26
Jan 2026
Mon
Supreme Court denies bail to Umar Khalid ന്യൂഡല്ഹി: ഡല്ഹി കലാപ കേസില് ഉമര് ഖാലിദിനും ഷര്ജീല് ഇമാമിനും ജാമ്യമില്ല. ഗുല്ഫിഷ ഫാത്തിമ, മീരാന് ഹൈദര്, ശിഫാഉര്റഹ്മാന്, മുഹമ്മദ് സലീം ഖാന്, ശദാബ് അഹ്മദ് അടക്കമുള്ളവര്ക്ക് കോടതി ജാമ്യം അനുവദിച്ചു.
 |
|
2020 ഫെബ്രുവരിയിലെ വടക്കുകിഴക്കന് ഡല്ഹി കലാപത്തിന് പിന്നിലെ ഗൂഢാലോചനയില് ഉമര് ഖാലിദും ഷര്ജീല് ഇമാമും ‘ഉന്നത തലത്തിലുള്ള പങ്കാളിത്തം’ വഹിച്ചവരാണെന്ന് നിരീക്ഷിച്ചാണ് സുപ്രീം കോടതി തിങ്കളാഴ്ച ഇരുവര്ക്കും ജാമ്യം നിഷേധിച്ചത്. അതേസമയം, ഈ കേസിലെ മറ്റ് അഞ്ച് പ്രതികള്ക്ക് കോടതി ഉപാധികളോടെ ജാമ്യം അനുവദിച്ചു.
ജസ്റ്റിസുമാരായ അരവിന്ദ് കുമാര്, പ്രസന്ന ബി. വരാലെ എന്നിവരടങ്ങിയ ബെഞ്ചാണ് ഗുല്ഫിഷ ഫാത്തിമ, മീരാന് ഹൈദര്, ഷിഫ ഉര് റഹ്മാന്, മുഹമ്മദ് സലീം ഖാന്, ഷദാബ് അഹമ്മദ് എന്നിവര്ക്ക് ജാമ്യം നല്കിയത്. ഡിസംബര് 10-ന് ജാമ്യാപേക്ഷയില് വാദം പൂര്ത്തിയാക്കി വിധി പറയാന് മാറ്റിവെച്ചിരിക്കുകയായിരുന്നു.
കോടതിയുടെ പ്രധാന നിരീക്ഷണങ്ങള്
പങ്കാളിത്തത്തിലെ വ്യത്യാസം: മറ്റ് പ്രതികളില് നിന്ന് വ്യത്യസ്തമായ നിലയിലാണ് ഉമര് ഖാലിദിന്റെയും ഷര്ജീല് ഇമാമിന്റെയും പങ്കെന്ന് കോടതി ചൂണ്ടിക്കാട്ടി. ഗൂഢാലോചനയുടെ ആസൂത്രണം, ആളുകളെ സംഘടിപ്പിക്കല്, തന്ത്രപരമായ ദിശാബോധം നല്കല് എന്നിവയില് ഇവര്ക്ക് വ്യക്തമായ പങ്കുണ്ടെന്ന് പ്രഥമദൃഷ്ട്യാ ബോധ്യപ്പെട്ടതായി കോടതി പറഞ്ഞു.
യുഎപിഎ (UAPA) നിയമം: യുഎപിഎ നിയമത്തിലെ സെക്ഷന് 43D(5) പ്രകാരം, പ്രതികള്ക്കെതിരെയുള്ള ആരോപണങ്ങള് പ്രഥമദൃഷ്ട്യാ സത്യമാണെന്ന് കോടതിക്ക് ബോധ്യപ്പെട്ടാല് ജാമ്യം നല്കാന് കഴിയില്ല. ഖാലിദിന്റെയും ഇമാമിന്റെയും കാര്യത്തില് ഈ നിയമം ബാധകമാണെന്ന് കോടതി വിലയിരുത്തി.
വിവേചനം വേണ്ട: വിചാരണയ്ക്ക് മുന്പുള്ള തടങ്കല് വിവേചനരഹിതമോ യാന്ത്രികമോ ആകരുത്. ഓരോ പ്രതിയുടെയും പങ്കാളിത്തം കൃത്യമായി പരിശോധിച്ച ശേഷമാണ് കോടതി ഇത്തരമൊരു തീരുമാനത്തില് എത്തിയത്.
പ്രതിഭാഗത്തിന്റെ വാദം
ഉമര് ഖാലിദിന് വേണ്ടി ഹാജരായ മുതിര്ന്ന അഭിഭാഷകന് കപില് സിബല്, ഡല്ഹി കലാപവുമായി ബന്ധപ്പെട്ട് 751 എഫ്ഐആറുകള് രജിസ്റ്റര് ചെയ്തിട്ടുണ്ടെന്നും എന്നാല് ഖാലിദിനെ ഒരെണ്ണത്തില് മാത്രമാണ് പ്രതിയാക്കിയിട്ടുള്ളതെന്നും വാദിച്ചു. കലാപം നടന്ന സമയത്ത് ഖാലിദ് ഡല്ഹിയില് ഉണ്ടായിരുന്നില്ലെന്നും അദ്ദേഹത്തിന്റെ പക്കല് നിന്ന് ആയുധങ്ങളോ മറ്റ് തെളിവുകളോ കണ്ടെടുത്തിട്ടില്ലെന്നും സിബല് കോടതിയെ അറിയിച്ചു.
ഡല്ഹി ഹൈക്കോടതിയുടെ വിധി
സെപ്റ്റംബര് 2-ന് ഡല്ഹി ഹൈക്കോടതിയും ഇവരുടെ ജാമ്യം തള്ളിയിരുന്നു. 2019 ഡിസംബറില് പൗരത്വ നിയമ ഭേദഗതി ബില് പാസായതിന് പിന്നാലെ വാട്സ്ആപ്പ് ഗ്രൂപ്പുകള് ഉണ്ടാക്കിയും ലഘുലേഖകള് വിതരണം ചെയ്തും പ്രതിഷേധങ്ങള്ക്കും റോഡ് ഉപരോധത്തിനും ആഹ്വാനം ചെയ്തത് ഖാലിദും ഇമാമുമാണെന്ന് ഹൈക്കോടതി നിരീക്ഷിച്ചിരുന്നു. ഇവര് ഗൂഢാലോചനയുടെ ‘ബൗദ്ധിക ശില്പികള്’ (Intellectual architects) ആണെന്നായിരുന്നു പ്രോസിക്യൂഷന് വാദം.
2020 സെപ്റ്റംബറിലാണ് ഉമര് ഖാലിദിനെ അറസ്റ്റ് ചെയ്തത്. അന്ന് മുതല് അദ്ദേഹം ജയിലില് കഴിയുകയാണ്. ഡല്ഹി കലാപത്തില് 53 പേര് കൊല്ലപ്പെടുകയും നൂറുകണക്കിന് ആളുകള്ക്ക് പരിക്കേല്ക്കുകയും ചെയ്തിരുന്നു.
Latest News
More Stories
All Rights Reserved © 2022