14
Jan 2026
Mon
തടവുപുള്ളികളുടെ കൂലിയില് വലിയ വര്ധനവു വരുത്തി സംസ്ഥാന സര്ക്കാര്. സ്കില്ഡ് ജോലികളില് ഏര്പ്പെടുന്നവര്ക്ക് 620 രൂപയും സെമി സ്കില്ഡ് ജോലികള് ചെയ്യുന്നവര്ക്ക് 560രൂപയും അണ് സ്കില്ഡ് ജോലികളില് 530 രൂപയുമാണ് പുതുക്കിയ വേതനം. മുന്പ് അണ് സ്കില്ഡ് ജോലികള് ചെയ്യുന്നവര്ക്ക് 63 രൂപയും സെമി സ്കില്ഡ് ജോലിക്കാര്ക്ക് 127 രൂപ വേതനമുള്ളത് 560 ഉം സ്കില്ഡ് ജോലി ചെയ്യുന്നവര്ക്ക് 152 രൂപ നല്കിയിരുന്നത് 620 രൂപയുമായാണ് ഉയര്ത്തിയിരിക്കുന്നത്. മൂവായിരത്തിലധികം ജയില്പുള്ളികള്ക്കാണ് വേതനം കൂടുക.
 |
|
ശിക്ഷാതടവുകാര്ക്ക് ആണ് കൂലിയുള്ള ജോലിയുള്ളത്. നാല് സെന്ട്രല് ജയിലുകളിലെ തടവുകാര്ക്ക് ഈ ആനൂകൂല്യം ലഭിക്കും. 2018 ല് ആണ് തടവുപുള്ളികളുടെ വേതനം അവസാനമായി കൂട്ടിയത്. ഇത്രയും വലിയ തുക കൂട്ടുന്നത് ഇതാദ്യമാണ്. ജയിലിലെ അന്തേവാസികളെ സ്വയം പര്യാപ്തരാക്കി സമൂഹത്തിലേക്ക് മടക്കി അയയ്ക്കുക എന്ന ജയില് വകുപ്പിന്റെ ദൗത്യം മുന്നിര്ത്തി സ്കില്ഡ്, സെമി സ്കില്ഡ്, അണ്സ്കില്ഡ് എന്നിങ്ങനെ മൂന്ന് വിഭാഗങ്ങളായി സംസ്ഥാനത്തെ എല്ലാ ജയിലുകളിലെയും വേതന ഘടന ഏകീകരിച്ചാണ് വേതനം പരിഷ്കരിച്ചിട്ടുള്ളതെന്ന് ഉത്തരവില് പറയുന്നുണ്ട്.
കര്ണാടക, ജാര്ഖണ്ഡ്, തമിഴ്നാട്, ഡല്ഹി എന്നിങ്ങനെ മറ്റ് പല സംസ്ഥാനങ്ങളിലെ വേതനവുമായി താരതമ്യം ചെയ്യുമ്പോള് കേരളത്തിലെ ജയില് അന്തേവാസികള്ക്ക് നിലവില് നല്കിവരുന്ന വേതനം വളരെ കുറവ് ആണെന്നും ആഭ്യന്തര വകുപ്പ് പുറപ്പെടുവിച്ച ഉത്തരവില് പറയുന്നുണ്ട്.
ജയില് അന്തേവാസികളുടെ വേതന വര്ധനവ് കേവലം സാമ്പത്തിക വിഷയം മാത്രമല്ലെന്നും അവരുടെ അന്തസും പുനരധിവാസവും ഉറപ്പാക്കുന്ന നിര്ണായക നടപടി കൂടിയാണെന്നും ഉത്തരവില് പറയുന്നു. വിവിധ ഉല്പാദന – നിര്മാണ പ്രവര്ത്തനങ്ങളില് അന്തേവാസികള് നടത്തുന്ന കഠിനാധ്വാനത്തിന് കാലാനുസൃതമായ മൂല്യം നല്കേണ്ടത് അനിവാര്യമാണെന്നും ജയില് ചട്ടങ്ങള് പ്രകാരം ജയില് അന്തേവാസികള്ക്ക് ലഭിക്കുന്ന വേതനം കുടുംബത്തിന്റെ ആവശ്യങ്ങള്ക്കായും ജയിലിലെ കാന്റീന് ആവശ്യങ്ങള്ക്കും മോചനവിഹിതമായും വിനിയോഗിക്കേണ്ടതാണെന്നും ഉത്തരവില് പറയുന്നു.
കുടുംബത്തോടുള്ള ഉത്തരവാദിത്തം നിറവേറ്റുന്നതിനും അധ്വാനത്തിന് മൂല്യമുണ്ടെന്ന ബോധം വളര്ത്തുന്നതിനും ഉതകുന്നതിനൊപ്പം മോചനാനന്തരമുള്ള സാമ്പത്തിക പിന്തുണ ഉറപ്പാക്കുന്നതിലൂടെ വീണ്ടും കുറ്റകൃത്യങ്ങളിലേക്ക് വഴുതിപ്പോകാതെ സമൂഹത്തിന്റെ മുഖ്യധാരയിലേക്ക് മടങ്ങിവരുന്നതിന് ജയില് അന്തേവാസികള്ക്ക് സഹായകമാകുന്നതാണ് വേതന പരിഷ്കരണമെന്നാണ് ആഭ്യന്തര വകുപ്പ് പറയുന്നത്.
നിലവില് അധിക വേതനം ലഭിച്ചുവരുന്നുവെന്ന കാര്യം പരിഗണിച്ച് നെട്ടുകാല്ത്തേരി, ചീമേനി തുറന്ന ജയിലുകളില് പരമ്പരാഗതമായി നടത്തിവരുന്ന റബര് ടാപ്പിങ്, കല്ല് വെട്ട് തുടങ്ങിയ ജോലികളില് ഏര്പ്പെടുന്ന അന്തേവാസികള്ക്ക് വാര്ഷിക ഉല്പാദനത്തെ അടിസ്ഥാനപ്പെടുത്തി ഓണക്കാലത്ത് സര്ക്കാര് നിശ്ചയിക്കുന്ന നിരക്കില് ഒരു ഇന്സെന്റീവ് കൂടി അതത് വര്ഷം സര്ക്കാര് ഉത്തരവ് പ്രകാരം അനുവദിക്കും.
ALSO READ: രാഹുല് മാങ്കൂട്ടത്തിലിനെ കോടതിയില് ഹാജരാക്കാന് ഉത്തരവ്
News Tag Live യുട്യൂബ് ചാനല് Subscribe ചെയ്യുക
Latest News
More Stories
All Rights Reserved © 2026