വിവാഹാഭ്യര്‍ത്ഥന നിരസിച്ചു; പ്രതികാരം തീര്‍ക്കാന്‍ മധ്യപ്രദേശില്‍ 11 വയസ്സുകാരനെ കഴുത്തറുത്തു കൊന്നു, മൃതദേഹം പ്ലാസ്റ്റിക് ഡ്രമ്മിലൊളിപ്പിച്ചു

സത്‌ന: വിവാഹാഭ്യര്‍ത്ഥന നിരസിച്ചതിന്റെ വൈരാഗ്യത്തില്‍ യുവതിയുടെ 11 വയസ്സുകാരനായ മകനെ അയല്‍വാസി ക്രൂരമായി കൊലപ്പെടുത്തി. മധ്യപ്രദേശിലെ സത്‌നയില്‍ തിങ്കളാഴ്ച രാവിലെയാണ് നാടിനെ നടുക്കിയ സംഭവം നടന്നത്. അഞ്ചാം ക്ലാസ് വിദ്യാര്‍ത്ഥിയായ ശിവരാജ് രജക് (ബാദല്‍) ആണ് കൊല്ലപ്പെട്ടത്. പ്രതിയായ മഥുര രജക്കിനെ (45) പോലീസ് അറസ്റ്റ് ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

തിങ്കളാഴ്ച രാവിലെ പത്തരയോടെ കുട്ടി വീട്ടില്‍ തനിച്ചായിരുന്ന സമയത്താണ് പ്രതി വീട്ടില്‍ അതിക്രമിച്ചു കയറിയത്. അരിവാള്‍ ഉപയോഗിച്ച് കുട്ടിയുടെ കഴുത്തറുത്ത ശേഷം മൃതദേഹം പ്ലാസ്റ്റിക് ഡ്രമ്മിലാക്കി വസ്ത്രങ്ങള്‍ കൊണ്ട് മൂടി. തുടര്‍ന്ന് വീട് പൂട്ടി പ്രതി രക്ഷപ്പെടുകയായിരുന്നു.

ഉച്ചയ്ക്ക് ഒന്നരയോടെ കുട്ടിയുടെ സഹോദരി സെജല്‍ തിരിച്ചെത്തിയപ്പോഴാണ് വിവരം പുറത്തറിയുന്നത്. വീട് പൂട്ടിക്കിടക്കുന്നത് കണ്ട് ജനലിലൂടെ നോക്കിയപ്പോള്‍ അകത്ത് ലൈറ്റും ഫാനും പ്രവര്‍ത്തിക്കുന്നത് കണ്ട് സംശയം തോന്നി പോലീസിനെ വിവരമറിയിക്കുകയായിരുന്നു. പോലീസ് വാതില്‍ തകര്‍ത്ത് അകത്തുകയറി നടത്തിയ പരിശോധനയില്‍ രക്തം പുരണ്ട അരിവാളിനൊപ്പം ഡ്രമ്മിനുള്ളില്‍ മൃതദേഹം കണ്ടെത്തി.

പ്രതിയായ മഥുര രജക് കുട്ടിയുടെ അമ്മ ആശാ രജക്കിനെ വിവാഹം കഴിക്കാന്‍ വര്‍ഷങ്ങളായി സമ്മര്‍ദ്ദം ചെലുത്തിയിരുന്നതായി സെജല്‍ പോലീസിനോട് പറഞ്ഞു. എന്നാല്‍ ആശ ഈ ആവശ്യം പലതവണ നിരസിച്ചു. ഇതിന്റെ വൈരാഗ്യത്തില്‍ മകന്‍ ഇതിന് കനത്ത വില നല്‍കേണ്ടി വരുമെന്ന് പ്രതി മുന്‍പ് ഭീഷണിപ്പെടുത്തിയിരുന്നു. കൊലപാതകത്തിന് തലേദിവസം ഇരുവരും തമ്മില്‍ വഴക്കുണ്ടായതായും പോലീസ് പറഞ്ഞു.

ഫോറന്‍സിക് സംഘം സ്ഥലത്തെത്തി തെളിവുകള്‍ ശേഖരിച്ചു. ഒളിവില്‍ പോയ പ്രതിയെ പിടികൂടാന്‍ മൂന്ന് പ്രത്യേക സംഘങ്ങളെയാണ് പോലീസ് നിയോഗിച്ചത്. മൊബൈല്‍ ഫോണ്‍ ഓഫ് ചെയ്ത് സ്വന്തം വീടും കടയും പൂട്ടി ഒളിവില്‍ പോയ ഇയാളെ ചൊവ്വാഴ്ച വൈകുന്നേരത്തോടെയാണ് പോലീസ് പിടികൂടിയത്. കുട്ടിയുടെ പിതാവ് നാസിക്കില്‍ തൊഴിലാളിയാണ്, അമ്മ വീട്ടുജോലിക്ക് പോയിരുന്ന സമയത്താണ് ദാരുണമായ കൊലപാതകം നടന്നത്.