കൊല്ലം കൊലപാതകം: ബിസിനസ് പാര്‍ട്ട്‌നറുമായി ഭാര്യക്ക് അടുപ്പം, അനില കാറില്‍ ഇരിക്കുന്നത് പെട്രോള്‍ നിറച്ച ബക്കറ്റുമായി കാത്തുനിന്നു, തീ ആളിപ്പടര്‍ന്നതോടെ ഓട്ടോ വിളിച്ച് സ്‌റ്റേഷനിലെത്തി എല്ലാം തുറന്നു പറഞ്ഞ് പദ്മരാജന്‍

കൊല്ലം: പ്രദേശത്തെയാകെ നടുക്കിയ കൊലപാതകത്തിന്റെ ഞെട്ടലിലാണ് കൊല്ലം നഗരവാസികള്‍. നഗരത്തിലെ ചെമ്മാന്‍മുക്കിലെ ഇന്നലെ രാത്രി എട്ടേമുക്കാലോടെയാണു ദാരുണ സംഭവം ഉണ്ടായത്. കൊല്ലം നഗരത്തില്‍ കടപ്പാക്കട നായേഴ്‌സ് ജംക്ഷനു സമീപം ബേക്കറി നടത്തുന്ന കൊട്ടിയം തഴുത്തല തുണ്ടില്‍ വീട്ടില്‍ അനില (44)യെ ഭര്‍ത്താവ് പദ്മരാജന്‍ നാടകീയമായി തീകൊളുത്തി കൊലപ്പെടുത്തുകയായിരുന്നു. പൊള്ളലേറ്റ ഒപ്പമുണ്ടായിരുന്ന തഴുത്തല സ്വദേശി സോണി ജില്ലാ ആശുപത്രിയില്‍ ചികിത്സയിലാണ്. കൊട്ടിയത്ത് കാറ്ററിങ് സ്ഥാപനം നടത്തുകയാണ് ഇയാള്‍. പത്മരാജന്റേത് രണ്ടാം വിവാഹമാണ്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഭാര്യയെ തീകൊളുത്തി കൊലപ്പെടുത്തിയശേഷം ഓട്ടോറിക്ഷ വിളിച്ച് കൊല്ലം ഈസ്റ്റ് പോലീസ് സ്റ്റേഷനില്‍ എത്തി പദ്മരാജന്‍ എല്ലാ കുറ്റങ്ങളും ഏല്‍ക്കുകയായിരുന്നു. ഭാര്യയുമായി ഉണ്ടായ തര്‍ക്കവും സ്ഥാപനത്തിന്റെ പാര്‍ട്ട്‌നറായ സോണിയുമായി ഭാര്യക്കുള്ള അടുപ്പം സംബന്ധിച്ച വഴക്കുമെല്ലാം അക്കമിട്ടു നിരത്തി. ഭാര്യയുടെ ബേക്കറിയില്‍ പങ്കാളിയാണ് സോണി. ഇയാള്‍ തന്നെ മര്‍ദിച്ചു പരിക്കേല്‍പ്പിച്ച കാലും പദ്മരാജന്‍ പൊലിസിന് കാട്ടിക്കൊടുത്തു.

കൊലപ്പെടുത്താന്‍ തീരുമാനിച്ചുറപ്പിച്ചാണ് പ്രതി എത്തിയത്. വേഗത്തില്‍ ഒഴിച്ച് കത്തിക്കാനുള്ള സൗകര്യത്തിനാണ് വലിയ വാ വട്ടമുള്ള ബക്കറ്റില്‍ പെട്രോള്‍ കരുതിയത്. കാറിലിരുന്നുതന്നെ ഭാര്യയിരുന്ന കാറിലേക്ക് പെട്രോള്‍ ഒഴിക്കാനായിരുന്നു പ്ലാന്‍. ഇതിനായി കൊട്ടിയത്തെ പെട്രോള്‍ പമ്പിലെത്തി മൂന്നു ലിറ്റര്‍ പെട്രോള്‍ കന്നാസില്‍ വാങ്ങി. തഴുത്തലയിലെ വീട്ടിലെത്തിയ പദ്മരാജന്‍ പിന്നീട് പെട്രോള്‍ സ്റ്റീല്‍ ബക്കറ്റിലേക്ക് ഒഴിച്ചു. തുടര്‍ന്ന് പെട്രോള്‍ നിറച്ച ബക്കറ്റ് വാനിലാക്കിയശേഷം അനില കാറില്‍ വരുന്നതും നോക്കി ചെമ്മാന്‍മുക്കിനു സമീപം കാത്തുനിന്നു. കൈയില്‍ കരുതിയിരുന്ന ലൈറ്റര്‍ ഉപയോഗിച്ചാണ് തീകൊളുത്തിയതെന്നും പദ്മരാജന്‍ മൊഴിനല്‍കി.

മറ്റൊരു വാഹനത്തില്‍ എത്തിയാണ് അനിലയും സോണിയും സഞ്ചരിച്ച കാറിലേക്ക് പത്മരാജന്‍ പെട്രോള്‍ ഒഴിച്ചത്. തീ പടര്‍ന്നതോടെ പത്മരാജനും ഓടിരക്ഷപ്പെട്ടു. ഇരുവാഹനങ്ങളും പൂര്‍ണമായും കത്തിനശിച്ചു. തീ പടര്‍ന്നതോടെ സോണി കാറില്‍ നിന്ന് പുറത്തേക്ക് ഇറങ്ങിയോടി. എന്നാല്‍ അനിലയ്ക്ക് ഇറങ്ങി രക്ഷപ്പെടാനായില്ല. പോലീസും ഫയര്‍ഫോഴ്‌സും സ്ഥലത്തെത്തി തീ അണച്ച ശേഷമാണ് അനിലയെ ആശുപത്രിയിലേക്ക് മാറ്റിയത്.

പദ്മരാജനെയും സോണിയെയും പൊലിസ് വിശദമായി ചോദ്യംചെയ്തുവരികയാണ്.

Details of husband doused his wife with petrol and killed her in Kollam