ചികിൽസതേടിയെത്തിയ 65കാരിയുടെ കണ്ണിൽ നിന്നും മൂക്കിൽ നിന്നും നീക്കംചെയ്തത് 145 പുഴുക്കളെ

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ബ്ലാക്ക് ഫം​ഗസും കോവിഡും ബാധിച്ചതിനെ തുടർന്ന് ഒരുവർഷം മുമ്പ് ചികിൽസ തേടിയ 65കാരിയുടെ കണ്ണിൽ നിന്നും മൂക്കിൽ നിന്നും നീക്കംചെയ്തത് 145 പുഴുക്കളെ. ബം​ഗളുരുവിലെ സ്വകാര്യ ആശുപത്രിയിലാണ് ശസ്ത്രക്രിയയിലൂടെ വൃദ്ധയുടെ ശരീരത്തിൽ നിന്ന് ഇത്രയധികം പുഴുക്കളെ നീക്കിയത്.  

ബ്ലാക്ക് ഫംഗസിനെ തുടര്ന്ന് രോ​ഗിയുടെ മൂക്കിലെ കോശങ്ങൾ നശിച്ചതിനാല് ഇവ ശസ്ത്രക്രിയയിലൂടെ നീക്കംചെയ്തിരുന്നു. ഇതിന്റെ ഭാ​ഗമായി ഇവരുടെ മൂക്കിന്റെ ഇടത്തേ വശത്ത് വലിയ ദ്വാരം രൂപപ്പെടുകയുണ്ടായി. മൂക്ക് വൃത്തിയായി സൂക്ഷിക്കാൻ കഴിയാതെ വരുന്നതിലൂടെ മൂക്കിനുള്ള ദുർ​ഗന്ധമുള്ള സ്രവങ്ങൾ ഈച്ചകളെ ആകർഷിക്കുമെന്നും ഇങ്ങനെ മൂക്കിൽ പ്രവേശിക്കുന്ന ഈച്ചകൾ മുട്ടയിട്ട് അവ വിരിഞ്ഞ് പുഴുക്കളായി മാറുകയാണ് ചെയ്യുകയെന്നും ഡോക്ടർമാർ പ്രസ്താവനയിൽ അറിയിച്ചു.

രോ​ഗിയുടെ കണ്ണിൽ നിന്നും മൂക്കിൽ നിന്നും പുഴുക്കളെ നീക്കംചെയ്യാൻ കഴിഞ്ഞിരുന്നില്ലെങ്കിൽ അവ തലച്ചോറിലെത്തി മസ്തിഷ്കകോശങ്ങൾക്ക് തകരാർ വരുത്തുമായിരുന്നുവെന്നും ആശുപത്രിയിലെ ഇഎൻടി സർജനായ ഡോ. മഞ്ജുനാഥ് എംകെ പറഞ്ഞു. 

കണ്ണിൽ നീരുവന്നതിനെ തുടർന്ന് മൂന്നുമാസം മുമ്പ് രോ​ഗി മറ്റൊരാശുപത്രിയിൽ ചികിൽസ തേടിയിരുന്നു. വീണ്ടും നീരും മൂക്കിൽ നിന്നു രക്തംവരികയും ചെയ്തതോടെ ഇവർ ഡോ. മഞ്ജുനാഥിന്റെ അരികിലെത്തുകയായിരുന്നു. ഇവിടെ നടത്തിയ വിശദപരിശോധനയിൽ രോ​ഗിയുടെ മൂക്കിൽ നിന്നും 110 പുഴുക്കളെ കണ്ടെത്തി. രോ​ഗിയുടെ ഇടത്തേ കണ്ണിൽ നിന്നും 35 പുഴുക്കളെ കണ്ടെത്തി.

ഈ കണ്ണിന്റെ കാഴ്ച പൂർണമായും നഷ്ടപ്പെട്ടതായും ഡോക്ടർ പറഞ്ഞു. ഈ കണ്ണും ഡോക്ടർ നീക്കം ചെയ്തു. കോശങ്ങൾ നശിച്ച കണ്ണ് മൂലം അസഹ്യമായ വേദനയായിരുന്നു രോ​ഗി അനുഭവിച്ചിരുന്നത്. മൂക്കിലും കണ്ണിലും രണ്ടുദിവസങ്ങളിലായാണ് ശസ്ത്രക്രിയ നടത്തിയതെന്നും രോ​ഗി സുഖംപ്രാപിച്ചുവരുന്നതായും ഡോ. മഞ്ജുനാഥ് പറഞ്ഞു.