മലപ്പുറത്ത് എയര്‍ഗണ്ണില്‍നിന്ന് യുവാവ് വെടിയേറ്റ് മരിച്ച സംഭവം അബദ്ധമല്ല, ആസൂത്രിത കൊലയെന്ന് ബന്ധുക്കള്‍

മലപ്പുറത്ത് എയര്‍ഗണ്ണില്‍നിന്ന് യുവാവ് വെടിയേറ്റ് മരിച്ച സംഭവം അബദ്ധമല്ല, ആസൂത്രിത കൊലയെന്ന് ബന്ധുക്കള്‍

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മലപ്പുറം: ചങ്ങരംകുളത്ത് ആമയം സ്വദേശിയായ ഷാഫി വെടിയേറ്റ് മരിച്ച സംഭവത്തില്‍ ദുരൂഹത ആരോപിച്ച് ബന്ധുക്കള്‍ രംഗത്ത്. ഷാഫി വെടിയേറ്റ് മരിച്ചത് അബദ്ധത്തിലാണെന്ന പ്രചാരങ്ങള്‍ അംഗീകരിക്കാന്‍ കഴിയില്ലെന്നും ആസൂത്രിതമായ കൊലപാതകമാണ് നടന്നതെന്നുമാണ് ബന്ധുക്കള്‍ ആരോപിച്ചു. മാതാപിതാക്കളും സഹോദരനും അടക്കമുള്ളവര്‍ സംഭവത്തില്‍ കൃത്യമായ അന്വഷണം വേണമെന്ന ആവശ്യവുമായി രംഗത്ത് എത്തിയത്. സുഹൃത്തുക്കളുമായി സംസാരിക്കുന്നതിനിടെ അബദ്ധത്തില്‍ എയര്‍ഗണ്‍ പൊട്ടിയാണ് ഷാഫി കൊല്ലപ്പെട്ടതെന്ന വാദം കുടുംബം തള്ളിക്കളഞ്ഞു.

സംഭവം നടന്നത് മുതല്‍ പോലീസ് എന്തൊക്കെയോ മറച്ച് വെക്കുകയൊണെന്നും ഷാഫിക്ക് വെടിയേല്‍ക്കാനുണ്ടായ സാഹചര്യം തന്നെ ദുരൂഹത നിറഞ്ഞതാണെന്നും ബന്ധുക്കള്‍ ആരോപിച്ചു. പലതവണ വിളിച്ച് നിര്‍ബന്ധിച്ചാണ് ഷാഫിയെ സുഹൃത്ത് സജീവ് തന്റെ വീട്ടിലേക്ക് കൊണ്ട് പോയത്. അധികസമയം കഴിയും മുന്‍പുതന്നെ ഷാഫിക്ക് എയര്‍ ഗണ്ണില്‍നിന്ന് വെടിയേല്‍ക്കുകയും ചെയ്തു.

സംഭവത്തിന് പിന്നില്‍ ഗൂഡാലോചന സംശയിക്കുന്നുണ്ടെന്നും കൂടുതല്‍ അന്വേഷണം വേണമെന്നുമാണ് ബന്ധുക്കളുടെ ആവശ്യം. പ്രധാന പ്രതിക്കെതിരെ കേസെടുക്കുകയും അറസ്റ്റ് ചെയ്യുകയും ചെയ്‌തെങ്കിലും അബദ്ധത്തില്‍ സംഭവിച്ചതെന്ന വാദം ഉയര്‍ത്തി കേസ് ഒതുക്കാന്‍ ഉദ്ധ്യോഗസ്ഥ തലത്തില്‍ ശ്രമം നടക്കുന്നുണ്ടെന്നുമാണ് ആരോപണം. നാട്ടുകാരുടെ നേതൃത്വത്തില്‍ ആക്ഷന്‍ കമ്മിറ്റി രൂപീകരിക്കാനും മുഖ്യമന്ത്രി, ഡിജിപി, എസ്പി അടക്കമുള്ളവര്‍ക്ക് അന്വേഷണം ആവശ്യപ്പെട്ട് പരാതി നല്‍കാനും ബന്ധുക്കള്‍ തീരുമാനിച്ചു.