കേരളം പിടിക്കാന്‍ ബിജെപിയുടെ മിഷന്‍ 2026; അമിത് ഷായുടെ നേതൃത്വത്തില്‍ ഇന്ന് നിര്‍ണായക യോഗം

Kerala Assembly Polls: Amit Shah To Hold Strategy Sessions കേരളത്തില്‍ നടക്കാനിരിക്കുന്ന നിയമസഭാ തിരഞ്ഞെടുപ്പിനുള്ള ബിജെപിയുടെ പ്രചാരണത്തിന് കേന്ദ്ര ആഭ്യന്തരമന്ത്രി അമിത് ഷാ ഞായറാഴ്ച തിരുവനന്തപുരത്ത് തുടക്കം കുറിക്കും. ഇതിന്റെ ഭാഗമായി വിവിധ പാര്‍ട്ടി യോഗങ്ങളിലും തന്ത്രപ്രധാനമായ ചര്‍ച്ചകളിലും അദ്ദേഹം പങ്കെടുക്കും. ‘വികസിത കേരളം, വിശ്വാസം സംരക്ഷണം, അപകട രാഷ്ട്രീയം’ എന്ന മുദ്രാവാക്യങ്ങളുയര്‍ത്തി നൂറുദിവസം നീളുന്ന മിഷന്‍ 2026 പാര്‍ട്ടി പ്രഖ്യാപിക്കും.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പ്രധാനമന്ത്രി നരേന്ദ്ര മോദി മുന്നോട്ടുവെക്കുന്ന കാഴ്ച്ചപ്പാടോടെ കേരളം വികസിപ്പിക്കുമെന്നതാണ് വികസിത കേരളം മുദ്രാവാക്യത്തില്‍ ചൂണ്ടിക്കാട്ടുക. ശബരിമല സ്വര്‍ണക്കൊള്ളയിലെ സി.പി.എമ്മിന്റെയും കോണ്‍ഗ്രസിന്റെയും പങ്ക് തുറന്നുകാട്ടുകയും ബി.ജെ.പിയാണ് വിശ്വാസികള്‍ക്കൊപ്പമുള്ളതെന്ന് ജനങ്ങളെ ബോധ്യപ്പെടുത്തുകയുമാണ് വിശ്വാസ സംരക്ഷണ മുദ്രാവാക്യത്തിലൂടെ ലക്ഷ്യമിടുന്നത്. കോണ്‍ഗ്രസ്, മുസ്‌ലിം ലീഗ്, ജമാഅത്തെ ഇസ്‌ലാമി കൂട്ടുകെട്ടാണ് അപകട രാഷ്ട്രീയമെന്ന മുദ്രാവാക്യത്തിലൂടെ പ്രചരിപ്പിക്കുക.

തിരുവനന്തപുരത്തിന് പ്രത്യേക പദ്ധതി

തിരുവനന്തപുരം നഗരത്തിനായി പ്രത്യേക അതിവേഗ വികസന പദ്ധതിയടക്കം, കേരളത്തിനായുള്ള തന്റെ സര്‍ക്കാരിന്റെ കാഴ്ചപ്പാടുകള്‍ പങ്കുവെക്കാന്‍ പ്രധാനമന്ത്രി നരേന്ദ്ര മോദി വരും ദിവസങ്ങളില്‍ നടത്തുന്ന സന്ദര്‍ശനത്തിന് മുന്നോടിയായാണ് ഈ യോഗം നടക്കുന്നത് എന്നത് ഏറെ പ്രാധാന്യമര്‍ഹിക്കുന്നു. തിരുവനന്തപുരം കോര്‍പ്പറേഷനിലെ 101 വാര്‍ഡുകളില്‍ 50 എണ്ണത്തിലും വിജയിച്ച ബിജെപി, കേരളത്തില്‍ തങ്ങളുടെ ആദ്യത്തെ മേയറെ അവിടെ അധികാരത്തിലേറ്റുകയും ചെയ്തിരുന്നു.

