ഉധംപൂരിൽ ഏറ്റുമുട്ടൽ: രണ്ട് ഭീകരരെ വധിച്ചു; തിരച്ചിൽ ശക്തമാക്കി സുരക്ഷാസേന

Udhampur Encounter ജമ്മു കശ്മീരിലെ ഉധംപൂർ ജില്ലയിലുണ്ടായ ഏറ്റുമുട്ടലിൽ രണ്ട് ഭീകരരെ സുരക്ഷാസേന വധിച്ചു. ബുധനാഴ്ച വൈകുന്നേരം ഉധംപൂരിലെ മജൽത പ്രദേശത്ത് സംശയാസ്പദമായ രീതിയിൽ ആളുകളുടെ നീക്കം ശ്രദ്ധയിൽപ്പെട്ടതിനെ തുടർന്ന് സുരക്ഷാസേന പ്രദേശം വളഞ്ഞ് പരിശോധന ആരംഭിക്കുകയായിരുന്നു. തുടർന്നുണ്ടായ വെടിവെയ്പ്പിലാണ് ഭീകരർ കൊല്ലപ്പെട്ടത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പ്രദേശത്ത് ഇപ്പോഴും പരിശോധന തുടരുകയാണെന്ന് ഉദ്യോഗസ്ഥർ അറിയിച്ചു. കൊല്ലപ്പെട്ട ഭീകരരെ തിരിച്ചറിഞ്ഞിട്ടില്ല. ജമ്മു കശ്മീർ പൊലീസും ഇന്ത്യൻ സൈന്യത്തിന്റെ പ്രത്യേക പാര ട്രൂപ്പേഴ്സും ചേർന്നാണ് പ്രാഥമികമായി ഓപ്പറേഷൻ ആരംഭിച്ചത്. ഏറ്റുമുട്ടൽ ശക്തമായതോടെ കൂടുതൽ സൈന്യത്തെ പ്രദേശത്ത് വിന്യസിച്ചു. ഇന്ത്യൻ സൈന്യം, സിആർപിഎഫ്, ജമ്മു കശ്മീർ പൊലീസിന്റെ സ്പെഷ്യൽ ഓപ്പറേഷൻസ് ഗ്രൂപ്പ് (SOG) എന്നിവർ സംയുക്തമായാണ് പ്രദേശം വളഞ്ഞ് പരിശോധന നടത്തുന്നത്.

രാജൗരിയിൽ ലഷ്കറെ തൊയ്ബയുമായി (LeT) ബന്ധമുള്ള ഭീകരവിരുദ്ധ ശൃംഖല തകർത്തതിന് പിന്നാലെ പീർ പഞ്ജാൽ മേഖലയിൽ സുരക്ഷ ശക്തമാക്കിയിരുന്നു. സെപ്റ്റംബർ 15-ന് പ്രദേശത്ത് പ്രവർത്തിച്ചിരുന്ന ഭീകര മൊഡ്യൂളുമായി ബന്ധപ്പെട്ട് സക്കീർ ഹുസൈൻ, മുഹമ്മദ് ആസാം, മുഹമ്മദ് മുഷ്താഖ് എന്നിവരെ രാജൗരി പൊലീസ് അറസ്റ്റ് ചെയ്തിരുന്നു. ഇതിന് തൊട്ടുപിന്നാലെയാണ് ഉധംപൂരിൽ ഏറ്റുമുട്ടലുണ്ടായത്.

പ്രദേശത്ത് കൂടുതൽ ഭീകരർ ഒളിച്ചിരിപ്പുണ്ടോ എന്നറിയാൻ സ്നിഫർ നായ്ക്കളെയും വ്യോമ നിരീക്ഷണ സംവിധാനങ്ങളെയും ഉപയോഗിച്ച് സുരക്ഷാസേന പരിശോധന നടത്തുന്നുണ്ട്. ഉധംപൂർ-റിയാസി മേഖലയിലെ പ്രധാന റോഡുകളിലും തന്ത്രപ്രധാന പാതകളിലും അതീവ ജാഗ്രതാ നിർദ്ദേശവും വാഹന പരിശോധനയും ഏർപ്പെടുത്തിയിട്ടുണ്ട്.

പാകിസ്ഥാൻ ഭീകരരുടെ സാന്നിധ്യം റിപ്പോർട്ട് ചെയ്തതിനെ തുടർന്ന് ഉധംപൂർ, റിയാസി, റംബാൻ, കഠ്വ, പൂഞ്ച്, രാജൗരി എന്നീ മലയോര ജില്ലകളിൽ സുരക്ഷാസേന പ്രത്യേക നിരീക്ഷണം നടത്തുന്നുണ്ട്. കഴിഞ്ഞ ആറുമാസമായി തുടരുന്ന ഭീകരവിരുദ്ധ ഓപ്പറേഷനുകളിൽ മുൻനിര ഭീകരരെയടക്കം വധിക്കാൻ സുരക്ഷാസേനയ്ക്ക് സാധിച്ചിട്ടുണ്ട്. സുരക്ഷാസേനയ്ക്കും സാധാരണക്കാർക്കും നേരെ ആക്രമണം നടത്താൻ ഭീകരർക്ക് അവസരം നൽകാതെ അവരെ നിരന്തരം പ്രതിരോധത്തിലാക്കാൻ ഈ തിരിച്ചിലുകളിലൂടെ സാധിക്കുന്നുണ്ടെന്ന് സൈന്യം വ്യക്തമാക്കി.

Tags: Udhampur Encounter, Jammu and Kashmir, Terrorists Killed, Indian Army, J&K Police, Rajouri LeT Module, Kashmir Security News, Breaking News Malayalam

News Tag Live യുട്യൂബ് ചാനല്‍ Subscribe ചെയ്യുക