ഇസ്രായേലിനെ ഫിഫയിൽ നിന്ന് പുറത്താക്കാൻ സമ്മർദ്ദവുമായി നോർവേ

ഓസ്ലോ: ഫലസ്തീനിലെ അധിനിവേശത്തിന്റെ പശ്ചാത്തലത്തിൽ ഇസ്രായേലിനെ അന്താരാഷ്ട്ര ഫുട്ബോൾ ഫെഡറേഷനായ ഫിഫയിൽ (FIFA) നിന്ന് സസ്പെൻഡ് ചെയ്യണമെന്ന ആവശ്യവുമായി നോർവേ ശക്തമായി രംഗത്ത്. യൂറോപ്യൻ ഫുട്ബോൾ സംഘടനകൾക്കിടയിൽ ഇസ്രായേലിനെതിരെ ഉപരോധം കൊണ്ടുവരാൻ നോർവീജിയൻ ഫുട്ബോൾ ഫെഡറേഷനും അതിന്റെ പ്രസിഡന്റ് ലിസ ക്ലാവിനസും (Lise Klaveness) നടത്തുന്ന നീക്കങ്ങളെക്കുറിച്ച് പ്രമുഖ അന്താരാഷ്ട്ര മാധ്യമമായ ‘പൊളിറ്റിക്കോ’ ആണ് റിപ്പോർട്ട് പുറത്തുവിട്ടത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മുൻ നോർവീജിയൻ വനിതാ ഫുട്ബോൾ താരവും അഭിഭാഷകയുമായ ലിസ ക്ലാവിനസ് നിലവിൽ യുവേഫ (UEFA) എക്സിക്യൂട്ടീവ് കമ്മിറ്റി അംഗം കൂടിയാണ്. മത്സരങ്ങൾ ബഹിഷ്കരിക്കുന്നതിനേക്കാൾ ഫുട്ബോളിന്റെ ഔദ്യോഗിക ഭരണഘടനയും നിയമങ്ങളും ഉപയോഗിച്ച് ഇസ്രായേലിനെ കായികരംഗത്ത് നിന്ന് മാറ്റിനിർത്താനാണ് നോർവേ ശ്രമിക്കുന്നത്. ഇസ്രായേലിനെ അന്താരാഷ്ട്ര മത്സരങ്ങളിൽ നിന്ന് വിലക്കണമെന്ന് കഴിഞ്ഞ വർഷം തന്നെ ക്ലാവിനസ് ആവശ്യപ്പെട്ടിരുന്നു.

റഷ്യൻ വിലക്ക് ചൂണ്ടിക്കാട്ടി നോർവേ; ഇരട്ടത്താപ്പെന്ന് വിമർശനം

യുക്രെയ്ൻ അധിനിവേശത്തെത്തുടർന്ന് റഷ്യൻ ദേശീയ ടീമിനെയും ക്ലബ്ബുകളെയും ഫിഫയും യുവേഫയും ഉടൻ തന്നെ സസ്പെൻഡ് ചെയ്തിരുന്നു. എന്നാൽ ഗസ്സയിൽ കടുത്ത ആക്രമണം തുടർന്നിട്ടും ഇസ്രായേലിനെതിരെ നടപടിയെടുക്കാത്തത് ഫിഫയുടെ ഇരട്ടത്താപ്പാണെന്ന് നോർവേ ചൂണ്ടിക്കാണിക്കുന്നു. ഫുട്ബോളിന്റെ നിയമങ്ങളും മനുഷ്യാവകാശങ്ങളോടുള്ള പ്രതിബദ്ധതയും എല്ലാവർക്കും ഒരുപോലെ ബാധകമാക്കണമെന്നാണ് നോർവേയുടെ നിലപാട്.