കവടിയാറിലെ സിറ്റി ഓഡിറ്റോറിയത്തില്‍ വെച്ച് സംസ്ഥാനത്തെ പുതുതായി തിരഞ്ഞെടുക്കപ്പെട്ട ബിജെപി തദ്ദേശ സ്വയംഭരണ പ്രതിനിധികളുമായി അമിത് ഷാ സംവദിക്കും. തിരുവനന്തപുരം കോര്‍പ്പറേഷന് പുറമെ, വിവിധ നഗരസഭകളിലായി 50-60 വാര്‍ഡുകളിലും, ഗ്രാമപഞ്ചായത്തുകളില്‍ 2,500 വാര്‍ഡുകളിലും, ബ്ലോക്ക് പഞ്ചായത്തുകളില്‍ 20-30 വാര്‍ഡുകളിലും ബിജെപി വിജയിച്ചിട്ടുണ്ട്.

കേന്ദ്ര ആഭ്യന്തരമന്ത്രി പാര്‍ട്ടി പ്രവര്‍ത്തകരെയും നേതാക്കളെയും അഭിസംബോധന ചെയ്യുകയും വരാനിരിക്കുന്ന നിയമസഭാ തിരഞ്ഞെടുപ്പിനുള്ള കര്‍മ്മപദ്ധതി പുറത്തിറക്കുകയും ചെയ്യും. സംസ്ഥാനത്തുടനീളമുള്ള പാര്‍ട്ടിയുടെ ശക്തിയും ദൗര്‍ബല്യങ്ങളും വിലയിരുത്തുന്നതിനൊപ്പം തിരഞ്ഞെടുപ്പ് സംവിധാനങ്ങളെ സജ്ജമാക്കുന്നതിനുള്ള തന്ത്രങ്ങളും അദ്ദേഹം ആവിഷ്‌കരിക്കും.

35 സീറ്റുകള്‍ എ ക്ലാസ്‌

ബി.ജെ.പി എ ക്ലാസ് മണ്ഡലങ്ങളായി കരുതുന്ന 35 സീറ്റുകളില്‍ ജയിക്കാനാവശ്യമായ പ്രത്യേക രൂപരേഖയും പാര്‍ട്ടി തയാറാക്കും. ഇതിനകംതന്നെ പ്രമുഖ നേതാക്കളില്‍ ചിലര്‍ വിവിധ മണ്ഡലങ്ങള്‍ കേന്ദ്രീകരിച്ച് പ്രവര്‍ത്തിക്കാന്‍ തുടങ്ങിയിട്ടുണ്ട്. നേമത്ത് സംസ്ഥാന അധ്യക്ഷന്‍ രാജീവ് ചന്ദ്രശേഖര്‍, കഴക്കൂട്ടത്ത് മുന്‍ കേന്ദ്രമന്ത്രി വി. മുരളീധരന്‍, കാട്ടാക്കടയില്‍ ദേശീയ നിര്‍വാഹക സമിതി അംഗം പി.കെ. കൃഷ്ണദാസ് തുടങ്ങിയവര്‍ സീറ്റുറപ്പിച്ചു.

ജനുവരി അവസാനത്തോടെ ആദ്യഘട്ട സ്ഥാനാര്‍ഥി പട്ടിക തയാറാക്കി സംസ്ഥാന നേതൃത്വം പാര്‍ലമെന്ററി ബോര്‍ഡിന് കൈമാറും. മകരവികളക്ക് ദിനമായ ജനുവരി 14ന് വീട്ടിലും നാട്ടിലും അയ്യപ്പ ജ്യോതി തെളിയിക്കുന്നതോടെ ശബരിമല സ്വര്‍ണക്കൊള്ളയിലെ തുടര്‍ പ്രക്ഷോഭത്തിനും പാര്‍ട്ടി തുടക്കമിടും. കേന്ദ്ര ഏജന്‍സിയുടെ അന്വേഷണം ആവശ്യപ്പെട്ടുള്ള പ്രക്ഷോഭത്തിലൂടെ സി.പി.എമ്മിനൊപ്പം കോണ്‍ഗ്രസിനെയും പ്രതിക്കൂട്ടിലാക്കുകയാണ് ബി.ജെ.പി ലക്ഷ്യമിടുന്നത്.

