രണ്ട് കേസിലും ജാമ്യം; ഉണ്ണികൃഷ്ണന്‍ പോറ്റി പുറത്തേക്ക്

ശബരിമല സ്വര്‍ണക്കൊള്ള കേസില്‍ ഒന്നാംപ്രതി ഉണ്ണികൃഷ്ണന്‍ പോറ്റിക്ക് ജാമ്യം. കൊല്ലം വിജിലന്‍സ് കോടതിയാണ് സ്വാഭാവിക ജാമ്യം അനുവദിച്ചത്.
എസ്ഐടി സമര്‍പ്പിച്ച റിപ്പോര്‍ട്ട് പരിഗണിച്ചാണ് കോടതി ഉത്തരവ് പുറപ്പെടുവിച്ചത്.
സ്വാഭാവിക ജാമ്യം പ്രതിയുടെ നിയമപരമായ അവകാശമാണെന്ന് കോടതി നേരത്തെ തന്നെ നിരീക്ഷിച്ചിരുന്നു. കുറ്റപത്രം സമര്‍പ്പിക്കുന്നതില്‍ അന്വേഷണസംഘം നിശ്ചിത സമയപരിധി ലംഘിച്ചതാണ് ജാമ്യം അനുവദിക്കാന്‍ കാരണമായത്.
ദ്വാരപാലക ശില്‍പ്പ കേസിലും കട്ടിളപ്പാളി കേസിലും ജാമ്യം ലഭിച്ചതോടെയാണ് ഉണ്ണികൃഷ്ണന്‍ പോറ്റി ഇന്ന് തന്നെ ജയിലില്‍ നിന്ന് പുറത്തിറങ്ങുന്നത്.
2025 ഒക്ടോബര്‍ 17നാണ് ദ്വാരപാലക ശില്‍പ്പ കേസില്‍ ഉണ്ണികൃഷ്ണന്‍ പോറ്റിയെ അന്വേഷണസംഘം അറസ്റ്റ് ചെയ്തത്. 90 ദിവസത്തിനുള്ളില്‍ കുറ്റപത്രം സമര്‍പ്പിക്കാത്തതിനെ തുടര്‍ന്ന് ജനുവരി 21ന് ആ കേസില്‍ പോറ്റിക്ക് സ്വാഭാവിക ജാമ്യം ലഭിച്ചിരുന്നു.
അതേസമയം, കട്ടിളപ്പാളി കേസില്‍ 2025 നവംബര്‍ 3നായിരുന്നു പോറ്റിയുടെ അറസ്റ്റ് രേഖപ്പെടുത്തിയത്. ഈ കേസിലും കുറ്റപത്രം വൈകിയതോടെയാണ് ജാമ്യത്തിന് വഴിയൊരുങ്ങിയത്.
വീഡിയോ കോണ്‍ഫറന്‍സിംഗിലൂടെ ഹാജരാക്കിയ തന്ത്രി കണ്ഠര് രാജീവരുടെ റിമാന്‍ഡ് കാലാവധിയും കോടതി നീട്ടി. രാജീവരു ജാമ്യാപേക്ഷ സമര്‍പ്പിച്ചിട്ടുണ്ട്, അത് ഫെബ്രുവരി 9 ന് പരിഗണിക്കും.
അതേസമയം, രണ്ട് കേസുകളിലും നിയമപരമായ ജാമ്യം തേടി ടിഡിബി മുന്‍ തിരുവാഭരണം കമ്മീഷണര്‍ കെ എസ് ബൈജു വിജിലന്‍സ് കോടതിയെ സമീപിച്ചു.
ദ്വാരപാലക സ്വര്‍ണ്ണം നഷ്ടപ്പെട്ട കേസില്‍ ഏഴാം പ്രതിയും ശ്രീകോവില്‍ ഡോര്‍ഫ്രെയിം സ്വര്‍ണ്ണം നഷ്ടപ്പെട്ട കേസില്‍ നാലാം പ്രതിയുമാണ് ബൈജു. അദ്ദേഹത്തിന്റെ ജാമ്യാപേക്ഷ ഫെബ്രുവരി 11 ന് പരിഗണിക്കും.
കേസുമായി ബന്ധപ്പെട്ട അന്വേഷണം പുരോഗമിക്കുകയാണെന്നും തുടര്‍നടപടികള്‍ കോടതി നിര്‍ദേശപ്രകാരം തുടരുമെന്നും വിജിലന്‍സ് വൃത്തങ്ങള്‍ അറിയിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>