മാറിടത്തില്‍ പിടിക്കുന്നതും സാല്‍വാറിന്റെ ചരടഴിക്കുന്നതും ബലാല്‍സംഗ ശ്രമമല്ലെന്ന ഉത്തരവ്; ഹൈക്കോടതി വിധിക്കെതിരേ സുപ്രിം കോടതി

ന്യൂഡൽഹി: ലൈംഗിക അതിക്രമ കേസുകളിൽ ജുഡീഷ്യൽ ഉദ്യോഗസ്ഥർ കാട്ടേണ്ട പുലർത്തേണ്ട ജാഗ്രതയെയും (Judicial Sensitivity) സംവേദനക്ഷമതയെയും കുറിച്ചുള്ള നാഷണൽ ജുഡീഷ്യൽ അക്കാദമി കമ്മിറ്റിയുടെ റിപ്പോർട്ട് സുപ്രീം കോടതിയുടെയും എല്ലാ ഹൈക്കോടതികളുടെയും വെബ്‌സൈറ്റുകളിൽ അപ്‌ലോഡ് ചെയ്യാൻ സുപ്രീം കോടതി ഉത്തരവിട്ടു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പെൺകുട്ടിയുടെ പൈജാമയുടെ വള്ളി അഴിക്കുന്നതും സ്തനങ്ങളിൽ പിടിക്കുന്നതും ബലാത്സംഗ ശ്രമമായി കണക്കാക്കാനാവില്ലെന്ന അലഹബാദ് ഹൈക്കോടതിയുടെ 2025 മാർച്ച് 17-ലെ ഉത്തരവിനെത്തുടർന്ന് സുപ്രീം കോടതി സ്വമേധയാ (Suo motu) എടുത്ത കേസിലാണ് ഈ റിപ്പോർട്ട് തയ്യാറാക്കിയത്. എന്നാൽ സമാനമായ രീതിയിൽ, സ്ത്രീയുടെ സാൽവാർ അഴിക്കാൻ ശ്രമിക്കുന്നതും നെഞ്ചിൽ അമർത്തുന്നതും ബലാത്സംഗ ശ്രമമായി കാണാനാവില്ലെന്ന് ജൂലൈ 9-ന് പട്ന ഹൈക്കോടതിയും ഉത്തരവിട്ടിരുന്നു. ഇത് ചൂണ്ടിക്കാണിച്ചപ്പോഴാണ് സുപ്രീം കോടതിയുടെ കടുത്ത ഇടപെടൽ.

ALSO READ: ഗോള്‍വേട്ടയില്‍ മെസ്സിയെ മറികടക്കാനാവാതെ എംബാപ്പെ; മൂന്നാം ഫൈനലെന്ന സ്വപ്‌നവും തകര്‍ന്നു

ഇത്തരം കേസുകളിൽ ജഡ്ജിമാർക്ക് ബോധവൽക്കരണം നൽകണമെന്ന് അലഹബാദ് ഹൈക്കോടതി കേസിൽ സുപ്രീം കോടതി നിർദ്ദേശിച്ചിരുന്ന കാര്യം പട്ന ഹൈക്കോടതിയിൽ ചൂണ്ടിക്കാണിച്ചിരുന്നോ എന്ന് ജസ്റ്റിസ് വി. മോഹന ചോദിച്ചു. തുടർന്ന് പട്ന ഹൈക്കോടതി വിധി പരാമർശിച്ചുകൊണ്ട്, സ്വന്തം നിലയിൽ ചില ഗവേഷണങ്ങൾ നടത്താൻ ജഡ്ജിമാർക്കും ബാധ്യതയുണ്ടെന്ന് ചീഫ് ജസ്റ്റിസ് സൂര്യകാന്ത് നിരീക്ഷിച്ചു.

ലൈംഗിക അതിക്രമ കേസുകളുമായി ബന്ധപ്പെട്ട ഹാൻഡ്‌ബുക്കിലെ (Handbook) നിർദ്ദേശങ്ങൾ എല്ലാ കോടതികളും കർശനമായി പാലിക്കണമെന്ന് സുപ്രീം കോടതി നിർദ്ദേശിച്ചു. എഫ്.ഐ.ആർ രജിസ്റ്റർ ചെയ്യുമ്പോഴും കുറ്റപത്രം സമർപ്പിക്കുമ്പോഴും ഈ നിർദ്ദേശങ്ങൾ പാലിക്കാൻ സംസ്ഥാനങ്ങൾ എല്ലാ പോലീസ് സ്റ്റേഷനുകൾക്കും നിർദ്ദേശം നൽകണമെന്നും കോടതി വ്യക്തമാക്കി.

