19
Jul 2026
Sun
ടെഹ്റാന്: തങ്ങളുമായി ഒപ്പുവെച്ച ധാരണാപത്രം (MoU) അമേരിക്ക ആവര്ത്തിച്ച് ലംഘിക്കുകയാണെന്ന് കുറ്റപ്പെടുത്തി ഇറാന് പരമോന്നത നേതാവ് മുജ്തബ ഖാംനഇ(Mojtaba Khamenei ). ഇതിന് അമേരിക്കയും അവരുടെ പ്രാദേശിക സഖ്യകക്ഷികളും ‘മറക്കാനാകാത്ത പാഠം’ പഠിക്കേണ്ടി വരുമെന്ന് അദ്ദേഹം മുന്നറിയിപ്പ് നല്കി. കഴിഞ്ഞ മാസം ഇരുരാജ്യങ്ങളും തമ്മിലുണ്ടാക്കിയ ധാരണകള് ലംഘിച്ചതിലൂടെ അമേരിക്കന് പ്രസിഡന്റ് ഡൊണാള്ഡ് ട്രംപിന്റെ ഒപ്പിന് യാതൊരു വിലയുമില്ലെന്ന് വ്യക്തമായിരിക്കുകയാണെന്നും ശനിയാഴ്ച ഇറാന് ഔദ്യോഗിക ടെലിവിഷന് പുറത്തുവിട്ട പ്രസ്താവനയില് ഖാംനഇ വ്യക്തമാക്കി.
 |
|
ഇറാനും യുഎസും തമ്മിലുള്ള യുദ്ധം അവസാനിപ്പിക്കുകയെന്ന ലക്ഷ്യത്തോടെ ഖത്തറിന്റെയും പാകിസ്താന്റെയും മധ്യസ്ഥതയിലായിരുന്നു കഴിഞ്ഞ മാസം ധാരണാപത്രം ഒപ്പുവെച്ചത്. എന്നാല് പരസ്പരം കരാര് ലംഘനം ആരോപിച്ചതോടെ ഈ കരാര് ഇപ്പോള് അസാധുവായിരിക്കുകയാണ്.
‘അമേരിക്കയുടേത് കാടത്തം’
‘വലിയ സാത്താനായ അമേരിക്ക കരാറുകള് ആവര്ത്തിച്ച് ലംഘിക്കുന്നത് വഴി അവരുടെ പ്രസിഡന്റിന്റെ ഒപ്പ് തികച്ചും വിലയില്ലാത്തതാണെന്ന് ഒരിക്കല് കൂടി തെളിഞ്ഞിരിക്കുന്നു. ഭീഷണിപ്പെടുത്തലും അധിനിവേശവും കാടത്തവുമാണ് അമേരിക്കന് നയത്തിന്റെ ഭാഗം,’ ഖമേനിയുടെ പ്രസ്താവനയില് പറയുന്നു.
ALSO READ: മയാമിയില് ഗോള്മഴ! ഫ്രാന്സിനെ തകര്ത്ത് ഇംഗ്ലണ്ടിന് വെങ്കലം; മെസ്സിയെ മറികടന്ന് എംബാപ്പെ!
ഇറാനെതിരെയുള്ള നീക്കങ്ങളിലൂടെ അമേരിക്കന് ശത്രുക്കള് യുദ്ധം ക്ഷണിച്ചുവരുത്തുകയാണെന്നും, ഇതിന് മുന്പത്തേക്കാള് വലിയ വിലയും നാണക്കേടും അവര് അനുഭവിക്കേണ്ടി വരുമെന്നും ഇറാനും അവരുടെ ‘പ്രതിരോധ സഖ്യവും’ (Resistance Front) അവര്ക്കായി മറക്കാനാകാത്ത പാഠങ്ങള് കരുതിവെച്ചിട്ടുണ്ടെന്നും പ്രസ്താവനയില് കൂട്ടിച്ചേര്ത്തു. അമേരിക്കയുടെ യഥാര്ത്ഥ മുഖം ഇതോടെ തുറന്നുകാട്ടപ്പെട്ടതായും രാജ്യത്തെ സംരക്ഷിക്കാന് ഇറാന് നേതൃത്വത്തില് ജനങ്ങള് വിശ്വാസമര്പ്പിക്കണമെന്നും പരമോന്നത നേതാവ് ആഹ്വാനം ചെയ്തു.