കണക്കുകള്‍ അനുകൂലമല്ല

സംസ്ഥാന തിരഞ്ഞെടുപ്പ് കമ്മീഷന്റെ കണക്കുകള്‍ പ്രകാരം, അടുത്തിടെ നടന്ന തദ്ദേശ തിരഞ്ഞെടുപ്പില്‍ ബിജെപിക്ക് 14.7 ശതമാനം വോട്ടുകളാണ് ലഭിച്ചത്. ഇത് ലോക്സഭാ തിരഞ്ഞെടുപ്പില്‍ ബിജെപി-എന്‍ഡിഎ സഖ്യം നേടിയ 19.3 ശതമാനത്തേക്കാള്‍ കുറവാണ്. കഴിഞ്ഞ വര്‍ഷം കേരളം സന്ദര്‍ശിച്ചപ്പോള്‍ അമിത് ഷാ നിശ്ചയിച്ച ലക്ഷ്യത്തേക്കാള്‍ ഏറെ പിന്നിലാണിത്. തദ്ദേശ തിരഞ്ഞെടുപ്പില്‍ കുറഞ്ഞത് 25 ശതമാനം വോട്ട് നേടണമെന്നും നിയമസഭാ തിരഞ്ഞെടുപ്പില്‍ അത് 30 ശതമാനമായി ഉയര്‍ത്തണമെന്നുമായിരുന്നു അദ്ദേഹം പാര്‍ട്ടിയോട് നിര്‍ദ്ദേശിച്ചിരുന്നത്.

തദ്ദേശ തിരഞ്ഞെടുപ്പില്‍ വലിയ വിജയം നേടിയ കോണ്‍ഗ്രസ് നേതൃത്വത്തിലുള്ള യുഡിഎഫ് 38.81 ശതമാനം വോട്ടുകള്‍ നേടി. സിപിഎം നേതൃത്വത്തിലുള്ള എല്‍ഡിഎഫ് 33.45 ശതമാനം വോട്ടുകളുമായി രണ്ടാം സ്ഥാനത്തെത്തി. നിയമസഭാ മണ്ഡലങ്ങള്‍ തിരിച്ചുള്ള കണക്കുകള്‍ നോക്കിയാല്‍ യുഡിഎഫ് മറ്റ് രണ്ട് മുന്നണികളേക്കാളും വളരെ മുന്നിലാണ്. 84 മണ്ഡലങ്ങളില്‍ യുഡിഎഫും, 56 മണ്ഡലങ്ങളില്‍ എല്‍ഡിഎഫും, 10 മണ്ഡലങ്ങളില്‍ ബിജെപിയും മുന്നിട്ടുനില്‍ക്കുന്നു.

തിരുവനന്തപുരം, പാലക്കാട്, കാസര്‍ഗോഡ്, കണ്ണൂര്‍, തൃശ്ശൂര്‍, എറണാകുളം, ആലപ്പുഴ എന്നീ ജില്ലകളിലായി വ്യാപിച്ചുകിടക്കുന്ന 140 നിയമസഭാ സീറ്റുകളില്‍ 25 എണ്ണം ബിജെപി നേതൃത്വം പട്ടികപ്പെടുത്തിയിട്ടുണ്ട്. ശക്തമായ സംഘടനാ അടിത്തറയും വോട്ട് വിഹിതവുമുള്ള ഇതില്‍ പന്ത്രണ്ടോളം സീറ്റുകളിലെങ്കിലും ശരിയായ തന്ത്രങ്ങളിലൂടെ വിജയിക്കാനാകുമെന്ന് പാര്‍ട്ടി പ്രതീക്ഷിക്കുന്നു.