പട്ന ഹൈക്കോടതിയുടെ വിവാദ നിരീക്ഷണം

ഒരു സ്ത്രീയുടെ സാൽവാർ അഴിക്കാൻ ശ്രമിക്കുന്നതും നെഞ്ചിൽ അമർത്തുന്നതും ബലാത്സംഗ ശ്രമം തെളിയിക്കാൻ പര്യാപ്തമല്ലെന്നായിരുന്നു പട്ന ഹൈക്കോടതിയിലെ ജസ്റ്റിസ് പൂർണേന്ദു സിങ്ങിന്റെ നിരീക്ഷണം. ഇത്തരം പ്രവൃത്തികൾ സ്ത്രീത്വത്തെ അപമാനിക്കൽ (Outraging a woman’s modesty) എന്ന കുറ്റകൃത്യത്തിന്റെ പരിധിയിലാണ് വരികയെന്നും, കൂടുതൽ കടുത്ത ശിക്ഷ ലഭിക്കാവുന്ന ബലാത്സംഗ ശ്രമമായി കണക്കാക്കാനാവില്ലെന്നും കോടതി വിലയിരുത്തി. ഈ നിരീക്ഷണത്തോടെ പ്രതിയുടെ ബലാത്സംഗ ശ്രമത്തിനുള്ള ശിക്ഷ ഹൈക്കോടതി റദ്ദാക്കിയിരുന്നു.

കേസിന്റെ പശ്ചാത്തലം:

2008-ൽ അമർപൂരിലെ ഒരു ഫോട്ടോഗ്രാഫി സ്റ്റുഡിയോയിൽ വെച്ചാണ് കേസിനാസ്പദമായ സംഭവം നടന്നത്. ഫോട്ടോ എടുത്ത ശേഷം കമ്പ്യൂട്ടറിൽ കാണിച്ചുതരാം എന്ന് പറഞ്ഞ് പെൺകുട്ടിയുടെ പിതാവിനെ പുറത്തുനിർത്തിയ സ്റ്റുഡിയോ ഉടമ, വാതിൽ അകത്തുനിന്ന് പൂട്ടി പെൺകുട്ടിയെ ലൈംഗികമായി പീഡിപ്പിക്കാൻ ശ്രമിക്കുകയായിരുന്നു. പെൺകുട്ടിയുടെ നിലവിളി കേട്ട് പിതാവ് ഓടിയെത്തിയതോടെ പ്രതി രക്ഷപ്പെട്ടു.

തുടർന്ന് വിചാരണക്കോടതി പ്രതിയെ ബലാത്സംഗ ശ്രമത്തിനും നിയമവിരുദ്ധമായി തടങ്കലിൽ വെച്ചതിനും ശിക്ഷിച്ചു. ഇതിനെതിരെയാണ് പ്രതി ഹൈക്കോടതിയെ സമീപിച്ചത്. കേസിൽ ബലാത്സംഗ ശ്രമം തെളിയിക്കുന്നതിനുള്ള മെഡിക്കൽ തെളിവുകളില്ലെന്നും, കേസ് അന്വേഷിച്ച ഉദ്യോഗസ്ഥനെ വിചാരണ വേളയിൽ വിസ്തരിച്ചിട്ടില്ലെന്നും ഹൈക്കോടതി ചൂണ്ടിക്കാട്ടി.

ചെറിയ തോതിലെങ്കിലും ലൈംഗിക അതിക്രമം നടന്നതിനോ അതിനുള്ള വ്യക്തമായ ശ്രമം നടന്നതിനോ തെളിവില്ലാത്തതിനാൽ ഐ.പി.സി സെക്ഷൻ 375, 376 എന്നിവ നിലനിൽക്കില്ലെന്ന് ഹൈക്കോടതി പറഞ്ഞു. എന്നാൽ സ്റ്റുഡിയോയ്ക്കുള്ളിൽ പൂട്ടിയിട്ട് സാൽവാർ അഴിക്കാൻ ശ്രമിച്ചതും ശാരീരികമായി ഉപദ്രവിച്ചതും സ്ത്രീത്വത്തെ അപമാനിക്കുന്ന ഐ.പി.സി സെക്ഷൻ 354 പ്രകാരമുള്ള കുറ്റകൃത്യമാണെന്നും ഹൈക്കോടതി നിരീക്ഷിച്ചിരുന്നു.

Supreme Court against High Court verdict ruling that ‘grabbing breasts and untying salwar’ is not an attempt to rape