സിവിലിയന് കേന്ദ്രങ്ങള്ക്ക് നേരെ ആക്രമണം
കഴിഞ്ഞ ആഴ്ചകളില് ഇറാനിലെ പാലങ്ങള്, റെയില്വേ ലൈനുകള്, ശുദ്ധീകരണ പ്ലാന്റുകള് എന്നിവയുള്പ്പെടെയുള്ള സിവിലിയന് ഇന്ഫ്രാസ്ട്രക്ചറുകള് ലക്ഷ്യമിട്ട് അമേരിക്ക ആക്രമണം ശക്തമാക്കിയിരുന്നു. ഇതിന് മറുപടിയായി കുവൈറ്റിലെ സിവില് ഇന്ഫ്രാസ്ട്രക്ചറുകള്ക്ക് നേരെ ഇറാന് നടത്തിയ പ്രത്യാക്രമണത്തെത്തുടര്ന്ന് അവിടെ വൈദ്യുതി നിയന്ത്രണം ഏര്പ്പെടുത്താന് അധികൃതര് ജനങ്ങളോട് ആവശ്യപ്പെട്ടിട്ടുണ്ട്.
ഫെബ്രുവരിയില് ആരംഭിച്ച യുഎസ്-ഇസ്രായേല് സംയുക്ത യുദ്ധം ഇറാന്റെ നിലനില്പ്പിനെതിരേയുള്ള പോരാട്ടമായാണ് അവിടുത്തെ നേതൃത്വം കാണുന്നത്. ട്രംപ് ഭരണകൂടത്തിന്റെ സമ്മര്ദ്ദങ്ങള്ക്ക് വഴങ്ങാന് ടെഹ്റാന് ഇതുവരെ തയ്യാറായിട്ടില്ല. അതേസമയം യുദ്ധം അവസാനിപ്പിക്കാന് മറ്റ് പ്രാദേശിക രാജ്യങ്ങള് അണിയറയില് ശ്രമങ്ങള് നടത്തുന്നുമുണ്ട്.
ആഗോള വിപണിയില് ആശങ്ക
ഇറാനെ പിന്തുണച്ച് യെമനിലെ ഹൂതി വിമതര് ചെങ്കടലിലേക്കുള്ള പ്രവേശന കവാടമായ ‘ബാബ് അല്-മന്ദേബ്’ (Bab al-Mandeb) അടച്ചേക്കുമെന്ന റിപ്പോര്ട്ടുകള് പുറത്തുവരുന്നുണ്ട്. ഇത് സംഭവിച്ചാല് ആഗോള ഊര്ജ്ജ വിപണിയെ അത് സാരമായി ബാധിക്കുകയും പണപ്പെരുപ്പം വര്ദ്ധിക്കുകയും ചെയ്യും. ഇത് യുദ്ധം അവസാനിപ്പിക്കാന് ട്രംപിന് മേല് കടുത്ത സമ്മര്ദ്ദമുണ്ടാക്കുമെന്നാണ് വിലയിരുത്തല്. നിലവില് അമേരിക്കയ്ക്കുള്ളില് തന്നെ ഈ യുദ്ധത്തിനെതിരെ വലിയ ജനവികാരമുണ്ട്.
US Iran War 2026 updates: Mojtaba Khamenei warning to US
Latest News
More Stories
![Cargo ships sit anchored near the Strait of Hormuz, off the eastern coast of the United Arab Emirates, on July 12 [AFP]](https://newstaglive.com/wp-content/uploads/2026/07/Strait-of-Hormuz.jpg)
