27
May 2024
Sat
തിരുവനന്തപുരം: ജൂണ് മൂന്നിന് പ്രവേശനോത്സവത്തോടെ സ്കൂളുകളില് പുതിയ അധ്യയന വര്ഷത്തിന് തുടക്കമാവും. സ്കൂള് തുറക്കുന്നതുമായി ബന്ധപ്പെട്ട മുന്നൊരുക്ക പ്രവര്ത്തനങ്ങള് സമയബന്ധിതമായി പൂര്ത്തീകരിക്കണമെന്ന് മുഖ്യമന്ത്രി പിണറായി വിജയന് നിര്ദ്ദേശിച്ചു. ഇക്കാര്യം ചര്ച്ച ചെയ്യാന് ചേര്ന്ന ഉന്നതതലയോഗത്തിലാണ് മുഖ്യമന്ത്രിയുടെ നിര്ദേശം. (Kerala Schools will open on June 3; Government with preparations )
 |
|
സ്കൂള് തുറക്കുന്നതിന് മുന്നോടിയായി സുരക്ഷ ഉറപ്പാക്കണം. അറ്റകുറ്റ പണികള് നടത്തണം. അധ്യയന വര്ഷം ആരംഭിക്കുന്നതിനു മുന്പ് എല്ലാ സ്കൂള് കെട്ടിടങ്ങള്ക്കും ഫിറ്റ്നസ് സര്ട്ടിഫിക്കറ്റ് ലഭ്യമാക്കണം. സ്കൂളും പരിസരവും വൃത്തിയാക്കണം. ശുദ്ധമായ കുടിവെള്ളം ഉറപ്പാക്കണം. സ്കൂളുകളില് നിര്ത്തിയിട്ട ഉപയോഗശൂന്യമായ വാഹനങ്ങള് നീക്കം ചെയ്യണം.
ഉപയോഗശൂന്യമായ ഫര്ണിച്ചര്, മറ്റ് ഉപകരണങ്ങള് എന്നിവ നീക്കം ചെയ്യുകയോ പ്രത്യേക മുറിയില് സൂക്ഷിക്കുകയോ വേണം. സ്കൂള് പരിസരത്തെ അപകടാവസ്ഥയിലുള്ള മരങ്ങള്, ബോര്ഡുകള്, ഹോര്ഡിംഗ്സ് എന്നിവ മാറ്റണം. സ്കൂളിലേയ്ക്കുളള വഴി, പരിസരം എന്നിവിടങ്ങളിലെ അപകടാവസ്ഥയില് നില്ക്കുന്ന വൈദ്യുത പോസ്റ്റുകള്, വൈദ്യുത കമ്പികള് എന്നിവ ഒഴിവാക്കണം.
സ്കൂള് ബസുകള്, സ്കൂളില് കുട്ടികളെ എത്തിക്കുന്ന മറ്റ് സ്വകാര്യ വാഹനങ്ങള് എന്നിവയുടെ ഫിറ്റ്നസ് പരിശോധിച്ച് സര്ട്ടിഫിക്കറ്റ് ലഭ്യമാക്കണം. ശുചിത്വ വിദ്യാലയം ഹരിത വിദ്യാലയം ക്യാംപെയ്ന് നടത്തണം. വസ്ത്രം, പുസ്തകം, ഉച്ചഭക്ഷണം എന്നിവ ഉറപ്പാക്കണം.
സ്കൂള് പരിസരത്ത് ലഹരി പദാര്ഥങ്ങളുടെ ഉപയോഗവും വില്പനയും നടക്കുന്നില്ലെന്ന് ഉറപ്പാക്കണം. എക്സൈസ് വകുപ്പും പോലീസും നിശ്ചിത ഇടവേളകളില് കടകളും മറ്റും പരിശോധന നടത്തണം. ജില്ലാതല ജനജാഗ്രത സമിതി നിശ്ചിത ഇടവേളകളില് യോഗം ചേര്ന്ന് ലഹരി വിരുദ്ധ പ്രവര്ത്തനങ്ങള് വിലയിരുത്തണമെന്നും മുഖ്യമന്ത്രി നിര്ദ്ദേശിച്ചു.
ജൂണ് 26ന് ആന്റിനാര്ക്കോട്ടിക് ദിനത്തില് കുട്ടികളുടെ പാര്ലമെന്റ് നടത്തണം. ഒക്ടോബര് 2ന് കുട്ടികളുടെ താമസസ്ഥലങ്ങളില് ജനങ്ങളെ കൂടി പങ്കെടുപ്പിച്ച് സംവാദ സദസ് നടത്തും. നവംബര് ഒന്നിന് മുഖ്യമന്ത്രിയുടെ ലഹരി വിരുദ്ധ സന്ദേശം വീടുകളില് എത്തിക്കും. നവംബര് 14ന് പ്രത്യേക ശിശുദിന അസംബ്ലി ചേരും. ഡിസംബര് 10ന് ലഹരി വിരുദ്ധ സെമിനാര് നടത്തും. 2025 ജനുവരി 30ന് ക്ലാസ് സഭകള് ചേര്ന്ന് ഈ വര്ഷത്തെ പ്രവര്ത്തനങ്ങളുടെ അവലോകനവും നടത്തും. ലഹരി ഉപയോഗം സാമൂഹ്യ വിപത്തായി കണ്ട് ഒറ്റക്കെട്ടായി നേരിടണമെന്നും മുഖ്യമന്ത്രി നിര്ദ്ദേശിച്ചു.
യോഗത്തില് മന്ത്രിമാരായ വി.ശിവന്കുട്ടി, ആര്.ബിന്ദു, എം.ബി.രാജേഷ്, കെ.രാജന്, പി.രാജീവ് എന്നിവരും ബന്ധപ്പെട്ട ഉദ്യോഗസ്ഥരും പങ്കെടുത്തു.
Latest News
Trending
More Stories
All Rights Reserved © 2022