ഇതു താന്‍ടാ ഗോള്‍കീപ്പര്‍; സൂപ്പര്‍മാനായി എലോയ് റൂം, കുറസാവോയ്ക്ക് ആദ്യ ലോക കപ്പ് പോയിന്റ്

കാന്‍സസ് സിറ്റി: ഗോള്‍വലയ്ക്ക് മുന്നില്‍ ചൈനീസ് മതില്‍ തീര്‍ത്ത ഗോള്‍കീപ്പര്‍ എലോയ് റൂമിന്റെ അവിശ്വസനീയ പ്രകടനത്തിന്റെ കരുത്തില്‍ ഫിഫ ലോകകപ്പില്‍ ചരിത്രത്തിലാദ്യമായി പോയിന്റ് നേടി കുഞ്ഞന്‍ രാജ്യമായ കുറസാവോ. കരുത്തരായ ഇക്വഡോറിനെ ഗോള്‍രഹിത സമനിലയിലാണ് (00) കുറസാവോ തളച്ചത്. മത്സരത്തില്‍ ഉടനീളം ഇക്വഡോര്‍ നടത്തിയ 15 ഓണ്‍-ടാര്‍ഗറ്റ് ഷോട്ടുകളും തടുത്തിട്ട 37-കാരനായ റൂം, ഒരു ലോകകപ്പ് മത്സരത്തില്‍ ഏറ്റവും കൂടുതല്‍ സേവുകള്‍ നടത്തുന്ന ഗോള്‍കീപ്പറെന്ന റെക്കോര്‍ഡിനൊപ്പമെത്തി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഗ്രൂപ്പ് ഘട്ടത്തിലെ മറ്റൊരു മത്സരത്തില്‍ ജര്‍മ്മനി ഐവറി കോസ്റ്റിനെ പരാജയപ്പെടുത്തിയതോടെ, നോക്കൗട്ട് പ്രതീക്ഷകള്‍ നിലനിര്‍ത്താന്‍ കുറസാവോയ്ക്കും ഇക്വഡോറിനും ഈ മത്സരത്തില്‍ വിജയം അനിവാര്യമായിരുന്നു. മത്സരത്തില്‍ 75 ശതമാനം പന്തടക്കവുമായി ഇക്വഡോര്‍ ആധിപത്യം പുലര്‍ത്തിയെങ്കിലും റൂമിനെ മറികടക്കാന്‍ അവര്‍ക്കായില്ല. ഫൈനല്‍ വിസില്‍ മുഴങ്ങിയതോടെ ചരിത്രനേട്ടത്തിന്റെ ആഹ്ലാദത്തില്‍ കുറസാവോ താരങ്ങള്‍ റൂമിനെ ഓടിയെത്തി കെട്ടിപ്പിടിക്കുകയായിരുന്നു.

ഇക്വഡോറിന്റെ ആക്രമണങ്ങളെ തടുത്തിട്ട് ‘സൂപ്പര്‍മാന്‍’

നെതര്‍ലന്‍ഡ്‌സില്‍ നിന്നും കളി മാറി കുറസാവോ ദേശീയ ടീമിലെത്തിയ ആദ്യ താരം കൂടിയായ എലോയ് റൂമിന്റെ കരിയറിലെ ഏറ്റവും മികച്ച പ്രകടനത്തിനാണ് കാന്‍സസ് സിറ്റി സാക്ഷ്യം വഹിച്ചത്. ഇക്വഡോറിന്റെ എക്കാലത്തെയും മികച്ച ഗോള്‍വേട്ടക്കാരനായ എന്നെര്‍ വലന്‍സിയയ്ക്ക് ലഭിച്ച സുവര്‍ണ്ണാവസരം റൂം അതിസാഹസികമായി തടഞ്ഞതോടെയാണ് ഇക്വഡോറിന്റെ നിര്‍ഭാഗ്യങ്ങള്‍ തുടങ്ങിയത്. അമേരിക്കയിലെ രണ്ടാം ഡിവിഷന്‍ ലീഗില്‍ കളിക്കുന്ന റൂം, സ്‌പെയിനെതിരെ കേപ് വെര്‍ദെയുടെ ഗോള്‍കീപ്പര്‍ വോസീഞ്ഞ പുറത്തെടുത്തതിന് സമാനമായ പ്രകടനമാണ് കാഴ്ചവെച്ചത്.

മത്സരത്തിന്റെ 59-ാം മിനിറ്റില്‍ റൂം നടത്തിയ ഒരു സേവിന് പിന്നാലെ കുറസാവോ നടത്തിയ പ്രത്യാക്രമണത്തില്‍ ലിയാന്‍ഡ്രോ ബക്കൂന, കോമനെന്‍സിയ, ലോകടിയ എന്നിവരുടെ തുടരന്‍ ഷോട്ടുകള്‍ ഇക്വഡോര്‍ ഗോളി ഗാലിന്‍ഡെസ് കഷ്ടിച്ചാണ് രക്ഷപെടുത്തിയത്. 65-ാം മിനിറ്റില്‍ വലന്‍സിയയുടെ മറ്റൊരു ഗോള്‍ശ്രമം കൂടി തടഞ്ഞതോടെ റൂം തന്റെ പത്താമത്തെ സേവ് പൂര്‍ത്തിയാക്കി. 84-ാം മിനിറ്റില്‍ വലന്‍സിയയ്ക്ക് ലഭിച്ച മറ്റൊരു അവസരം പോസ്റ്റിന് പുറത്തേക്ക് പോവുകയായിരുന്നു. മത്സരത്തിന്റെ അവസാന നിമിഷങ്ങളില്‍ ഇക്വഡോര്‍ പെനാല്‍റ്റിക്കായി വാദിച്ചെങ്കിലും വിഎആര്‍ (VAR) പരിശോധനയ്ക്ക് ശേഷം റഫറി അത് നിഷേധിച്ചു.

ഗ്രൂപ്പ് ഇ: യോഗ്യതാ സാധ്യതകള്‍

ഈ സമനിലയോടെ ഗ്രൂപ്പ് ഇ-യിലെ നോക്കൗട്ട് പോരാട്ടം കടുപ്പമേറിയതായി മാറി. ആദ്യ മത്സരത്തില്‍ ജര്‍മ്മനിയോട് 1-7 ന് പരാജയപ്പെട്ടതിനാല്‍ കുറസാവോയ്ക്ക് ഗോള്‍ വ്യത്യാസത്തില്‍ വലിയ തിരിച്ചടിയുണ്ട്. എങ്കിലും അടുത്ത മത്സരത്തില്‍ ഐവറി കോസ്റ്റിനെ പരാജയപ്പെടുത്തുകയും, ഒപ്പം ജര്‍മ്മനി ഇക്വഡോറിനെ തോല്‍പ്പിക്കുകയും ചെയ്താല്‍ കുറസാവോയ്ക്ക് നോക്കൗട്ടില്‍ കടക്കാം. ഇക്വഡോറിനാകട്ടെ അടുത്ത മത്സരത്തില്‍ ജര്‍മ്മനിയെ വന്‍ മാര്‍ജിനില്‍ പരാജയപ്പെടുത്തിയാല്‍ മാത്രമേ അടുത്ത റൗണ്ടിലേക്ക് യോഗ്യത നേടാനാകൂ. ജൂണ്‍ 26-നാണ് ഗ്രൂപ്പിലെ നിര്‍ണ്ണായകമായ അവസാന മത്സരങ്ങള്‍ നടക്കുക.

Who is Eloy Room, Curacao goalkeeper at FIFA World Cup 2026?