കിലെത്തിയിട്ടുണ്ട്. അറിഞ്ഞോ അറിയാതെയോ സംഘപരിവാറിന്റെ ഈ വക വിഷലിപ്ത നീക്കങ്ങൾക്ക് ഇടത്/ലിബറൽ/പുരോഗമന ഗ്രൂപ്പുകളും കോടാലി കൈയാകാറാണ് പതിവു കാഴ്ച. ഇതെല്ലാം ഹിന്ദുത്വ മേൽകൈയുള്ള ഏകസിവിൽ കോഡിന് കളമൊരുക്കുക എന്ന സൃഗാല ബുദ്ധിയുടെ ഭാഗമാണ് താനും.

ഇതിൻ്റെ ഏറ്റവും ഒടുവിലത്തെ,(അവാസനത്തേതല്ല) ചേലാകർമ്മത്തെ പ്രശ്നവത്കരിച്ച് പിശാചുവത്കരിക്കുക എന്നത്. ആദ്യം കോടതികളുടെ മുന്നിൽ എത്തിക്കുക എന്നതാണ് പുതു ഇന്ത്യയിലെ എളുപ്പ മർഗ്ഗം. കോടതികളുടെ ഏതു പരാമർശവും സംഘ് പരിവാറിൻ്റെ ഹിഡൻ അജണ്ടക്ക് ഉത്തേജകമാകും എന്നത് നമ്മുടെ മുന്നിലെ പച്ചയായ യാഥാർത്ഥ്യങ്ങളാണ്. കോടതികളിലൂടെ കടന്ന് മണ്ണൊരുക്കി, നിയമനിർമാണത്തിലെത്തിക്കുക എന്നത് പുതിയ കാലത്ത് ഇന്ത്യൻ ഫാഷിസം വിജയിപ്പിച്ചെടുത്ത മോഡലാണ്. പുരുഷ ചേലാകർമത്തെ കോടതിയിലെത്തിച്ചവരും അവർക്ക് പിന്നിൽ പ്രവർത്തിക്കുന്നവരും ലക്ഷ്യമിടുന്നത് മുസ്ലിം ഐഡൻ്റിറ്റിയെ ക്രൈസിസിലെത്തിക്കുക എന്നത് തന്നെയാണ്. ചേലാകർമ്മത്തിൻ്റെ ശാസ്ത്രീയതയോ, ശുദ്ധിപരമോ ലൈംഗികപരതയോ ആയ ഉപവിഷയങ്ങൾക്കപ്പുറം , അതൊരു സെമിറ്റിക് ഐഡന്റിറ്റിയുടെ തുടർച്ചയാണ് എന്നതാണ്. അല്ലെങ്കിലും ആരാണ് ഇന്ത്യയിൽ ചേലാകർമത്തിന് നിർബന്ധിക്കുന്നത്?