ALSO READ: ഫിഫ പ്രസിഡന്റ് ട്രംപിന് വേണ്ടി പക്ഷപാതപരമായി ഇടപെടുന്നു; ഒളിംപിക് കമ്മിറ്റിക്ക് പരാതി

ഫലസ്തീൻ ഫുട്ബോൾ അസോസിയേഷൻ 2024-ൽ തന്നെ ഇസ്രായേലിനെ വിലക്കണമെന്ന് ആവശ്യപ്പെട്ട് ഔദ്യോഗികമായി ഫിഫയെ സമീപിച്ചിരുന്നു. ഗസ്സയിലെ വംശഹത്യ, ഫലസ്തീൻ-അറബ് കായികതാരങ്ങളോടുള്ള വിവേചനം, വെസ്റ്റ് ബാങ്കിലെ നിയമവിരുദ്ധ ഇസ്രായേൽ കുടിയേറ്റ മേഖലകൾ കേന്ദ്രീകരിച്ച് പ്രവർത്തിക്കുന്ന ഇസ്രായേലി ക്ലബ്ബുകളെ തങ്ങളുടെ ലീഗിൽ കളിപ്പിക്കുന്നത് എന്നിവയാണ് ഫലസ്തീൻ ഉന്നയിച്ച കാരണങ്ങൾ. ഇത് വിവേചനത്തിനെതിരെയുള്ള ഫിഫയുടെ സ്വന്തം ചട്ടങ്ങൾക്ക് വിരുദ്ധമാണെന്ന് മനുഷ്യാവകാശ അഭിഭാഷകരും വ്യക്തമാക്കുന്നു.

കളിക്കളത്തിലെ ഫലസ്തീൻ ഐക്യദാർഢ്യം

കായികരംഗത്തെ തന്ത്രങ്ങൾക്കൊപ്പം ഫലസ്തീൻ ജനതയ്ക്ക് പരസ്യമായ ഐക്യദാർഢ്യവും നോർവേ പ്രഖ്യാപിക്കുന്നുണ്ട്. കഴിഞ്ഞ ഒക്ടോബറിൽ ഓസ്ലോയിൽ വെച്ച് നടന്ന ലോകകപ്പ് യോഗ്യതാ മത്സരത്തിൽ ഇസ്രായേലിനെ നോർവേ 5-0 ന് പരാജയപ്പെടുത്തിയിരുന്നു. ഈ മത്സരത്തിൽ നിന്നുള്ള ടിക്കറ്റ് വരുമാനം മുഴുവൻ ഗസ്സയിലെ മെഡിക്കൽ ദുരിതാശ്വാസ പ്രവർത്തനങ്ങൾക്കായി നോർവീജിയൻ ഫുട്ബോൾ ഫെഡറേഷൻ സംഭാവന ചെയ്യുകയുണ്ടായി.

മത്സരത്തിനിടെ സ്റ്റേഡിയത്തിൽ കാണികൾ ഫലസ്തീൻ പതാകകളും കെഫിയ്യകളും ഉയർത്തുകയും ‘കുട്ടികളെ ജീവിക്കാൻ അനുവദിക്കൂ’ (Let Children Live) എന്നെഴുതിയ ഭീമൻ ബാനർ സ്ഥാപിക്കുകയും ചെയ്തിരുന്നു. കൂടാതെ ഇസ്രായേലിനെ കായികലോകത്ത് നിന്ന് മാറ്റിനിർത്തണമെന്ന് ആവശ്യപ്പെട്ട് നൂറുകണക്കിന് ആളുകൾ സ്റ്റേഡിയത്തിന് പുറത്ത് പ്രതിഷേധിക്കുകയും ചെയ്തു.

കഴിഞ്ഞ മാർച്ചിൽ, നിയമവിരുദ്ധ കുടിയേറ്റ മേഖലകളിലെ ക്ലബ്ബുകളുടെ പേരിൽ ഇസ്രായേലിനെതിരെ നടപടിയെടുക്കാൻ ഫിഫ വിസമ്മതിച്ചിരുന്നു. എങ്കിലും, വിവേചനവും അധിക്ഷേപകരമായ പെരുമാറ്റവും നടത്തിയതിന് ഇസ്രായേൽ ഫുട്ബോൾ അസോസിയേഷന് 1,50,000 സ്വിസ് ഫ്രാങ്ക് (ഏകദേശം 1,85,500 ഡോളർ) ഫിഫ പിഴ ചുമത്തിയിട്ടുണ്ട്. കൂടാതെ വിവേചനം തടയുന്നതിനുള്ള കർശനമായ പദ്ധതികൾ നടപ്പാക്കാനും മത്സരങ്ങൾക്കിടയിൽ വിവേചന വിരുദ്ധ ബാനറുകൾ പ്രദർശിപ്പിക്കാനും ഫിഫ ഇസ്രായേലിന് നിർദ്ദേശം നൽകിയിട്ടുണ്ട്.

Norway uses influence in football to push for Israel’s suspension from FIFA