രോഗം ബാധിച്ചാല്‍ മണിക്കൂറുകള്‍ക്കകം മരണം; അജ്ഞാത രോഗത്തില്‍ മുന്നറിയിപ്പുമായി ലോകാരോഗ്യ സംഘടന

ആഫ്രിക്കന്‍ രാജ്യമായ ഡമോക്രാറ്റിക് റിപ്പബ്ലിക് ഓഫ് കോംഗോയുടെ വടക്കുപടിഞ്ഞാറന്‍ ഭാഗത്ത് വ്യാപിക്കുന്ന അജ്ഞാത പകര്‍ച്ച വ്യാധി സംബന്ധിച്ച് മുന്നറിയിപ്പുമായി ലോകാരോഗ്യ സംഘടന(ഡബ്ല്യുഎച്ച്ഒ). ഈ രോഗം ബാധിക്കുന്നവരില്‍ ഭൂരിഭാഗവും 48 മണിക്കൂറിനുള്ളില്‍ മരണമടയുകയാണ് ചെയ്യുന്നത്. ഇതിനകം 53 പേര്‍ അജ്ഞാതരോഗം ബാധിച്ചു മരിച്ചതായാലും ലോകാരോഗ്യ സംഘടന വെളിപ്പെടുത്തി. പനി, ഛര്‍ദ്ദി, ആന്തരിക രക്തസ്രാവം മുതലായവയാണ് രോഗലക്ഷണങ്ങള്‍.(WHO warns after unknown illness kills more than 50)

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഇക്വേറ്റര്‍ പ്രവിശ്യയിലെ രണ്ട് ഗ്രാമങ്ങളിലാണ് രോഗം പടര്‍ന്നുതുടങ്ങിയിരിക്കുന്നത്. ഫെബ്രുവരി 16 വരെ 431 രോഗബാധയാണ് റിപോര്‍ട്ട് ചെയ്യപ്പെട്ടിരിക്കുന്നതെന്ന്. ദിവസങ്ങള്‍ക്കുള്ളിലാണ് രോഗബാധ വ്യാപിക്കുന്നതെന്നും രോഗകാരണം ഇതുവരെയും കണ്ടെത്താനായിട്ടില്ലെന്നും ലോകാരോഗ്യ സംഘടനാ വക്താവ് അറിയിച്ചു.മേഖലയിലെ ആരോഗ്യപരിചരണ രംഗത്തെ സൗകര്യമില്ലായ്മയടക്കമുള്ള പ്രതിസന്ധികള്‍ വലിയ വെല്ലുവിളിയാണ് സൃഷ്ടിച്ചിരിക്കുന്നതെന്നും ഡബ്ല്യുഎച്ച്ഒ ചൂണ്ടിക്കാട്ടി.

രോഗലക്ഷണങ്ങളുടെ പാരമ്യത്തിനും മരണത്തിനും ഇടയിലുള്ള കാലയളവ് മിക്ക കേസുകളിലും 48 മണിക്കൂര്‍ മാത്രമാണെന്നും ഭൂരിപക്ഷം കേസുകളിലും ഇതായിരുന്നു സ്ഥിതിയെന്നും ബികോറോ ആശുപത്രിയിലെ മെഡിക്കല്‍ ഓഫിസര്‍ സെര്‍ജി എന്‍ഗാലിബറ്റോ പറയുന്നു.
കഴിഞ്ഞ ജനുവരി 21 നാണ് ഡെമോക്രാറ്റിക് റിപ്പബ്ലിക്ക് ഓഫ് കോംഗോയില്‍ നിന്ന് പുതിയ പകര്‍ച്ചവ്യാധി സംബന്ധിച്ച റിപോര്‍ട്ടുകള്‍ വന്നു തുടങ്ങിയത്. മൂന്ന് കുട്ടികള്‍ വവ്വാലിനെ ഭക്ഷിച്ചതിനെ തുടര്‍ന്നാണ് രോഗം ആരംഭിച്ചതെന്നാണ് ലോകാരോഗ്യ സംഘടനയുടെ ആഫ്രിക്കന്‍ ഓഫിസ് പുറത്തുവിട്ട റിപ്പോര്‍ട്ട്. ഡമോക്രാറ്റിക് കോംഗോയിലെ ബൊലോക്കോ പട്ടണത്തില്‍ ആയിരുന്നു സംഭവം.

ഫെബ്രുവരി 9 ന് മറ്റൊരു നഗരമായ ബൊമാറ്റി പട്ടണത്തില്‍ നിലവിലെ നിഗൂഢ രോഗത്തിന്റെ രണ്ടാമത്തെ ആവിര്‍ഭാവം ഉണ്ടായി. അതിലെ 13 കേസുകളില്‍ നിന്ന് എടുത്ത സാംപിളുകള്‍ തലസ്ഥാനമായ കിന്‍ഷാസയിലെ നാഷണല്‍ ഇന്‍സ്റ്റിറ്റ്യൂട്ട് ഓഫ് ബയോമെഡിക്കല്‍ റിസര്‍ച്ചിലേക്ക് പരിശോധനയ്ക്കായി അയച്ചതായും സംഘടന വ്യക്തമാക്കി.എല്ലാ സാമ്പിളുകളിലും ഇബോള വൈറസ് അല്ലെങ്കില്‍ മാര്‍ബര്‍ഗ് പോലുള്ള മറ്റ് രക്തസ്രാവ പനികള്‍ ഇല്ലെന്ന് പരിശോധനയില്‍ തെളിഞ്ഞപ്പോള്‍, ചില സാമ്പിളുകളില്‍ മലേറിയ ഉണ്ടെന്ന് പരിശോധനയില്‍ തെളിഞ്ഞു.

ഡമോക്രാറ്റിക് റിപ്പബ്ലിക് ഓഫ് കോംഗോയിലെ ആരോഗ്യ അധികൃതര്‍ രാജ്യത്തിന്റെ പടിഞ്ഞാറന്‍ ഭാഗത്തുള്ള ബസാന്‍കുസോ പട്ടണത്തില്‍ അജ്ഞാത ഉത്ഭവമുള്ള ഒരു രോഗത്തിന്റെ ആവിര്‍ഭാവം റിപ്പോര്‍ട്ട് ചെയ്തു, 52 മരണങ്ങള്‍ ഉള്‍പ്പെടെ 943 ല്‍ അധികം അണുബാധ കേസുകള്‍ രേഖപ്പെടുത്തിയിട്ടുണ്ടെന്ന് വിശദീകരിച്ചു.

News Tag Live യുട്യൂബ് ചാനല്‍ Subscribe ചെയ്യുക