എന്നിട്ടും കരിപ്പൂര്‍ വിമാനത്താവളം ലാഭത്തില്‍ മൂന്നാംസ്ഥാനത്ത്; തിരുവനന്തപുരവും കണ്ണൂരും നഷ്ടത്തിലും; ഒന്നാം സ്ഥാനത്ത് കൊല്‍ക്കത്ത

എന്നിട്ടും കരിപ്പൂര്‍ വിമാനത്താവളം ലാഭത്തില്‍ മൂന്നാംസ്ഥാനത്ത്; തിരുവനന്തപുരവും കണ്ണൂരും നഷ്ടത്തിലും; ഒന്നാം സ്ഥാനത്ത് കൊല്‍ക്കത്ത

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കൊണ്ടോട്ടി: പരാധീനതകളുടെ നടുവിലാണെങ്കിലും രാജ്യത്ത് ലാഭത്തില്‍ മൂന്നാംസ്ഥാനത്തെത്തി കരിപ്പൂര്‍ വിമാനത്താവളം. 95.38 കോടി രൂപയാണ് കഴിഞ്ഞ സാമ്പത്തികവര്‍ഷം കരിപ്പൂര്‍ (കോഴിക്കോട്) വിമാനത്താവളത്തിന്റെ ലാഭം. ലോക്‌സഭയില്‍ എസ്.ആര്‍. പാര്‍ഥിപന്‍ എം.പി.യുടെ ചോദ്യത്തിന് വ്യോമയാന സഹമന്ത്രി വി.കെ. സിങ് നല്‍കിയ മറുപടിയിലാണ് വിമാനത്താവളങ്ങളുടെ ലാഭ നഷ്ടക്കണക്ക് വിശദമാക്കിയത്.

എയര്‍പോര്‍ട്ട് അതോറിറ്റിയുടെ കീഴിലുള്ള 125 വിമാനത്താവളങ്ങളില്‍ കൊല്‍ക്കത്തയിലെ നേതാജി സുഭാഷ് ചന്ദ്രബോസിന്റെ പേരിലുള്ള വിമാനത്താവളമാണ് ഒന്നാംസ്ഥാനത്ത്. 482.30 കോടിയാണ് കൊല്‍ക്കത്തയുടെ ലാഭം. ചെന്നൈ വിമാനത്താവളത്തില്‍ 169.56 കോടിയും ലാഭം ഉണ്ടായി.

കഴിഞ്ഞ സാമ്പത്തികവര്‍ഷം 17 വിമാനത്താവളങ്ങള്‍ മാത്രമാണ് ലാഭം രേഖപ്പെടുത്തിയത്. 15 എണ്ണത്തില്‍ ലാഭവും നഷ്ടവുമില്ല. കഴിഞ്ഞ അഞ്ചു വര്‍ഷത്തിനിടെ കോവിഡ് പ്രതിസന്ധിമൂലം രണ്ടു വര്‍ഷം മാത്രമാണ് കോഴിക്കോട് വിമാനത്താവളം നഷ്ടത്തിലായത്. അഞ്ചുവര്‍ഷത്തിനിടെ മിക്ക വിമാനത്താവളങ്ങളും നഷ്ടത്തില്‍ മാത്രമാണ് പ്രവര്‍ത്തിക്കുന്നത്. കോഴിക്കോട് വിമാനത്താവളത്തില്‍ 201819 വര്‍ഷം 73.11 കോടി, 1920ല്‍ 69.14 കോടി എന്നിങ്ങനെയാണ് ലാഭം. കോവിഡ് പ്രതിസന്ധി ബാധിച്ച 202021ല്‍ 59.57 കോടിയും 2122ല്‍ 22.63 കോടിയും നഷ്ടമുണ്ടായി. പുണെ 74.94 കോടി, ഗോവ 48.39 കോടി, തിരുച്ചിറപ്പള്ളി 31.51 കോടി എന്നിവയാണ് കാര്യമായി ലാഭമുണ്ടാക്കിയ മറ്റു വിമാനത്താവളങ്ങള്‍. 115.61 കോടി നഷ്ടം രേഖപ്പെടുത്തിയ അഗര്‍ത്തലയാണ് നഷ്ടക്കണക്കില്‍ മുന്നിലുള്ളത്.

ലാഭകരമായ വിമാനത്താവളങ്ങള്‍ സ്വകാര്യവത്കരിച്ചതോടെയാണ് എയര്‍പോര്‍ട്ട് അതോറിറ്റിക്ക് കീഴിലുള്ളവയുടെ നഷ്ടക്കണക്ക് കൂടിയത്. തിരുവനന്തപുരം വിമാനത്താവളം 110.15 കോടി രൂപയുടെ നഷ്ടമാണ് കഴിഞ്ഞവര്‍ഷം രേഖപ്പെടുത്തിയത്. സ്വകാര്യ പൊതു പങ്കാളിത്തത്തിലുള്ള കൊച്ചി 267.17 കോടി രൂപ ലാഭം നേടിയപ്പോള്‍ കണ്ണൂര്‍ 131.98 കോടി രൂപ നഷ്ടത്തിലാണ്.

This airport is the most profitable government owned airport in India for two years in a row