കോൺ​ഗ്രസ് പ്രസിഡന്റ് തിരഞ്ഞെടുപ്പ്: നാമനിർദേശ പത്രികസമർപ്പണത്തിന് തുടക്കമായി

കോൺ​ഗ്രസ് ദേശീയ അധ്യക്ഷനെ തിരഞ്ഞെടുക്കുന്നതിന്റെ ഭാ​ഗമായി നാമനിർദേശ പത്രികസമർപ്പിക്കുന്നതിന് ഇന്നു മുതൽ തുടക്കം. സപ്തംബർ 30 വരെയാണ് നാമനിർദേശ പത്രിക സമർപ്പിക്കാൻ സമയപരിധി നിശ്ചയിച്ചിരിക്കുന്നത്. രാജസ്ഥാൻ മുഖ്യമന്ത്രി അശോക് ​ഗെഹ് ലോത്ത്, ശശി തരൂർ എംപി തുടങ്ങിയവരാണ് പ്രസിഡന്റ് തിരഞ്ഞെടുപ്പിൽ മൽസരിക്കുന്നതിലേക്ക് ഉയർന്നുകേട്ട പേരുകൾ. ഒക്ടോബർ 19നാണ് അധ്യക്ഷനെ പ്രഖ്യാപിക്കുന്നത്. 

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

നിരവധി പിസിസികൾ രാഹുൽ ​ഗാന്ധി കോൺ​ഗ്രസ് പ്രസിഡന്റാവണമെന്ന് ഇതിനകം ആവശ്യപ്പെട്ടു കഴിഞ്ഞു. എന്നാൽ ഇരട്ടപദവി പ്രസിഡന്റ് സ്ഥാനത്തിന് പറ്റില്ലെന്ന് രാഹുൽ ​ഗാന്ധി വ്യക്തമാക്കിയിട്ടുണ്ട്. രാജസ്ഥാൻ മുഖ്യമന്ത്രി സ്ഥാനം രാജിവച്ചാൽ മാത്രമേ അശോക് ​ഗെഹ് ലോത്തിനും കോൺ​ഗ്രസ് പ്രസിഡന്റ് സ്ഥാനം മോഹിക്കാൻ കഴിയൂ എന്ന് ഇതോടെ ഉറപ്പായി. 

1998ൽ സീതാരാമൻ കേസരിക്കു പകരം സോണിയാ ​ഗാന്ധി കോൺ​ഗ്രസ് പ്രസിഡന്റായതിനു ശേഷം കാൽനൂറ്റാണ്ടിനിടെ ആദ്യമായാണ് ​ഗാന്ധി കുടുംബത്തിനു പുറത്തുനിന്നൊരാൾ പാർട്ടി അധ്യക്ഷനാവുന്നത് എന്ന പ്രത്യേകത ഇത്തവണയുണ്ട്. 

തിരഞ്ഞെടുപ്പ് റിട്ടേണിങ് ഓഫിസറായ മധുസൂദനൻ മിസ്ത്രിയാണ് കോൺ​ഗ്രസ് ആസ്ഥാനത്ത് നാമനിർദേശ പത്രികകൾ സ്വീകരിക്കുക. 9000ത്തിലേറെ പേർക്കാണ് വോട്ടവകാശം ഉള്ളതെന്ന് മിസ്ത്രി നേരത്തേ അറിയിച്ചിരുന്നു. 10 പ്രതിനിധികളുടെ പിന്തുണയോടെ ആർക്കും കോൺ​ഗ്രസ് പ്രസിഡന്റാവാൻ മൽസരിക്കാമെന്നും അദ്ദേഹം വ്യക്തമാക്കുകയുണ്ടായി.