ആസിഫ് അലിയിൽ നിന്ന് പുരസ്കാരം വാങ്ങാൻ വിസമ്മതിച്ച് സം​ഗീത സംവിധായകൻ രമേശ് നാരായണൻ; സംവിധായകനെ വിളിച്ചുവരുത്തി പുരസ്കാരം വീണ്ടും സ്വീകരിച്ചു

കൊച്ചി: ആസിഫ് അലിയിൽ നിന്ന് പുരസ്കാരം വാങ്ങാൻ വിസമ്മതിച്ച് സം​ഗീത സംവിധായകൻ രമേശ് നാരായണൻ. തുടർന്ന് സംവിധായകൻ ജയരാജനെ വേദിയിലേക്ക് വിളിച്ചുവരുത്തി രമേശ് നാരായണൻ പുരസ്കാരം സ്വീകരിക്കുകയും ചെയ്തു. എം ടി വാസുദേവൻ നായരുടെ ഒൻപത് കഥകളെ ആസ്പദമാക്കി ഒരുങ്ങുന്ന ആന്തോളജി സീരിസ് ‘മനോരഥങ്ങൾ’ ട്രെയിലർ റിലീസിനിടെയായിരുന്നു സംഭവം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പുരസ്‌കാരം കൈമാറാനായി ആസിഫ് അലി വേദിയിൽ എത്തിയപ്പോൾ അതൃപ്തിയോടെ രമേശ് നാരായണൻ പുരസ്കാരം വാങ്ങിയെന്നു വരുത്തുകയും ആസിഫിന് ഹസ്തദാനം ചെയ്യാനോ മുഖത്തുനോക്കാനോ തയ്യാറാവാതിരിക്കുകയും ചെയ്തു. ഇതോടെ ആസിഫ് സീറ്റിലേക്ക് മടങ്ങി. ഇതിനു പിന്നാലെ രമേശ് നാരായണൻ സംവിധായകൻ ജയരാജനെ വേദിയിലേക്ക് വിളിച്ചുവരുത്തുകയും പുരസ്കാരം വീണ്ടും സ്വീകരിച്ചു ഫോട്ടോക്ക് പോസ് ചെയ്യുകയും ചെയ്തു. ജയരാജനെ ആലിം​ഗനം ചെയ്ത് രമേശ് സന്തോഷം പങ്കിടുകയും ചെയ്തു.

അതേസമയം ആസിഫിനെ അപമാനിക്കുന്ന രമേശ് നാരായണൻ്റെ പ്രവൃത്തിയെ ഇവിടെയുണ്ടായിരുന്ന മറ്റ് അഭിനേതാക്കളാരും ചോദ്യംചെയ്യുകയോ ഇതിനെതിരേ പ്രതികരിക്കുകയോ ചെയ്തില്ല. എന്നാൽ ചിരി മാറാതെ തന്നെ ആസിഫ് താൻ നേരിട്ട അപമാനത്തെ കൈകാര്യം ചെയ്തു എന്നതും ശ്രദ്ധേയമായി. സംഭവത്തിൻ്റെ വീഡിയോ സാമൂഹിക മാധ്യമങ്ങളിൽ പ്രചരിച്ചതോടെ രമേശ് നാരായണൻ്റെ പ്രവൃത്തിക്കെതിരേ കടുത്ത വിമർശനമുയർന്നു.