വിധവയുമായി പ്രണയം; കാമുകിയെ കാണാനെത്തിയ യുവാവിന് ക്രൂര മര്‍ദ്ദനം; തല മൊട്ടയടിച്ച് മുഖത്ത് മൂത്രമൊഴിച്ചു

വിധവയുമായി പ്രേമത്തിലായ യുവാവിനെ ക്രൂരമായി മര്‍ദ്ദിച്ച് ബന്ധുക്കള്‍. കാമുകിയുടെ ക്ഷണം സ്വീകരിച്ച് വീട്ടിലെത്തിയപ്പോഴാണ് കള്ളനെന്ന് മുദ്രകുത്തി ബന്ധുക്കള്‍ യുവാവിനെ തടഞ്ഞുവച്ചതും മര്‍ദിച്ചതും.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഉത്തര്‍പ്രദേശിലെ ലഖിംപൂര്‍ ഖേരിയിലാണ് സംഭവം. തദ്ദേശവാസിയായ രാജു യാദവിനെയാണ് മര്‍ദ്ദിച്ചത്. മര്‍ദനത്തിന്റെ വീഡിയോ സമൂഹമാധ്യമങ്ങളില്‍ വൈറലായതോടെയാണ് സംഭവം പുറത്തറിയുന്നത്.

കഴിഞ്ഞ മാസം 24നാണ് സംഭവം നടന്നത്. രാത്രി 12 മണിക്ക് ശേഷം യുവതി രാജുവിനെ വീട്ടിലേക്ക് വിളിച്ചു. വീട്ടിലെത്തിയ രാജു ബന്ധുക്കളുടെ കണ്ണില്‍പ്പെട്ടു. കള്ളനെന്ന് ആരോപിച്ച് തടഞ്ഞുവയ്ക്കുകയായിരുന്നു. തുടര്‍ന്ന് മരത്തില്‍ കെട്ടിയിട്ട് ഇരുമ്പദണ്ഡ് ഉപയോഗിച്ച് അടിച്ചു. ഇരുമ്പുപാത്രം ചൂടാക്കി അതില്‍ ഇരുത്തി. നഗ്‌നനാക്കി, തല മുണ്ഡനം ചെയ്തു. ബോധരഹിതനായി യുവാവിനെ സമീപത്തുള്ള പാടത്തേക്ക് വലിച്ചിഴച്ചു, തുടര്‍ന്ന് മുഖത്ത് മൂത്രമൊഴിച്ചു. ഇവര്‍ തന്നെയാണ് മര്‍ദനത്തിന്റെ വിഡിയോ ചിത്രീകരിച്ചതും.

യുവതിയുടെ ബന്ധുക്കളായ സത്യേന്ദ്ര യാദവ്, പുനീത് യാദവ്, ജസ്‌വിന്ദ് ജിതേന്ദ്ര, സുമിത് യാദവ് എന്നിവരാണ് യുവാവിനെ മര്‍ദിച്ചത്. പുറത്തുവന്ന ദൃശ്യങ്ങളുടെ അടിസ്ഥാനത്തില്‍ പൊലീസ് കേസ് രജിസ്റ്റര്‍ ചെയ്തു. പ്രതികളില്‍ മൂന്നുപേരെ അറസ്റ്റ് ചെയ്തിട്ടുണ്ട്. ബാക്കിയുള്ള രണ്ട് പേരെ കണ്ടെത്താനായി അന്വേഷണം പുരോഗമിക്കുകയാണ്.