50 ഫലസ്തീനികളെ നിരുപാധികം മോചിപ്പിച്ചതിനെ ചൊല്ലി വിവാദം; ശിഫ ഹോസ്പിറ്റൽ ഡയറക്ടറെ മോചിപ്പിച്ചത് അറിഞ്ഞില്ലെന്ന് ഇസ്രായേൽ കാബിനറ്റ്; ഉത്തരവ് ലഭിച്ചുവെന്ന് ജയിൽ വകുപ്പ്

​ഗസയിലെ ശിഫ ഹോസ്പിറ്റൽ ഡയറക്ടർ മുഹമ്മദ് അബു സാൽമിയ അടക്കം 50 ഫലസ്തീനികളെ ഇസ്രായേൽ നിരുപാധികം തടവറയിൽ നിന്ന് മോചിപ്പിച്ചു. ഇവരെ ​ഗസാ മുനമ്പിലേക്ക് സായുധ സേന തിരിച്ചെത്തിച്ചതിനു പിന്നാലെ വിവാദം. മുഹമ്മദ് അബു സാൽമിയയെ മോചിപ്പിച്ചത് തങ്ങളുടെ അറിവില്ലാതെയാണെന്ന് ഇസ്രായേൽ കാബിനറ്റ് പ്രതികരിച്ചു. അതേസമയം തടവുകാരെ മോചിപ്പിച്ചത് ജയിലിൽ ഇടമില്ലാത്തതിനാൽ ആണെന്ന വാർത്തകൾ തള്ളി ഇസ്രായേൽ പ്രിസൻ സർവീസ് രം​ഗത്തുവന്നു. തടവുകാരെ മോചിപ്പിക്കുന്നതിനായി ഇസ്രായേൽ പ്രതിരോധ സേനയുടെ ബ്രി​ഗേഡിയർ ജനറൽ ഒപ്പുവച്ച ഉത്തരവും പ്രിസൻ സർവീസ് പുറത്തുവിട്ടു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ശിഫ ഹോസ്പിറ്റൽ ഡയറക്ടർ അടക്കമുള്ളവരെ മോചിപ്പിക്കാനുള്ള തീരുമാനം ഇസ്രായേൽ ജയിൽ വകുപ്പിന്റേതല്ലെന്നും ഇതിനുള്ള ഉത്തരവ് പുറപ്പെടുവിച്ചത് പ്രതിരോധ സേനയും ഷിൻ ബേത് സുരക്ഷാ ഏജൻസിയുമാണെന്നും ജയിൽ വകുപ്പ് പ്രതികരിച്ചു. തീവ്രവാദികളെ പാർപ്പിക്കുന്നതിന് പാർപ്പിക്കുന്നതിന് ഇടം കണ്ടെത്താനാണ് ​ഗസയിൽ നിന്നുള്ള തടവുകാരെ ദേ തീമൻ ജയിലിൽ നിന്നു മോചിപ്പിച്ചതെന്ന് ഷിൻ ബേത് അവകാശപ്പെട്ടിരുന്നു. ദേ തീമൻ ജയിലിൽ ഹ്രസ്വ കാലത്തേക്കാണ് തടവുകാരെ പാർപ്പിക്കുന്നതെന്നും ഷിൻ ബിത് പറയുകയുണ്ടായി. എന്നാൽ ‍ഈ വാദം തള്ളിയാണ് ജയിൽ വകുപ്പ് രം​ഗത്തുവന്നത്. മുഹമ്മദ് അബു സാൽമിയയെ മോചിപ്പിച്ചത് നഫ്ഹ ജയിലിൽ നിന്നാണെന്നും ജയിൽ വകുപ്പ് വ്യക്തമാക്കി.

മുഹമ്മദ് അബു സാൽമിയയുടെ മോചനം തെളിയിക്കുന്നത് സർക്കാരിന്റെ വീഴ്ചയാണെന്നും ഭരണത്തിൽ തുടരാൻ സർക്കാരിന് അവകാശമില്ലെന്നും പ്രതിപക്ഷം കുറ്റപ്പെടുത്തി. ​ഹമാസ് ബന്ദികളാക്കിയ തങ്ങളുടെ പൗരന്മാരെ 120 പേരെ മോചിപ്പിക്കാതെയാണ് 50ലധികം ഫലസ്തീനികളെ മോചിപ്പിച്ചെന്നും സർക്കാരിന് യുദ്ധം നടത്തേണ്ടത് എങ്ങനെയാണെന്ന് അറിയില്ലെന്നും പ്രതിപക്ഷനേതാവ് യെയിർ ​ഗോലൻ ആരോപിച്ചു.

അതേസമയം തന്റെ ജയിൽമോചനം ഇസ്രായേൽ കാബിനറ്റ് അറിഞ്ഞില്ലെന്നത് അദ്ഭുതകരമാണെന്ന് ​ഗസിയിലെത്തിയ മുഹമ്മദ് അബു സലാമിയ പ്രതികരിച്ചു. ജയിലിൽ കഴിഞ്ഞ സമയത്ത് തന്നെ കാണാൻ അഭിഭാഷകരെയോ അന്താരാഷ്ട്ര സംഘടനാ പ്രതികളോ എത്തിയിട്ടില്ലെന്നും അബു സലാമിയ കൂട്ടിച്ചേർത്തു. 2023 നവംബറിലാണ് അബു സലാമിയയെ ഇസ്രായേൽ തടവിലടച്ചത്. ഹമാസ് തങ്ങളുടെ ആസ്ഥാനമായി ശിഫ ഹോസ്പിറ്റലിനെ ഉപയോ​ഗപ്പെടുത്തിയെന്നാണ് ഇസ്രായേൽ ആരോപണം. ഇതുകൊണ്ടുതന്നെയാണ് ശിഫ ഹോസ്പിറ്റൽ ഡയറക്ടറുടെ മോചനം ഇസ്രായേലിൽ കൊടുമ്പിരി കൊള്ളുന്നതും.