സംഭല്‍ മസ്ജിദ് കമ്മിറ്റി പ്രസിഡന്റിനെ അറസ്റ്റ് ചെയ്തു; പോലീസ് നടത്തിയ കൂട്ടക്കുരുതി മറച്ചുവയ്ക്കാനുള്ള ശ്രമമെന്ന് കുടുബം

ലഖ്നൗ: സംഭല്‍ ഷാഹി ജുമാ മസ്ജിദ് കമ്മിറ്റി പ്രസിഡന്റ് സഫര്‍ അലിയെ യുപി പൊലീസ് അറസ്റ്റ് ചെയ്തു. (Sambhal Masjid Committee President arrested) പ്രാദേശിക അധികൃതരുടെ സര്‍വേ ശ്രമം തടഞ്ഞുവെന്ന് ആരോപിച്ച് ആറ് മുസ്ലിം യുവാക്കളെ പോലീസ് വെടിവച്ചു കൊന്ന സ്ഥലമാണ് സംഭല്‍ മസ്ജിദ്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കഴിഞ്ഞ വര്‍ഷം നവംബര്‍ 24ന് സംഭലിലുണ്ടായ സംഘര്‍ഷത്തില്‍ സഫര്‍ അലിക്ക് പങ്കുണ്ടെന്നും, ക്രിമിനല്‍ ഗൂഢാലോചന നടത്തിയെന്നും ആരോപിച്ചാണ് അറസ്റ്റ്. അക്രമത്തില്‍ സഫര്‍ അലിക്ക് പങ്കുണ്ടെന്നതിന്റെ തെളിവ് തങ്ങള്‍ക്ക് ലഭിച്ചെന്ന് സംഭല്‍ പൊലീസ് സൂപ്രണ്ട് കൃഷന്‍ കുമാര്‍ ബിഷ്ണോയി പറഞ്ഞു.

ഇന്നലെ രാവിലെയാണ് സഫര്‍ അലിയെ അദ്ദേഹത്തിന്റെ വീട്ടില്‍ നിന്നും പിടിച്ചുകൊണ്ടുപോയ്ത്. തുടര്‍ന്ന് കോട്വാലി പൊലീസ് സ്റ്റേഷനില്‍ വെച്ച് ചോദ്യം ചെയ്യുകയും അറസ്റ്റ് രേഖപ്പെടുത്തുകയുമായിരുന്നുവെന്നും കൃഷന്‍ കൂട്ടിച്ചേര്‍ത്തു.

ALSO READ: മൂന്നു ദിവസം കൊണ്ട് 3.27 ലക്ഷം രൂപ സമ്പാദിച്ച യാചകന്‍ അറസ്റ്റില്‍

അതേസമയം, അക്രമത്തില്‍ തനിക്ക് പങ്കില്ലെന്ന് പൊലീസ് അറസ്റ്റ് ചെയ്ത് കൊണ്ടുപോകുന്നതിനിടെ സഫര്‍ അലി മാധ്യമങ്ങളോട് പറഞ്ഞു. എന്നാല്‍ സംഘര്‍ഷവുമായി ബന്ധപ്പെട്ട് പോലീസിനെതിരേ ഇന്ന് ജൂഡീഷ്യല്‍ പാനലിന് മുമ്പാകെ മൊഴി നല്‍കുന്നതു തടയാന്‍ പൊലീസ് മനപ്പൂര്‍വം സഫര്‍ അലിയെ അറസ്റ്റ് ചെയ്തതാണെന്ന് സഹോദരന്‍ താഹിര്‍ അലി പ്രതികരിച്ചു. സംഘര്‍ഷവുമായി ബന്ധപ്പെട്ട് ഉത്തര്‍ പ്രദേശ് സര്‍ക്കാരാണ് ജൂഡിഷ്യല്‍ പാനലിനെ നിയമിച്ചത്.

ഹിന്ദുത്വരുടെ സമ്മര്‍ദ്ദത്തിന് വഴങ്ങി അധികൃതര്‍ നടത്തിയ സര്‍വേക്കെതിരേ പ്രതിഷേധിച്ച മുസ്ലിംകള്‍ക്കു നേരെ പൊലീസ് വെടിയുതിര്‍ത്തെന്നും, കൊല്ലപ്പെട്ടവരെല്ലാം വെടിയുണ്ടയേറ്റാണ് കൊല്ലപ്പെട്ടതെന്നും സഫര്‍ അലി നേരത്തെ വാര്‍ത്താ സമ്മേളനത്തില്‍ വ്യക്തമാക്കിയിരുന്നുവെന്നും അദ്ദേഹം പറഞ്ഞു. ഈ മൊഴി സഫര്‍ മാറ്റിപ്പറയില്ലെന്നും സഹോദരന്‍ കൂട്ടിച്ചേര്‍ത്തു.

