26
Jul 2025
Tue
പോലീസ് രേഖയിലെ ഒരൊറ്റ അക്ഷരത്തെറ്റാണ് രാജ്വീര് സിംഗ് യാദവിന്റെ ജീവിതം മാറ്റിമറിച്ചത്. നിരപരാധിയായ ഒരു മനുഷ്യനെ ക്രിമിനല് കേസില് കുടുക്കി ജയിലിലടച്ചു. അതിന്റെ ചുരുളഴിയാന് ഏകദേശം രണ്ട് പതിറ്റാണ്ടുകള് എടുത്തു.
 |
|
പോലീസ് യഥാര്ത്ഥത്തില് തിരഞ്ഞത് രാംവീര് സിംഗ് യാദവിനെയായിരുന്നു. എന്നാല്, പേരില് വന്ന അക്ഷരത്തെറ്റ് കാരണം, അദ്ദേഹത്തിന്റെ സഹോദരന് രാജ്വീറിനെ അറസ്റ്റ് ചെയ്യുകയും ഗുണ്ടാ നിയമപ്രകാരം കേസെടുക്കുകയും ചെയ്തു. 22 ദിവസം ജയിലില് കഴിഞ്ഞ അദ്ദേഹത്തിന് അടുത്ത 17 വര്ഷമാണ് തന്റെ നിരപരാധിത്വം തെളിയിക്കാന് പോരാടേണ്ടി വന്നത്.
മെയിന്പുരിയിലെ എഡിജെ സ്പെഷ്യല് ഗ്യാങ്സ്റ്റര് ആക്ട് കോടതി ജഡ്ജി സ്വപന്ദീപ് സിംഗാള് 55 വയസ്സുകാരനായ രാജ്വീര് സിംഗ് യാദവിനെ കുറ്റവിമുക്തനാക്കുകയും, പോലീസ് വകുപ്പിന്റെ ”ഗുരുതരമായ അശ്രദ്ധ” ചൂണ്ടിക്കാട്ടുകയും ചെയ്തു. സംഭവത്തില് ഉത്തരവാദികളായ ഉദ്യോഗസ്ഥര്ക്കെതിരെ നടപടിയെടുക്കാനും ജഡ്ജി ഉത്തരവിട്ടു.
ALSO READ: പോപ്പുലര് ഫ്രണ്ടിന്റെ പേരില് എന്ഐഎ ചമഞ്ഞ് തട്ടിപ്പ്; വയോധികയില് നിന്ന് 38 ലക്ഷത്തോളം രൂപ തട്ടി
സംഭവങ്ങളുടെ തുടക്കം
2008 ആഗസ്ത് 31-നാണ് കേസിന്റെ തുടക്കം. അന്നത്തെ സിറ്റി കോട്വാലി, മെയിന്പുരി ഇന്സ്പെക്ടര് ഓംപ്രകാശ്, നാഗ്ല ഭന്ത് സ്വദേശികളായ മനോജ് യാദവ്, പ്രവേശന് യാദവ്, ഭോല, രാജ്വീര് എന്നീ നാല് പേര്ക്കെതിരെ ഒരു ഗുണ്ടാ കേസ് രജിസ്റ്റര് ചെയ്തു. അന്വേഷണം പിന്നീട് ദന്നഹര് പോലീസ് സ്റ്റേഷനിലേക്ക് കൈമാറി.
അവിടെ അന്നത്തെ സബ് ഇന്സ്പെക്ടര് ശിവസാഗര് ദീക്ഷിത് 2008 ഡിസംബര് 1-ന് രാജ്വീറിനെ അറസ്റ്റ് ചെയ്യുകയും, അദ്ദേഹത്തിന് മുന്പ് ക്രിമിനല് കേസുകളുണ്ടെന്ന് രേഖപ്പെടുത്തുകയും ചെയ്തു. മൂന്ന് പഴയ കേസുകളാണ് തെളിവായി ചേര്ത്തത്. എന്നാല്, ഈ കേസുകള് രാജ്വീറിന്റേതായിരുന്നില്ല, മറിച്ച് അദ്ദേഹത്തിന്റെ സഹോദരന് രാംവീറിന്റേതായിരുന്നു.
പോരാട്ടത്തിന്റെ വര്ഷങ്ങള്
തനിക്ക് ക്രിമിനല് പശ്ചാത്തലമില്ലെന്നും ഗുണ്ടാ നിയമപ്രകാരം തന്റെ പേരില് തെറ്റായി കുറ്റം ചുമത്തിയെന്നും രാജ്വീര് ആഗ്ര കോടതിയില് വാദിച്ചു. ഇന്സ്പെക്ടര് ഓംപ്രകാശിനെയും എസ്.ഐ. ശിവസാഗര് ദീക്ഷിതിനെയും കോടതി വിളിച്ചുവരുത്തി. വാദം കേള്ക്കുന്നതിനിടെ, തെറ്റായ പേരാണ് രേഖപ്പെടുത്തിയതെന്ന് ഓംപ്രകാശ് സമ്മതിച്ചു. ക്രിമിനല് പശ്ചാത്തലമുള്ളത് രാജ്വീറിനല്ല, രാംവീറിനാണെന്നും അദ്ദേഹം വ്യക്തമാക്കി.
എന്നിട്ടും, ഈ തെറ്റ് തിരുത്താന് പോലീസ് തയ്യാറായില്ല. രാജ്വീറിന്റെ പേര് ഒഴിവാക്കി രേഖ തിരുത്തുന്നതിന് പകരം, അന്വേഷണ ഉദ്യോഗസ്ഥന് രാജ്വീറിനെതിരെയും കുറ്റപത്രം സമര്പ്പിച്ചു. 2012 ആയപ്പോഴേക്കും കേസ് വിചാരണയിലേക്ക് നീങ്ങി. അടുത്ത 13 വര്ഷം, രാജ്വീര് കോടതികളില് കയറിയിറങ്ങി. ഈ കാലയളവില്, അദ്ദേഹത്തിന് ഉപജീവനമാര്ഗ്ഗം നഷ്ടപ്പെട്ടു, കുട്ടികളെ പഠിപ്പിക്കാന് ബുദ്ധിമുട്ടി, കടുത്ത മാനസിക ആഘാതവും അനുഭവിച്ചു.
ഒടുവില് നീതി
ജൂലൈ 26 ലെ അന്തിമ വിധിയില്, പോലീസ് കാണിച്ച അശ്രദ്ധയെയും, തെറ്റ് വെളിച്ചത്തുവന്നതിനുശേഷവും കോടതി നിര്ദ്ദേശങ്ങള് അവഗണിച്ചതിനെയും കോടതി രൂക്ഷമായി വിമര്ശിച്ചു. ഒരു നിരപരാധിയെ ക്രിമിനല് വിചാരണയിലേക്ക് വലിച്ചിഴച്ചതിനും അദ്ദേഹത്തിന്റെ ജീവിതത്തിലെ രണ്ട് പതിറ്റാണ്ടുകളോളം കവര്ന്നെടുത്തതിനും ഉത്തരവാദികളായ ഉദ്യോഗസ്ഥര്ക്കെതിരെ കര്ശന നടപടി സ്വീകരിക്കാന് കോടതി പോലീസ് സൂപ്രണ്ടിന് നിര്ദ്ദേശം നല്കിയിട്ടുണ്ട്.
Latest News
More Stories
All Rights Reserved © 2022