പരമ്പരാഗത കുറ്റാന്വേഷണ മാതൃകകളെ മാറ്റി ക്രൈം ഫിക്ഷൻ; ഷാർജ പുസ്തകമേളയിൽ എഴുത്തുകാർ

പരമ്പരാഗത കുറ്റാന്വേഷകരെയും പരിചിതമായ പശ്ചാത്തലങ്ങളെയും മറികടന്ന് പുതിയ കഥാപാത്രങ്ങളിലൂടെയും ആഖ്യാനരീതികളിലൂടെയും ക്രൈം ഫിക്ഷൻ വളരുകയാണെന്ന് എഴുത്തുകാരായ വസീം ഖാനും ഡേവിഡ് ഫെനലും. 45-ാമത് ഷാർജ അന്താരാഷ്ട്ര പുസ്തകമേളയിൽ നടന്ന ‘ഹൂ ഗെറ്റ്സ് ടു സോൾവ് ദ ക്രൈം? ദ ഡിറ്റക്ടീവ് ബിയോണ്ട് ദ ഓൾഡ് ടെംപ്ലേറ്റ്’ എന്ന സെഷനിലായിരുന്നു ഇരുവരുടെയും നിരീക്ഷണം. പത്രപ്രവർത്തകയും എഴുത്തുകാരിയുമായ എലിസബത്ത് എസ്. മൂർ മോഡറേറ്ററായ ചർച്ചയിൽ കുറ്റാന്വേഷണ നോവലുകളിലെ കഥാപാത്രങ്ങൾ, പശ്ചാത്തലങ്ങൾ, ദുരൂഹതയും ഉദ്വേഗവും സൃഷ്ടിക്കുന്ന പുതിയ രീതികൾ എന്നിവ ചർച്ചയായി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ബ്രിട്ടീഷ് എഴുത്തുകാരനായ വസീം ഖാൻ തന്റെ നോവലുകളിലൂടെ അവതരിപ്പിച്ച ഇൻസ്പെക്ടർ പെർസിസ് വാഡിയ എന്ന കഥാപാത്രത്തെക്കുറിച്ച് വിശദീകരിച്ചു. സ്വാതന്ത്ര്യാനന്തര ഇന്ത്യയിലെ ബോംബെയിൽ പ്രവർത്തിക്കുന്ന ആദ്യത്തെ സാങ്കൽപ്പിക വനിതാ പൊലീസ് കുറ്റാന്വേഷകയാണ് പെർസിസ് വാഡിയ. ആദ്യരൂപത്തിൽ പുരുഷ കഥാപാത്രമായാണ് പെർസിസിനെ വിഭാവനം ചെയ്തിരുന്നതെങ്കിലും പിന്നീട് സ്ത്രീയാക്കാൻ തീരുമാനിക്കുകയായിരുന്നുവെന്ന് അദ്ദേഹം പറഞ്ഞു. 1950-കളിലെ ഇന്ത്യയിൽ പുരുഷന്മാർ ആധിപത്യം പുലർത്തിയിരുന്ന പൊലീസ് സംവിധാനത്തിൽ ഒരു വനിതാ ഉദ്യോഗസ്ഥയെ അവതരിപ്പിക്കുന്നത് കഥയ്ക്ക് കൂടുതൽ സംഘർഷങ്ങളും സാമൂഹിക പശ്ചാത്തലവും നൽകുമെന്ന് അദ്ദേഹം കൂട്ടിച്ചേർത്തു.

ബെൽഫാസ്റ്റിൽ ജനിച്ച എഴുത്തുകാരൻ ഡേവിഡ് ഫെനൽ കുറ്റാന്വേഷണ കഥകളിൽ പശ്ചാത്തലത്തിനുള്ള പ്രാധാന്യം വിശദീകരിച്ചു. ഗോഥിക് സാഹിത്യത്തിലെ പ്രമേയങ്ങളും അന്തരീക്ഷവുമാണ് തന്റെ രചനകളെ സ്വാധീനിക്കുന്നതെന്ന് അദ്ദേഹം പറഞ്ഞു. തന്റെ കൃതികളിൽ പശ്ചാത്തലം വെറുമൊരു സ്ഥലമല്ലെന്നും കഥയിലെ ഒരു കഥാപാത്രത്തെപ്പോലെയാണ് പ്രവർത്തിക്കുന്നതെന്നും അദ്ദേഹം അഭിപ്രായപ്പെട്ടു. 2026-ൽ പുറത്തിറങ്ങിയ ഓൾ കില്ലേഴ്സ് എബോർഡ് ഉൾപ്പെടെയുള്ള കൃതികളിൽ ഈ സമീപനം പ്രകടമാണെന്നും അദ്ദേഹം വ്യക്തമാക്കി.

കുറ്റാന്വേഷണ സാഹിത്യത്തിൽ പുതിയ കഥാപാത്രങ്ങളെയും വ്യത്യസ്ത പശ്ചാത്തലങ്ങളെയും പരീക്ഷിക്കുന്നതിലൂടെ വായനക്കാർക്ക് കൂടുതൽ സങ്കീർണവും ആകർഷകവുമായ ദുരൂഹതകൾ സമ്മാനിക്കാൻ കഴിയുമെന്ന് ചർച്ച വിലയിരുത്തി. പരമ്പരാഗത രീതികളെ ചോദ്യം ചെയ്തുകൊണ്ട് ക്രൈം ഫിക്ഷൻ പുതിയ ആഖ്യാനസാധ്യതകൾ തേടുകയാണെന്നും എഴുത്തുകാർ അഭിപ്രായപ്പെട്ടു.

News Tag Live യുട്യൂബ് ചാനല്‍ Subscribe ചെയ്യുക