പൊലീസ് കൊണ്ടുപോകുന്നതിന് മുമ്പായി താന്‍ ജയിലില്‍ പോകാന്‍ തയ്യാറാണെന്നും സത്യത്തില്‍ നിന്ന് പിന്നോട്ട് പോകാന്‍ തയ്യാറല്ലെന്നും സഫര്‍ പറഞ്ഞതായും താഹിര്‍ അലി പറഞ്ഞു. ‘സംഭല്‍ ഭരണകൂടം മനപ്പൂര്‍വം അസ്വസ്ഥതയുണ്ടാക്കുകയാണ്. പ്രശ്നങ്ങള്‍ ഇല്ലാതാക്കാന്‍ ഭരണകൂടം ശ്രമിക്കുന്നില്ല. ഞങ്ങള്‍ സമാധാനം പുനസ്ഥാപിക്കാന്‍ ശ്രമിക്കുമ്പോള്‍ എല്ലാ പൊലീസുദ്യോഗസ്ഥരും മുതിര്‍ന്ന ഉദ്യോഗസ്ഥരും കൂടുതല്‍ സംഘര്‍ഷമുണ്ടാക്കുകയാണ്’, താഹിര്‍ അലി പറഞ്ഞു.

കഴിഞ്ഞ വര്‍ഷം നവംബര്‍ 19ന് ഷാഹി ജുമാ മസ്ജിദില്‍ അഡ്വക്കേറ്റ് കമ്മീഷണറുടെ മേല്‍നോട്ടത്തില്‍ സര്‍വേ നടത്താന്‍ കോടതി ഉത്തരവിട്ടിരുന്നു. നവംബര്‍ 24 ന് രണ്ടാംഘട്ട സര്‍വേക്ക് അഡ്വക്കേറ്റ് കമ്മീഷണര്‍ അടക്കമുള്ള ഉദ്യോഗസ്ഥര്‍ എത്തിയപ്പോഴാണ് പ്രതിഷേധം നടന്നത്. സംഘര്‍ഷത്തില്‍ ആറുപേര്‍ മരിക്കുകയും നിരവധി പേര്‍ക്ക് പരിക്കേല്‍ക്കുകയും ചെയ്തിരുന്നു. പൊലീസ് തങ്ങള്‍ക്ക് നേരെ അകാരമണമായി വെടിയുതിര്‍ത്തുകയായിരുന്നുവെന്ന് നാട്ടുകാര്‍ അന്ന് തന്നെ പറഞ്ഞിരുന്നു.

പുരാതനമായ ഹരിഹര്‍ ക്ഷേത്രത്തിന്റെ അവശിഷ്ടങ്ങളിലാണ് പള്ളി നിര്‍മിച്ചതെന്ന ആരോപണവുമായി സംഘപരിവാര അഭിഭാഷകരായ വിഷ്ണു ശങ്കര്‍ ജെയിനും പിതാവ് ഹരിശങ്കര്‍ ജെയിനും സിവില്‍ കോടതിയെ സമീപിച്ചിരുന്നു. ഗ്യാന്‍വാപി-കാശി വിശ്വനാഥ ക്ഷേത്രം ഉള്‍പ്പെടെയുള്ള ആരാധനാലയങ്ങളുമായി ബന്ധപ്പെട്ട കേസുകളില്‍ മസ്ജിദുകള്‍ക്കെതിരെ ഹര്‍ജി നല്‍കിയത് വിഷ്ണു ശങ്കറും ഹരിശങ്കറുമായിരുന്നു.

ഹരിഹര്‍ മന്ദിര്‍ എന്നറിയപ്പെടുന്ന ക്ഷേത്രം മുഗള്‍ ചക്രവര്‍ത്തിയായിരുന്ന ബാബര്‍ തകര്‍ക്കുകയും അവിടെ മസ്ജിദ് പണിയുകയായിരുന്നു എന്നുമായിരുന്നു ഹര്‍ജിക്കാരുടെ വാദം. തുടര്‍ന്നാണ് സര്‍വേ നടത്താന്‍ തീരുമാനിച്ചത്.

News Tag Live യുട്യൂബ് ചാനല്‍ Subscribe ചെയ്യുക