
![]() |
|
കൊച്ചി: നടി ഹണി റോസ് നല്കിയ ലൈംഗികഅധിക്ഷേപ പരാതിയില് രാഹുല് ഈശ്വറിനെതിരെ കേസില്ല. പരാതിയില് പ്രാഥമിക അന്വേഷണം നടക്കുകയാണെന്ന് പൊലീസ് കോടതിയെയാണ് അറിയിച്ചത്. രാഹുല് ഈശ്വറിന്റെ മുന്കൂര് ജാമ്യാപേക്ഷ പരിഗണിക്കുന്നതിനിടെയാണ് പൊലീസ് ഇക്കാര്യം കോടതിയെ അറിയിച്ചത്. പരാതി പ്രകാരം കേസെടുക്കാനുളള വകുപ്പുകളില്ലെന്നും വിശദമായ നിയമോപദേശം തേടുമെന്നും പൊലീസ് നടിയെ അറിയിച്ചിരുന്നു. നടിക്ക് കോടതി വഴി പരാതി നല്കാമെന്നുമാണ് കൊച്ചി പൊലീസ് അവരെ അറിയിച്ചത്.
വ്യവസായി ബോബി ചെമ്മണൂരിനെതിരായ പരാതിയില് ഹണി റോസിനെ വിമര്ശിച്ച് രാഹുല് ഈശ്വര് രംഗത്തെത്തിയതാണ് പരാതിക്കാധാരം. വിഷയത്തില് ചാനല് ചര്ച്ചകളില് രാഹുല് ഈശ്വര് നടത്തിയ പരാമര്ശങ്ങള്ക്കെതിരെയാണ് ഹണി റോസ് എറണാകുളം സെന്ട്രല് പൊലീസില് പരാതി നല്കിയത്. നടിയുടെ വസ്ത്രധാരണത്തെയടക്കം വിമര്ശിച്ച് രാഹുല് ഈശ്വര് രംഗത്തെത്തിയിരുന്നു. ഇതിന് ചുവടുപിടിച്ച് സാമൂഹ്യമാധ്യമങ്ങളില് ഹണി റോസിനെതിരെ വ്യാപക പ്രചാരണമുണ്ടായി. ഇത് ചൂണ്ടിക്കാണിച്ചാണ് ഹണി റോസ് പരാതി നല്കിയത്.
എന്നാല് ഹണി റോസിനെ അധിക്ഷേപിച്ചിട്ടില്ലെന്നായിരുന്നു രാഹുല് ഈശ്വറിന്റെ വാദം. ഹണിക്കെതിരായ പരാമര്ശങ്ങളില് തൃശൂര് സ്വദേശിയും രാഹുലിനെതിരെ പരാതി നല്കിയിരുന്നു. എന്നാല് ഈ പരാതികളിലെല്ലാം കേസെടുക്കാന് മാത്രം വകുപ്പില്ലെന്നാണ് പൊലിസ് നിലപാട്.